އިމިގްރޭޝަނާއި ޑީއެންއާރު އަދި ޑްރަގް އެޖެންސީ ހޯމް މިނިސްޓްރީގެ ދަށަށް

މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީގެ ދަށަށް އިމިގްރޭޝަނާއި ޑީއެންއާރު އަދި ނޭޝަނަލް ޑްރަގް އެޖެންސީ ބަދަލުކޮށްފިއެވެ.

ސަރުކާރުގެ އިދާރީ އޮނިގަނޑު މިހާރު ހަމަޖެހިފައިވާގޮތަށް ބަލާއިރު މޯލްޑިވްސް އިމިގްރޭޝަން، ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން، ނޭޝަނަލް ސެންޓަރ ފޮރ އިންފޮމޭޝަން ޓެކްނޯލޮޖީ، ނޭޝަނަލް ޑްރަގް އެޖެންސީ އަދި ޑިޕާޓްމަންޓް އޮފް ޖުވެނައިލް ޖަސްޓިސް ވަނީ ހިމަނާފައެވެ.

މީގެ ތެރެއިން އިމިގްރޭޝަން މީގެ ކުރިން ހިންގަމުން އައީ ޑިފެންސް މިނިސްޓްރީގެ ބެލުމުގެ ދަށުންނެވެ. އަދި ނެޝަނަލް ސެންޓަރ ފޮރ އިންފޮރމޭޝަން ޓެކްނޮލޮޖީ ހިންގަމުން އައީ މިނިސްޓްރީ އޮފް އެންވަޔަރަމަންޓް ކްލައިމެޓްޗޭންޖް އެންޑް ޓެކްނޮލޮޖީގެ ދަށުންނެވެ. އަދި ނެޝަނަލް ޑްރަގް އެޖެންސީ ހިންގަމުން އައީ ހެލްތް މިނިސްޓްރީގެ ދަށުންނެވެ. މީގެ އިތުރުން ޑީއެންއާރު ބަލަހައްޓަމުން އައީ ހައުސިން މިނިސްޓްރީގެ ބެލުމުގެ ދަށުންނެވެ.

މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓްގެ ދަށަށް ވަނީ ލޭބަރ ރިލޭޝަންސް އޮތޯރިޓީ އަދި ނޭޝަނަލް ޖޮބް ސެންޓަރު ބަދަލުކޮށްފައެވެ. އަދި ހެރިޓޭޖް މިނިސްޓްރީގެ ދަށުން ކުރިން ބަލަހައްޓަމުން އައި ނޭޝަނަލް ސެންޓަރ ފޮރ ދި އާޓްސް އާއި ނޭޝަނަލް އާޓް ގެލެރީ އާއި، ޤައުމީ ކުތުބުޚާނާގެ އިތުރުން ނޭޝަނަލް ބިޔުރޯ އޮފް ކްލެސިފިކޭޝަން އަދި ޤައުމީ އަރުޝީފު ވަނީ މިނިސްޓްރީ އޮފް ޔޫތު އެމްޕަވަރމަންޓް، އިންފޮމޭޝަން އެންޑް އާޓްސްގެ ދަށަށް ބަދަލުކޮށްފައެވެ.