ހައުސިންގ މިނިސްޓަރު ޑރ. ހައިދަރަށް މާލޭގެ ރުހުމެއް ނެތް، އޭނާ އަށް ރުހުން ނުދޭން ގޮވާލަން - މީކާއީލް

އައު ސަރުކާރުގެ ހައުސިންގ މިނިސްޓަރު ޑރ. ޢަލީ ހައިދަރަށް ރުހުން ދޭން ވޯޓު ނުދެއްވާނެ ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއީލް އަޙްމަދު ނަސީމް ވިދާޅުވެއްޖެއެވެ.

އަންގާރަ ދުވަހު 2024 ވަނަ އަހަރުގެ ބަޖެޓަށް ވާހަކަފުޅު ދައްކަވަމުން މެންބަރު މީކާއީލް ވަނީ މިނިސްޓަރު ހައިދަރަށް އެއްވެސް މެންބަރަކު ރުހުން ނުދެއްވުމަށް ގޮވާލައްވާފައެވެ. އަދި އެ މިނިސްޓަރަށް ގަލޮޅު ދެކުނު ދާއިރާ އާއި މާލޭގެ ރުހުން ނެތް ކަމަށާއި އެހެންކަމުން އޭނާ އަށް ވޯޓުދޭން ނިންމާ ތްރީލައިން ވިޕެއް ނުނެރުމަށް ވެސް މީކާއީލް ގޮވާލެއްވިއެވެ.

މެންބަރު މީކާއީލް ވަނީ ބަޖެޓާއި ހިސާބު އަކުރުތަކުން އެކަނި ވާހަކަފުޅު ދެއްކެވުމުގެ ޝައުގުވެރިކަމެއް ނެތް ކަމަށް ވިދާޅުވެފައެވެ. ބަޖެޓުން ފެނިގެން ދަނީ މާލޭ ރަށްވެހިންގެ ބޯހިޔާވަހިކަން މި ސަރުކާރުން ފޭރިގަންނަ މަންޒަރުކަމަށް ވެސް މެންބަރު މީކާއީލް ވިދާޅުވިއެވެ. އެގޮތުން ފުށިދިއްގަރުފަޅު ހިއްކަން ބަޖެޓުގައި ޖަހާފައިވާ 400 މިލިއަން ރުފިޔާ އިން ފެންނަނީ، މާލޭ ރައްޔިތުންގެ ބޯހިޔާވަހިކަން ފޭރިގަންނަން ސަރުކާރުން މަސައްކަތްކުރާކަން ކަމަށް އޭނާ ވިދާޅުވިއެވެ. އަދި ހޯމަ ދުވަހުގެ ރޭ މި ސަރުކާރުގެ ހައުސިންގ މިނިސްޓަރު ޑރ.ހައިދަރު ބޭއްވެވި ނޫސްވެރިންގެ ބައްދަލުވުމުން ވެސް ފެނިވަޑައިގަތީ އެކަން ކަަމަށް މީކާއީލް ވިދާޅުވިއެވެ. މިއީ ވަކި ބަޔަކަށް ފްލެޓާއި ގޯތި ދިނުމަށް ކުރާ ކަމެއް ކަމަށް ވެސް މެންބަރު މީކާއީލް ވަނީ ތުހުމަތުކުރައްވާފައެވެ.

މިހާރުގެ ރައީސް ޑރ.މުހައްމަދު މުއިއްޒު ވެރިކަމަށް ވަޑައިތީ ދޮގު ވިއްކަވައިގެން ކަމަށް ސިފަކުރައްވާ މީކާއީލް ވަނީ އެމަނިކުފާނަށް ވަރަށް ބޮޑަށް ފާޑު ވިދާޅުވެފައެވެ. އަދި މި ސަރުކާރުގެ ހައުސިން މިނިސްޓަރު އަމިއްލަފުޅަށް ވެސް އެކަމަށް އިޢުތިރާފްވެވަޑައިގަންނަވާފައިވާ ކަމަށް އޭނާ ވިދާޅުވިއެވެ. އެހެންނަމަވެސް މާލޭގެ ރައްޔިތުންނަށް ގޯތި ލިބުނު ތަނަކުން، އެ ލިބުނު މިންވަރަށް ބަދަލެއް ނެތި ދެއްވާނެކަމަށް ރައީސް ޑރ.މުއިއްޒު ވެރިކަމަށް ވަޑައިގަތުމުގެ ކުރިން ވިދާޅުވެފައިވާކަމަށާއި އެކަން އެގޮތަށް އޮއްވާ މިހާރު ޢަމަލުކުރަމުންދާ ގޮތުން މި ސަރުކާރު ފެނިގެންދަނީ ފޭރޭ ބައެއްގެ ގޮތުގައި ކަމަށް މީކާއީލް ވަނީ ވިދާޅުވެފައެވެ. ވެރިކަން ލިބުމާ އެކު ރާގު ބަދަލުވެފައިވާ ކަމަށް ވެސް އޭނާ ފާހަގަކުރެއްވިއެވެ.

މީގެއިތުރުން ހައުސިން މިނިސްޓަރު ޑރ. އަލީ ހައިދަރު ނޫސްވެރިންނާއި ބައްދަލުކުރައްވާ ދެއްކެވި ވާހަކަފުޅަކީ މިހާތަނަށް ވަޒީރަކު ދައްކަވާފައި ނުވާވަރުގެ ‘ހޮޅި’ ވާހަކަފުޅު ތަކެއްކަމަށް އޭނާ ވިދާޅުވިއެވެ. އެގޮތުން ކުރީގެ ރައީސް އިބްރާހީމް މުހައްމަދު ޞާލިހުގެ ވެރިކަމުގައި ކުރެއްވި ކަންކަމުގެ ތެރެއިން ރިޔާސީ އިންތިޚާބުގެ ފުރަތަމަ ބުރުގެ ފަހުން ނިންމާފައިވާ ކަންކަމަށް އިޚުތިރާމްނުކުރައްވާނެ ކަަމަށް ހައިދަރު ވިދާޅުވެފައިވާތީ އެކަމަށް މީކާއީލް ވަރަށް ބޮޑަށް ފާޑު ވިދާޅުވިއެވެ.

މި ސަރުކާރަށް ވެރިކަން ލިބުމުން ފްލެޓްތަކާއި ގޯތި އަތުލާނެ ކަމުގެ ބިރު އޮތްކަމުގެ ވާހަކަ ކުރިން ވެސް އެމްޑީޕީން އައީ ފާހަގަކުރަމުންކަން މީކާއިލް ވިދާޅުވިއެވެ. އަދި މާލެ ސަރަހައްދުގައި ގޯތިދޭނެ ކަމަށް ބުނެ ފުށިދިއްގަރުފަޅަށް މީހުން ޖަމާކުރަން ފުރުސަތު ނުދިނުމަށް އޭނާ ވަނީ ގޮވާލައްވާފައެވެ.