މާލޭގައި 1990 ވަނަ އަހަރު ހުރި ގަޑިބުރު، ޒަމާނީ ފެންވަރަށް ތަރައްގީ ކުރުމަށްފަހު އަލުން ހުޅުވައިފި އެވެ.

ހޮނިހިރު ދުވަހުގެ ރޭ ބޭއްވި ހާއްސަ ރަސްމިއްޔާތެއްގައި މި ގަޑިބުރު ހުޅުވައިދެއްވީ ރައީސް ޑރ. މުހައްމަދު މުއިއްޒު އެވެ.

އެންމެ ފުރަތަމަ މި ގަޑިބުރަކީ ސްރީލަންކާގެ އެހީތެރިކަމާ އެކު 1990 ގައި މާލޭގައި ބިނާ ކުރި ގަޑިބުރެކެވެ. އޭރު މި ގަޑިބުރު ބިނާ ކުރީ ރާއްޖޭގެ މިނިވަންކަމަށް 25 އަހަރު ފުރުމާ ގުޅިގެންނެވެ. މި ގަޑިބުރު ފަހުން ހަލާކުވެ، ފަހުން ތަޅާލި އެވެ.

އެގޮތުން ކުރީގެ ގަޑިބުރުގެ އަސްލަކަށް ބަލައިގެން، ކުރިން ވެސް އެ ބިނާ ހުރިތަން ކަމަށްވާ ފަރީދީ މަގާއި އޯކިޑް މަގާއި ފަނޑިޔާރު މަގާއި ފުނަ ގޯޅި ގުޅޭ ހަތަރު އަނގޮޅީގައި ބިނާކުރެވުނު ޒަމާނީ ގަޑިބުރަކީ، ރަޝީދު ކާޕެންޓްރީ އެންޑް ކޮންސްޓްރަކްޝަން (އާރްސީސީ) ގެ ސީއެސްއާރް ޕްރޮޖެކްޓެއްގެ ދަށުން ޕައިނިއާ މޯލްޑިވްސް އިން ތަރައްގީ ކުރި ބިނާ އެކެވެ.

މި ގަޑިއިރު މިފަހަރު ހުޅުވި އިރު، ހުޅުވާފައިވަނީ ކޮންމެ ނަމާދަކަށް ވެސް، ބަންގި ގޮވާ ގޮތަށެވެ. އެގޮތުން ދުވާލަކު ފަސް ވަގުތު ބަންގީގެ އަޑު މިބިނާއިން އިވޭނެއެވެ. އަދި އެ ގަޑީގެ މެދުން ވަށައިގެން ވަނީ ލެޑް ޕެނަލް ހަރުކޮށްފަ އެވެ.