ވެރިކަމުގެ ދެވަނަ ދައުރެއް ނުލިބޭނޭ ކަން އަމިއްލަ ނަފުސަށް ވެސް ގަބޫލުފުޅު ކުރެއްވޭތީ މިހާރު އެގެންދަވަނީ ރާއްޖޭގެ ނިކަމެތި ރައްޔިތުން އަޅުވެތި ކުރައްވައިގެން ދެވަނަ ދައުރެއް ހޯއްދެވުމުގެ މަސައްކަތް ކުރައްވަމުން ކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ ކުރީގެ މެމްބަރު އިބުރާހިމް ރަޝީދު ( ބޮންޑޭ) ވިދާޅުވެއްޖެއެވެ.

ރާއްޖެ ޓީވީގެ ފަލަ ސުރުޚީ ޕޮރޮގްރާމުހައި ވާހަކަދައްކަވަމުން އިބުރާހިމް ރަޝީދު ވިދާޅުވީ ރައީސް މުއިއްޒު މީގެ ކުރިން އަމިއްލަ ނަފުސެކޭ ވިދާޅުވެ ވަރަށް ގިނައިން ވާހަކަފުޅު ދެއްކެވި ކަމަށެވެ. އަދި އެއީ ވަރަށް ބޮޑު އޮޅުވާލުމެއްގެ ތެރެއިން ދެއްކި ވާހަފުޅެއް ކަމަށާއި މިއަދު އެކަން އެންމެހާ ދިވެހި ރައްޔިތުންނަށް ވަރަށް ސާފުވެއްޖެ ކަމުގައި އޭނާ ވިދާޅުވި އެވެ.

މި ގައުމުގައި ވެރިކަމެއް ކުރުމަށް އެމަނިކުފާނަށް ދެވަނަ ދައުރެއް ލިބިވަޑައިނުގަންނަވާނޭ ކަމަށް މިހާރު އަމިއްލަ ނަފުސަށް ވެސް ގަބޫލުކުރެއްވޭތީ ދެން އޮތް ގޮތަކީ ވެރިކަމުގެ ދެވަނަ ދައުރެއް ހޯދަން އެހެން ނަފުސުތައް އަޅުވެތި ކުރުން ކަމަށް އޭނާ ވިދާޅުވި އެވެ.

އިބުރާހިމް ރަޝީދު ވިދާޅުވީ ރައީސް މުއިއްޒަށް ދެވަނަ ދައުރެއް ހޯދުމަށް އެހެން ނަފުސުތަށް އަޅުވެތި ކުރުމަށް މަޖުބޫރުވެގެން އެކަން ކުރައްވަމުން ގެންދަވާއިރުގައި ފެނިގެން ދަނީ ގައުމުގައި ތިބި އެންމެ ނިކަމެތި އާރެއް ބާރެއް ނެތް މީހުން އަޅުވެތި ކުރުމަށް މަސައްކަތް ކުރާ ތަން ކަމަށެވެ. އެކަން ވެސް ކުރައްވަމުން އެ ގެންދަވަނީ އެއީ ތިމާއަށް ދެވަނަ ދައުރަކަށް ލިބޭނޭ ވޯޓު ކަމުގައި ދެކިގެން ކަމުގައި އޭނާ ވިދާޅުވިއެވެ.

ކަންމިހެން ހުރި އިރު އޭރުވެސް ނަފުސޭ ވިދާޅުވެ، ރައީސް އެ ދެއްކެވި ވާހަކަފުޅަކީ ވެރިކަމަށް ބޭނުން ވެފައިވާ ދަހިވެތި ނަފުސެއްގެ ވާހަ ކަމަށާއި އެ ނަފުސު ބުނަމުން އެ ގެންދަނީ ހިޔާ ފްލެޓުތަކުގެ އެއްބަސްވުން އެތަނަށް ކުލި ނުދެއްކޭ މީހުން ނެރެ ބޭރުކޮށްލާ ގޮތަށް ބަދަލުކޮށްލުމަށް ކަމަށެވެ.

އެގޮތަށް އެކަން ކުރައްވަން އެ މަސައްކަތް ކުރައްވަނީ އެ ދުވަހަކުން ނިކަމެތި ރައްޔިތުން އައިސް ރައީސްގެ ފައިބުޑަށް ވެއްޓޭނެ ކަމަށް ބަލައިގެން ކަމުގައި ވެސް އޭނާ ވިދާޅުވީއެވެ.

އޭނާ އިތުރަށް ވިދާޅުވީ މި ސަރުކާރުން އެ ކުރަނީ ވަރަށް ވެސް ނުބައި ކަމެއް ކަމަށާއި އެއީ ނިކަމެތި ނަފުސުތައް އަޅުވެތި ކުރުމަށް އެމީހުންނަށް ލިބިފައި ހުރި ބޯހިޔާވަހިކަން ފޭރިގަންނަނީ ކަމަށެވެ.

އޭނާ ވިދާޅުވީ އެއީކީ ހެޔޮއެދޭ އިންސާނަކު ކުރާނޭ ކަމެއް ނޫން ކަމަށާއި ރައީސް މުއިއްޒު އެކަންތައް އެ ކުރައްވަނީ އިންސާނެއްގެ ދަރަޖައިން އެހެން ދަރަޖައަކަށް ބަދަލުވެ ހުރެގެން ކަމަށެވެ.