އުންމީދަކީ މި ފެށޭ އައު ދައުރަކީ ދިވެހި އުންމަތަށް ތަރައްޤީ އާއި ކުރިއެރުން ގެނެސްދޭނެ ދައުރަކަށްވުން: ނާއިބުރައީސް
އެންމެ ބޮޑަށް ބެއްލެވީ ގާނޫނު އަސާސީން މަތިކޮށްފައިވާ ޒިންމާތައް އެންމެ ފުރިހަމަކަންމަތީ، ތެދުވެރިކަމާ އެކު އަދާކޮށްދެއްވުމަށް ކަމަށް ވިދާޅުވި
މުދައްރިސުންގެ ދުވަސް ފާހަގަކުރުމަށް އަމީނިއްޔާ ސްކޫލުގައި ބޭއްވި ޚާއްޞަ އެސެމްބްލީގައި ރައީސުލްޖުމްހޫރިއްޔާގެ ނާއިބު ބައިވެރިވެވަޑައިގެން ވާހަކަފުޅުދައްކަވަނީ
ހުކުރު ދުވަހު ފެށޭ އައު ދައުރަކީ ދިވެހީންގެ ފުރިހަމަ ތާއީދުން ގެނައި ވެރިކަމެއް ކަމަށާއި، އެ ދައުރަކީ ދިވެހި އުންމަތަށް ތަރައްޤީ އާއި ކުރިއެރުން ގެނެސްދޭނެ ދައުރަކަށް ވާނެ ކަމަށް އުންމީދުކުރައްވާ ކަމަށް ނާއިބު ރައީސް ފައިސަލް ނަސީމު ވިދާޅުވެއްޖެ އެވެ.
ނާއިބުރައީސްކަމުގެ މަޤާމުގެ ވަދާޢީ މެސެޖެއް ރައްޔިތުންނަށް ފޮނުއްވަމުން ނާއިބުރައީސް ނެރުއްވި ވީޑިޔޯ މެސެޖެއްގައި ވިދާޅުވީ ނިމިގެން މިދާ ދައުރުގައި ޤައުމަށާއި ރައްޔިތުންނަށް ޚިދުމަތް ކުރެއްވުމުގެ ފުރުސަތު ދެއްވީތީ މާތް ﷲ އަށް ޙަމްދު ކުރައްވާ ކަމަށާއި، އެ މަޤާމުގައި ދެމިހުންނެވި އިރުގައި، ރައީސް އިބްރާޙީމް މުޙައްމަދު ޞާލިޙު އެމަނިކުފާނަށް ކުރެއްވި އިތުބާރަށް ޝުކުރު އަދާކުރައްވާ ކަމަށެވެ.
ދިވެހި ރައްޔިތުންގެ ފަރާތުން އެމަނިކުފާނަށް ލިބުނު އެހީތެރިކަމަށް ވެސް ޝުކުރު އަދާކުރައްވަމުން ނާއިބުރައީސް ވިދާޅުވީ އެމަނިކުފާނު ނާއިބުރައީސް ކަމުގައި ހުންނަވައިގެން، އެންމެ ބޮޑަށް ބެއްލެވީ ގާނޫނު އަސާސީން މަތިކޮށްފައިވާ ޒިންމާތައް އެންމެ ފުރިހަމަކަންމަތީ، ތެދުވެރިކަމާ އެކު އަދާކޮށްދެއްވުމަށް ކަމަށެވެ.
ނާއިބުރައީސް ވިދާޅުވީ ދިވެހި ރައްޔިތުންގެ ފުރިހަމަ ނިންމުމާއެކު ހުކުރު ދުވަހު ފެށިގެން މިދާ ސަރުކާރަކީ ރާއްޖެއަށް ކުރިއެރުމާ ތަރައްޤީ ގެނެސްދޭނެ ދައުރަކަށް ވާނެ ކަމަށް އުންމީދު ކުރައްވާ ކަމަށެވެ.
ނާއިބުރައީސްގެ މި މެސެޖު ނިންމަވާލެއްވީ ހުކުރު ދުވަހު ހުވާކުރައްވާ ޑރ. މުހައްމަދު މުއިއްޒު އަދި ނާއިބުރައީސް ހުސެއިން މުހައްމަދު ލަތީފުގެ އިތުރުން، މި ފަށާ ދައުރުގެ މެންބަރުންނަށް މަރުޙަބާ ވިދާޅުވެ، ދިވެހި ގައުމަށް މިނިވަންކަން އަބަދު ވެސް ދެމެހެއްޓުމަށް އެދި ދުއާ ކުރައްވަމުންނެވެ.
ނާއިބުރައީސް ފައިސަލް ނަސީމު ވަދާއީ މެސެޖެއް ދެއްވާފައިވާއިރު، އެމަނިކުފާނަކީ ރާއްޖޭގެ ޑިމޮކްރަސީގެ ހަޔާތުގައި ދައުރު ފުރިހަމަކުރެއްވި ހަމައެކަނި ނާއިބު ރައީސެވެ.
