ކުރިއަށް އޮތް 30 ދުވަސްތެރޭ ފުށިދިއްގަރުފަޅު ހިއްކުމުގެ މަސައްކަތް ފެށޭނެ، އަމާޒަކީ ގެދޮރުވެރިކަމަށް ބޭނުންޖެހި އެކަން ހައްލު ނުވާ މީހަކު ނެތުން - މުއިއްޒު

ކުރިއަށް އޮތް 30 ދުވަސް ހަމަވުމުގެ ކުރިން، ފުށިދިއްގަރުފަޅު ހިއްކުމުގެ ޢަމަލީ މަސައްކަތް ފެށޭނެ ކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.

ޒަމާނީ އާ ގަޑިބުރު ހުޅުވުމުގެ ރަސްމިއްޔާތުގައި ވާހަކަދައްކަވަމުން މުއިއްޒު ވިދާޅުވީ ގެދޮރުވެރިކަމުގެ ބޮޑު ބިޔަ މަޝްރޫޢު ހަފްތާ 14 ގައި އިޢުލާންކުރި ގޮތަށް ކުރިއަށް ދާނެ ކަމަށެވެ. ރައީސް ވިދާޅުވީ އަމާޒަކީ އިންތިޚާބުގެ ކުރިން ވައުދުވީ ގޮތަށް މި ދައުރުގެ ތެރޭގައި ރާއްޖޭގައި އެއްވެސް ކަންކޮޅެއްގައި ގެދޮރުވެރިކަމަށް ބޭނުންޖެހިފައި ހުރި، އެކަން ޙައްލުނުވާ ރައްޔިތަކު ނުހުންނަ މިންވަރަށް އިރާދަކުރެއްވިއްޔާއެ މައްސަލަ ޙައްލުކޮށްދިނުން. ކަމަށް ރައީސް ވިދާޅުވިއެވެ.

Advertisement

އޭގެ މާނައަކީ ކުރިއަށް އޮތް 30 ދުވަހުގެ ތެރޭގައި އެ މަސައްކަތް ފެއްޓެވުން ކަމަށާއި އަޒުމަކީ އެއީ ކަމަށް ރައީސް މުއިއްޒު ވަނީ ވިދާޅުވެފައެވެ. ފުށިދިއްގަރުފަޅު ހިއްކުމުގެ ޢަމަލީ މަސައްކަތް ފަށާގޮތަށް ގާތްގަނޑަކަށް 8 މަސް ދުވަހުގެ ތެރޭގައި މަސައްކަތް ނިމޭނެ ކަަމަށް ލަފާކުރެވޭ ކަމަށް ރައީސް ވަނީ ވިދާޅުވެފައެވެ. އެ ތަނަކީ ހުޅުމާލޭގެ ދެ ފިޔަވަހި އެއްކޮށްލީމާ ވާވަރުގެ ޖާގައިގެ ތިންގުނަ ބޮޑު ޖާގައިގެ ތަނަކަަށް ވުމާއި އެކު އެތަން ޖާގައިގެ ގޮތުން ބިޔަވާނެ ކަމަށް ރައީސް ވިދާޅުވިއެވެ. ރައީސް އިތުރަށް ވިދާޅުވީ އެތަނުގައި ގާތްގަނޑަކަށް 1200 ހެކްޓަރު ހުންނާނެ ކަމަށެވެ. އެވަރު ބޮޑު ފަޅެއް މި ހިއްކަނީ، ދިވެހި ރައްޔިތުންނަށް ގެދޮރުވެރިކަން ޙައްލުކޮށްދިނުމަށްޓަކައި ކަމަށް ވެސް ރައީސް ވަނީ ވިދާޅުވެފައެވެ.

މި ސަރުކާރުގައި އެންމެ މުހިންމު މަޝްރޫޢެއްގެ ގޮތުގައި، ނުވަތަ ޙައްލުކުރަން ބޭނުންވާ އެންމެބޮޑު ކަމެއްގެ ގޮތުގައި ސަރުކާރުން ފާހަގަކުރަނީ ގެދޮރުވެރިކަމުގެ މައްސަލައެވެ. މާލެ ސަރަހައްދަކީ އެންމެ ގިނަ ރައްޔިތުން އުޅޭ ސަރަހައްދުކަމަށް ވުމާއި އެކު އެންމެބޮޑު މަޝްރޫޢު ކަނޑައެޅިފައި ވަނީ މި ސަރަހައްދަށް ކަމަށް ރައީސް ވިދާޅުވިއެވެ. އެހެންކަމުން ގްރޭޓަރ މާލެ، ނޫނީ މާލެ ސަރަޙައްދުގައި މި ގެދޮރުގެ މައްސަލަ ޙައްލުކުރުމަށްޓަކައި ފުށިދިއްގަރުފަޅު ހިއްކުމުގެ މަޝްރޫޢާއި، މިހާރު ހިނގަމުންދާ ގުޅިފަޅާއި ގިރާވަރު ފަޅުގެ މަޝްރޫޢު އިތުރަށް ފުޅާކޮށް، އޭގެ ތަނަވަސްކަން އިތުރުކުރަން ޖެހޭ ކަމަށް ރައީސް ވަނީ ވިދާޅުވެފައެވެ.

އިތުރަށް ރައީސް ވިދާޅުވީ ގިރާވަރު ފަޅާ ހަމަޔަށް ބްރިޖުގެ މަސައްކަތްވެސް، މިހާރު އެ މަޑުޖެހިފައި އޮތް އޮތުން، ނޫނީވިއްޔާ ދާ ސްޕީޑް، ތަންކޮޅެއް ލަސްކޮށްދާ ދިޔުން ރަނގަޅުކުރުމުގެ މަސައްކަތް ކުރައްވާނެ ކަމަށެވެ.