މި ރިޔާސީ ދައުރުގެ ސިޔާސަތަކީ އުމްރާނީ ބިނާކުރުމާއި، އިންސާނީ ބިނާކުރުން ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ހުކުރު ދުވަހުގެ ހަވީރު ރައީސްކަމުގެ ހުވާކުރެއްވުމަށްފަހު ޤައުމާ މުޚާތަބް ކުރައްވާ ތަޤްރީރުކުރައްވަމުން، ރައީސް މުއިއްޒު ވިދާޅުވީ މިއަދަކީ ވަރަށް ތާރީހީ ދުވަހެއް ކަމަށާއި، މި ވަގުތަކީ ވަރަށް އުންމީދީ ވަގުތެއް ކަމަށެވެ. މި މައިދާނަކީ ނަސްރާއި ކާމިޔާބީގެ މައިދާނެއް ކަމަށާއި، މިއަދަކީ ޒަމާންތަކަކަށްފަހު ދިވެހިން ދިވެހިންގެ ރާއްޖެއަށް އަލުން އެނބުރި ދިއުމުގެ ޚާއްސަ ދަތުރަށް ރިޔާ ކޮށާލި ދުވަސް ކަމަށް ރައީސް މުއިއްޒު ވިދާޅުވިއެވެ.
ރައީސް މުއިއްޒު ވިދާޅުވީ ދައުލަތެއްގެ ސަލާމަތާއި، އެ ބައެއްގެ އާރާބާރާއި ގަދަރާއި އިހްތިރާމް ނެގެހެއްޓުމަށް މައިގަނޑު ދެބާވަތެއްގެ ބިނާކުރުމެއް ބިނާ ކުރާ ކަމަށެވެ. އެއީ އުމްރާނީ ބިނާކުރުމާއި، އިންސާނީ ބިނާކުރުން ކަމަށް ރައީސް މުއިއްޒު ވިދާޅުވިއެވެ. އެހެންކަމުން އެމަނިކުފާނުގެ ސަރުކާރު ކުރިއަށްދާނީ މި ދެ ސިޔާސާތުގެ މަތީގައި ކަމަށާއި، އިލްމާއި ހުނަރާއި އަހުލާގާއި ދީނަށް ލޯބި ޖެއްސުމުގެ އިތުރުން އުޅުންތެރިކަން ދިވެހި ދަރިންގެ ކިބައިގައި އަށަގެންނެވުމަކީ ސަރުކާރުގެ ސިޔާސަތުކަމަށެވެ.
އެހެން އިބާރާތަކުން ދަންނަވާނަމަ ގެދޮރާއި ދިފާއި ބުރުސްތަކާއި މަގުތަކާއި ފާލަންތަކާއި އޮފީސްތައް ބިނާ ކުރުމާއި، ހެޔޮ ވިސްނުން ހުރި ސިކުނޑިތަކެއް ލިބިފައިވާ އަހުލާގު ރަނގަޅު މަޖުތަމައުއެއް ބިނާކުރުން. އެހެންކަމުން އެއީ ގައުމުގެ ފަސްގަނޑު ބިނާކުރުމާއި، ގައުމުގެ ސިކުނޑިތައް ބިނާކުރުން. މިފެށުނު ރިޔާސީ ދައުރުގެ ސިޔާސަތަކަށްވާނީ މި ދެ ބާވަތުގެ ބިނާ ކުރުން ވަޒަން ހަމަކޮށް ކުރިއަށް ގެންދިއުން. އިލްމާއި ހުނަރު. އަހުލާގާއި ދީން. އުޅުންތެރިކަމާއި މަސައްކަތްތެރިކަން. މިކަންކަން ދިވެހި ދަރިންގެ ކިބައިގައި އަށަގެންނެވުން. ހަމައެހެންމެ ރާއްޖޭގެ ބިނާވެއްޓަށް އާދަޔާ ހިލާފު އިންގިލާބީ މުއްސަންދިކަމެއް ގެނެސްދިނުން.ރައީސުލްޖުމްހޫރިއްޔާ ޑރ.މުހައްމަދު މުއިއްޒު
ރައީސް މުއިއްޒު ވިދާޅުވީ ރާއްޖޭގައި ވަސީލަތްތައް ބިނާކުރުމުގައި އިންގިލާބީ ކުރިއެރުމެއް ހޯދުމަކީވެސް ސަރުކާރުގެ އަމާޒެއްކަމަށެވެ.
