އިސްރާއީލުގެ ފަތުރުވެރިން ރާއްޖެ އައުން މަނާކުރުމާއި މެދު އަދި ގޮތެއް ނިންމާފައި ނުވާ ކަމަށް ސަރުކާރުން ބުނެފިއެވެ.
އާދިއްތަ ދުވަހު ބޭއްވި ނޫސްވެރިންގެ ބައްދަލުވުމެއްގައި ރައީސް އޮފީހުގެ އަންޑަރ ސެކްރެޓަރީ ފޯ ޕަބްލިކް ޕޮލިސީ، މުހައްމަދު ފިރުޒުލް އަބްދުﷲ ޚަލީލް ވަނީ އަދި އެ މައްސަލަ އާއި މެދު ރައީސް ޑރ.މުހައްމަދު މުއިއްޒު ގޮތެއް ނިންމަވާފައި ނުވާ ކަމަށެވެ. ނަމަވެސް އެކަމުގެ އިތުރު ތަފްސީލެއް ހާމައެއް ނުކުރައްވައެވެ.
އިސްރާއީލުގެ ފަތުރުވެރިން ރާއްޖެ އައުން މަނާކުރުމަށް ރައީސުލްޖުމްހޫރިއްޔާއަށް ލަފާ އެރުވުމަށް ރައްޔިތުންގެ މަޖިލީހުގެ ޚާރިޖީ ގުޅުންތަކުގެ ކޮމިޓީން ނިންމާފައި ވަނީ ނޮވެމްބަރު މަހުގެ 7 ވަނަ ދުވަހުއެވެ. މިދިޔަ ބުދަ ދުވަހުގެ ކޮމިޓީގެ އެޖެންޑާގައި އޮތީ ދިވެހިރާއްޖޭގެ މުއައްސަސާތަކުންވީ އެންމެ އަވަހަކަށް އިޒްރޭލު ޕާސްޕޯޓާއި، އިޒްރޭލު ގެ ފަތުރުވެރިން ރާއްޖެއަށް އައުން ހުއްޓުވައިދެއްވުން އެދި ހުށައަޅާފައިވާ މައްސަލައެކެވެ.
ކޮމިޓީ ބައްދަލުވުމުގައި މި މައްސަލައާ ގުޅޭގޮތުން ވަނީ މަޝްވަރާކޮށްފައެވެ. އަދި ހާރިޖީ ސިޔާސަތު ކަނޑައެޅުމަކީ ގާނޫނު އަސާސީން ރައީސުލްޖުމްހޫރިއްޔާއަށް ލިބިދޭ ބާރެއް ކަމަށް ވާތީ މެމްބަރުން ވަނީ އިސްރާއީލުގެ ފަތުރުވެރިން ރާއްޖެ އައުން މަނާކުރުމަށް ރައީސަށް ލަފާ އަރުވަން ނިންމަވާފައެވެ. އެ ނިންމުން ނިންމީ ކޮމިޓީގެ މެމްބަރުންގެ އިއްތިފާގުންނެވެ. އެ މަސައްކަތް މަޖިލީހުގައި ކުރިއަށް ދިޔަ ވަގުތު މިހާރުން މިހާރަށް އިސްރާއީލު ޕާސްޕޯޓު ބޭން ކުރުމަށް ގޮވާލައި، ބުދަ ދުވަހު މަޖިލިސް ކުރިމަތީގައި އިހުތިޖާޖުވެސް ކޮށްފައިވެއެވެ.
