އިންޑިއާ ސިފައިން ފޮނުވާލެވޭނެ ތާރީހަކާއި އުތުރުތިލަފަޅުގެ އެއްބަސްވުމުގެ ތަފްސީލް ހާމަކުރެވޭނީ ދިރާސާތަކަށް ފަހު: ފިރުޒުލް
19 ނޮވެމްބަރު 2023 | އާދީއްތަ 13:27އިންޑިއާ ސިފައިންގެ އެތައް ހާސް ބަޔަކު ރާއްޖޭގައި ތިބި ކަމަށް ޕީޕީއެމް އަދި ޕީއެންސީ އިން އައީ ނިމިދިޔަ ސަރުކާރު ވެރިކަމުގައި އޮތް އިރު ބުނަމުން
ރައީސް އޮފީހުގެ އަންޑަރ ސެކްރެޓަރީ ފޯ ޕަބްލިކް ޕޮލިސީ، މުހައްމަދު ފިރުޒުލް އަބްދުﷲ ޚަލީލް
އިންޑިއާ ސިފައިން އަނބުރާ ފޮނުވާލެވޭނެ ތާރީހެއް އެނގޭނީ އެއްބަސްވުންތައް ދިރާސާކޮށް ނިމުމުންކަމަށް ރައީސް އޮފީހުގެ އަންޑަރ ސެކްރެޓަރީ ފޯ ޕަބްލިކް ޕޮލިސީ، މުހައްމަދު ފިރުޒުލް އަބްދުﷲ ޚަލީލް ވިދާޅުވެއްޖެއެވެ.
އާދިއްތަ ދުވަހު ރައީސް އޮފީހުގައި ކުރިއަށްދިޔަ ނޫސްވެރިންގެ ބައްދަލުވުމުގައި ރައީސް އޮފީހުގެ އަންޑަރ ސެކްރެޓަރީ ފޯ ޕަބްލިކް ޕޮލިސީ، މުހައްމަދު ފިރުޒުލް އަބްދުﷲ ޚަލީލް ވިދާޅުވީ އިންޑިއާ ސިފައިން ފޮނުވާލުމަށް މިހާރު މަސައްކަތް ފަށާފައިވާ ކަަމަށެވެ. އެގޮތުން މި ސަރުކާރުން އެންމެ ފުރަތަމަ ކުރި މަސައްކަތަކީ އިންޑިއާ ސިފައިން ރާއްޖޭގައި ތިބި ޢަދަދާއި ހާލަތު ދެނެގަތުމުގެ މަސައްކަތް ކަމަށް ފިރުޒުލް ވަނީ ވިދާޅުވެފައެވެ.
އިންޑިއާ ސިފައިން ރާއްޖެއިން ބާލަން ބޭނުންވި ނަމަވެސް އެ މަސައްކަތްކުރަން ބޭނުންވަނީ ޑިޕްލޮމެޓިކް އުސޫލެއްގެ ތެރެއިން ކަަމަށް ފިރުޒުލް ވަނީ ވިދާޅުވެފައެވެ. މިހާރު މަސައްކަތް ކުރަމުން ދަނީ އިންޑިއާ އާއި އެކު ވެފައިވާ އެއްބަސްވުންތަކުގެ ތަފްސީލް ދިރާސާތަކެއް ހެދުމަށް ކަމަށް ފިރިޒުލް ވިދާޅުވިއެވެ. އެ މަސައްކަތް ކުރައްވާނީ މަޝްވަރާ އާއި ހިމޭންކަމުގެ އުސޫލުގެ ތެރެއިން ކަމަށް ފިރުޒުލް ވަނީ ވިދާޅުވެފައެވެ. އަދި އިންޑިއާ ސިފައިން އަނބުރާ ގެންދިއުމަށް އިންޑިއާ އިން އެއްބާރުލުން ލިބޭނެ ކަމުގެ ފެހި ސިގްނަލް ލިބިފައިވާ ކަމަށް ވެސް އޭނާ ވަނީ ވިދާޅުވެފައެވެ.
މީގެ އިތުރުން އުތުރު ތިލަފަޅުގެ އެއްބަސްވުން ވެސް ހާމަކުރެވޭނީ ދިރާސާކޮށް ނިމުމުން ކަމަށް އޭނާ ވަނީ ވިދާޅުވެފައެވެ. އިންޑިއާ ސަރުކާރާއި އެކު ނިމިދިޔަ ސަރުކާރުން 100އެއްހާ އެއްބަސްވުން އެކުލަވާލާފައިވާ ކަމަށާއި އެ އެއްބަސްވުންތައް ދިރާސާކުރުމުގެ މަސައްކަތްތައް މިހާރު ފަށާފައިވާ ކަމަށް އޭނާ ވިދާޅުވިއެވެ. އޭގެ ތެރެއިން އިސްތިޤްލާލާށް ބުރު އަރާ ކަމެއް ހިމެނޭ ނަމަ އެކަންކަން އާއްމުންނަށް ހާމަކުރައްވާނެ ކަމަށް ފިރުޒުލް ވިދާޅުވިއެވެ.
ފިރުޒުލް އެފަދައިން ވިދާޅުވެފައި ވާއިރު އިންޑިއާ ސިފައިންގެ އެތައް ހާސް ބަޔަކު ރާއްޖޭގައި ތިބި ކަމަށް ޕީޕީއެމް އަދި ޕީއެންސީ އިން އައީ ނިމިދިޔަ ސަރުކާރު ވެރިކަމުގައި އޮތް އިރު ބުނަމުންނެވެ. އަދި އުތުރު ތިލަފަޅު އެއްބަސްވުން ވަގުތުން ވަގުތަށް ހިއްސާކުރަން ގޮވާލާމުން ދިޔައެވެ. ސަރުކާރާއި ދެކޮޅަށް އެންމެ ބޮޑަށް ދެއްކި އެއް ވާހަކަ އައީ ވެސް އެއީއެވެ. ރައީސް ޑރ.މުހައްމަދު މުއިއްޒު ވަނީ އިންޑިއާ ސިފައިން އަނބުރާ ގެންދިއުމަށް އިންޑިއާ ސަރުކާރުގެ ކިބައިން ރަސްމީކޮށް އެދިފައެވެ.
