މުއިއްޒު ވައުދުވެވަޑައިގެންނެވި ގޮތަށް ސިފައިންނާއި ފުލުހުންގެ މުސާރަ ބޮޑެއް ނުކުރާނެ
މުއިއްޒުގެ ވައުދުފުޅާ އެއްގޮތަށް އަންނަ އަހަރުގެ ބަޖެޓުގައި މުސާރަ ބޮޑުކުރަން ހިމަނާފައި ނުވޭ
ރައީސުލްޖުމްހޫރިއްޔާ ދިވެހި ސިފައިންނާ ބައްދަލު ކުރެއްވުން
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކެމްޕޭންގެ ތެރޭގައި ވައުދުވެވަޑައިގެންނެވި ގޮތަށް، އަންނަ އަހަރު ސިފައިންނާއި ފުލުހުންގެ މުސާރަ ބޮޑެއް ނުކުރައްވާނެކަމަށް ފިނޭންސް މިނިސްޓަރު ޑރ. މުހައްމަދު ޝަފީގް ވިދާޅުވެއްޖެއެވެ.
ރިޔާސީ އިންތިހާބުގެ ދެވަނަ ބުރުގެ ކެމްޕޭނުގެ ތެރެއިން އާޓިފިޝަލް ބީޗުގައި ސެޕްޓެމްބަރު 15 ވަނަ ދުވަހުގެރޭ ބޭއްވި "މަވެސް ޕީޕީއެމް" ޖަލްސާގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވެފައިވަނީ "އަޅުގަނޑުމެންނަށް ލިބޭ ސަރުކާރުގައި ދިވެހި ސިފައިންނާ ފުލުހުންގެ މުސާރަ، މިހާރު ހުރި މުސާރައަށްވުރެ ދެގުނަ ބޮޑުކޮށްދޭނަން" މިހެންނެވެ. މީގެ އިތުރުން ވިދާޅުވެފައިވަނީ "އަޅުގަނޑު މި ދަންނަވާ ވާހަކައަކީ ސިފައިންނާއި ފުލުހުންގެ ފުލެޓުތައް އެއީ ފޭސްވަންގައި ހުރި ފުލެޓުތަކުގެ ވާހަކަ، މި ފުލެޓުތަކަށް ދައްކަންޖެހޭ އަގު، އެ ދެ މުއައްސަސާގެ ފުލެޓުތައް ލިބުނު ސިފައިންނާއި ފުލުހުންނަށް ލުއި ދިނުމުގެ ގޮތުން އަޅުގަނޑުމެންގެ ސަރުކާރެއްގައި އެއް އަހަރު ދުވަހަށް އެ އަގު ދެއްކުން ލަސްކޮށްލަދޭނެ ކަމަށް. އެ ދައްކަންޖެހޭ އަދަދެއްވެސް ދެއްކުމުގެ ބަހާލައިގެން ދެއްކޭނެ ފަދަ ލުއި ގޮތެއް އިރާދަކުރެއްވިއްޔާ ހަދައިވެސް ދޭނަން،" ކަމަށެވެ.
ނަމަވެސް އިންތިގާލީ މަރުހަލާގައި ބަޖެޓް އެކުލަވާލަން އައު ސަރުކާރަށް ފުރުސަތުދީ އައު ސަރުކާރުން ބޭނުންވާ ކަންކަން ހިމަނާ މަޖިލީހަށް ފޮނުވާފައިވާ ދައުލަތުގެ ބަޖެޓުގައި 2024 ވަނަ އަހަރު ފުލުހުންނާއި ސިފައިންގެ މުސާރަ ބޮޑުކުރަން ހިމަނާފައި ނުވެއެވެ.
