ރާއްޖޭގައި އިންޑިއާގެ 77 ސިފައިން ގާއިމުވެ އެބަތިބި، ބައިލެޓްރަލް 100ށްވުރެ ގިނަ އެއްބަސްވުން ހަދާފައިވޭ: ސަރުކާރު
19 ނޮވެމްބަރު 2023 | އާދީއްތަ 12:07ދެ ހެލިކޮޕްޓަރު އަދި ޑޯނިއާގެ މަތިންދާބޯޓުން ކޮށްފައިވާ މަސައްކަތްތަކުން ރައްޔިތުންނަށް ފައިދާވޭ
ރާއްޖެއާއި އިންޑިއާއިން ކުރިއަށް ގެންދިޔަ ޚާއްސަ އޮޕްރޭޝަނެއްގައި އިންޑިއާގެ ޑޯނިއާއެއް ބޭނުންކުރަނީ
ރާއްޖޭގައި އިންޑިއާގެ 77 ސިފައިން ގާއިމްވެ އެބަތިބި ކަމަށާއި، ބައިލެޓްރަލް 100ށްވުރެ ގިނަ އެއްބަސްވުން ހަދާފައިވާކަމަށް ސަރުކާރުން ބުނެފިއެވެ.
އާދިއްތަ ދުވަހު ރައީސް އޮފީހުގައި ކުރިއަށްދިޔަ ނޫސްވެރިންގެ ބައްދަލުވުމުގައި ރައީސް އޮފީހުގެ އަންޑަރ ސެކްރެޓަރީ ފޯ ޕަބްލިކް ޕޮލިސީ، މުހައްމަދު ފިރުޒުލް އަބްދުﷲ ޚަލީލް ވިދާޅުވީ ރާއްޖޭގައި (މިހާތަނަށް އެއްކުރެވުނު މައުލޫމާތުން) 77 ސިފައިން ގާއިމްވެ ތިބިކަން ޔަގީންކުރެވިފައި ވާކަމަށެވެ.
ދެ ހެލިކޮޕްޓަރު އަދި ޑޯނިއާގެ މަތިންދާބޯޓުން ކޮށްފައިވާ މަސައްކަތްތަކަށް އިޝާރާތްކުރައްވައި ފިރުޒުލް ވިދާޅުވީ، 661 މެޑިކަލް އިވެކުއޭޝަން، ސަވައިލަންސް 220 މަސައްކަތް، އަދި ސަރޗް މިޝަންގެ 100 އޮޕަރޭޝަން ކުރިއަށް ގެންގޮސްފައިވާކަމަށެވެ.
މީގެ އިތުރުން ވީއައިޕީ އެކިއެކި މަސައްކަތްތަކާއި ޑިފެންސާ ގުޅުންހުރި މަސައްކަތްތައް ކުރިއަށް ގެންގޮސްފައިވާ ކަމަށް ފިރުޒުލް ވިދާޅުވިއެވެ.
ފިރުޒުލް ވިދާޅުވީ މި މަސައްކަތްތަކުން ދިވެހިންނަށް ފައިދާތަކެއް ވާކަމަށެވެ. ނަމަވެސް ބޭރުގެ އެއްވެސް ގައުމެއްގެ ސިފައިން ރާއްޖޭގައި ގާއިމްވެ ތިބުމަކީ ރައްޔިތުން ބޭނުންވާ ކަމެއް ނޫންކަމަށާއި، އެ ނިންމުމާ އެއްގޮތަށް ރައީސް މަސައްކަތްފުޅުތައް ބައްޓަންކުރައްވަމުން ގެންދަވާނެ ކަމަށެވެ.
ރާއްޖެއާއި އިންޑިއާ ވެފައިވާ އެއްބަސްވުންތަކާ ގުޅިގެން ފިރުޒުލް ވިދާޅުވީ، އިންޑިއާއާއެކު އެކަނި ވޭތުވެދިޔަ ފަސް އަހަރުގެ ތެރޭގައި 100ށްވުރެ ގިނަ ބައިލެޓްރަލް އެއްބަސްވުމުގައި ސޮއިކޮށްފައިވާ ކަމަށެވެ. މީގެ ތެރޭގައި ޕްރޮޖެކްޓްތައް ހިންގުމަށް ވެފައިވާ އެއްބަސްވުންތައް ނުހިމެނޭ ކަމަށް ފިރުޒުލް ވިދާޅުވިއެވެ.
ފިރުޒުލް ވިދާޅުވީ މިއީ ވަރަށް ގިނަ އެއްބަސްވުންތަކެއް ކަމަށާއި އެއްބަސްވުންތައް ދިރާސާ ކުރުމުގެ މަސައްކަތް ފަށާފައިވާ ކަމަށެވެ.
ރާއްޖޭގައި އިންޑިއާގެ 77 ސިފައިން ގާއިމްވެ އެބަތިބި ކަމަށާއި، ބައިލެޓްރަލް 100ށްވުރެ ގިނަ އެއްބަސްވުން ހަދާފައިވާކަމަށް ސަރުކާރުން ބުނެފައިވާއިރު، 13 ނޮވެންބަރު 2021ގައި ބޭއްވި ރައްޔިތުން މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީގައި އޭރުގެ ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެފައިވަނީ ހެލިކޮޕްޓަރު އަދި ޑޯނިއާ ބެލެހެއްޓުމަށް 75 ސިފައިން އެބަތިބިކަމަށެވެ.
އެދުވަސްވަރު އިދިކޮޅުގައި ތިއްބަވައި ޕީޕީއެމް/ޕީއެންސީ ބުނަމުންދިޔައީ، ހަތިޔާރުއެޅި ވަރަށް ގިނަ ސިފައިން ރާއްޖޭގައި ގާއިމްވެ ތިބިކަމަށެވެ.