ރައްޔިތުންގެ މަޖިލީހުގެ ބަޖެޓް ދިރާސާކުރާ ކޮމިޓީގައި މެންބަރު ޔައުގޫބް ވިދާޅުވީ، މިހާރުގެ ރައީސް ޑރ. މުހައްމަދު މުއިއްޒު، ސިފައިންނާއި ފުލުހުންގެ މުސާރަ ދެގުނަ ބޮޑުކޮށްދެއްވާނެކަމަށް ކެމްޕޭންގެ ތެރޭގައި ވިދާޅުވެފައިވާ ކަމަށެވެ. ނަމަވެސް ބަޖެޓް ދިރާސާކުރަމުންދާ އިރު ފުލުހުންނާއި ސިފައިންގެ މުސާރަ ދެގުނަ ކުރަން ބަޖެޓުގައި ހިމަނާފައިވާތަން ފެނިވަޑައިނުގަންނަވާ ކަމަށާއި، ރައީސް ޞާލިހު ވައުދުވެވަޑައިގެންނެވި ގޮތަށް ސިފައިންނާއި ފުލުހުންގެ މުސާރަ ވަކި މިންގަނޑަކަށް ބޮޑުކުރަން ބަޖެޓުގައި އެ މިންގަނޑުގައި ހިމަނާފައިވާ ކަމަށެވެ.
ނަމަވެސް އައު ސަރުކާރުން ރައީސް ޑރ. މުހައްމަދު މުއިއްޒު ވައުދުފުޅުވީ ގޮތަށް ސިފައިންނާއި ފުލުހުންގެ މުސާރަ ދެގުނަ ބޮޑުކުރަން ބަޖެޓުގައި ހިމަނާފައިނުވަނީ ކީއްވެތޯ މެންބަރު ޔައުގޫބް ސުވާލުކުރެއްވިއެވެ.
މެންބަރުގެ ސުވާލުގެ ޖަވާބުގައި މިނިސްޓަރު ވިދާޅުވީ 2024 ވަނަ އަހަރުގެ ބަޖެޓަށް އިންޕުޓްދެއްވަން ލިބިވަޑައިގެންނެވި ވަގުތު ކުޑަކަމަށާއި، ވަގުތާއި ހާލަތަށް ރިއާޔަތްކުރައްވާ ރައީސް މުއިއްޒުގެ ވައުދުފުޅުތައް ފުއްދުމަށް ކުރަންޖެހޭ ކަންކަން ކުރައްވާނެ ކަމަށެވެ. ނަމަވެސް އެ ކަންކަން ކުރައްވާއިރު، ކަންކަން ކުރައްވަން ބޭނުންފުޅުވަނީ ރޭވުންތެރިކަމާއެކު އިހްލާސްތެރިކަމާއެކު ގައުމަށް އެންމެ ފައިދާވާ ގޮތަށް ކަމަށެވެ. މިނިސްޓަރު ވަނީ ހަރަދު ކުޑަކުރެވޭނެ ގޮތެއްތައް ހޯދާ ބައެއް ކަންކަން މަޑުޖައްސާލުމަށް ވެސް ނިންމާފައިވާ ކަން ކޮމިޓީގައި ހާމަކުރައްވާފައެވެ.
އެގޮތުން ޕޭ ހާމަނައިޒޭޝަން ނުވަތަ މުވައްޒަފުންގެ މުސާރަ ބޮޑުކުރުމުގެ މަސައްކަތް މަޑުޖައްސާލުމަކީ ހަރަދު ކުޑަކުރުމުގެ ގޮތުން އައު ސަރުކާރުން ނިންމާފައިވާ އެއް ކަންތައް ކަމުގައި މިނިސްޓަރު ވިދާޅުވިއެވެ.
ރައީސް މުއިއްޒު ވައުދުވެވަޑައިގެންނެވި ފަދައިން އަންނަ އަހަރު ސިފައިންނާއި ފުލުހުންގެ މުސާރަ ބޮޑުކޮށްދެއްވާނެ ކަމަށް ކޮމިޓީގައި މިނިސްޓަރު ވިދާޅެއް ނުވިއެވެ. އަދި އެކަން ފަހުން ކުރައްވާނެ ގޮތެއްވެސް އަދި ސަރުކާރުގެ ސްޓޭންޑްވެސް ހާމަ ނުކުރައްވާ ދެއްކެވީ ދައުލަތަށް އެންމެ ފައިދާހުރި ގޮތަކަށް މަސައްކަތް ކުރައްވާނެ ވާހަކަފުޅެވެ.
