ފުލުހުންގެ އިދާރާ ހިންގުން ވަގުތީގޮތުން، ޑެޕިއުޓީ ކޮމިޝަނަރ އޮފް ޕޮލިސް އަބްދުލްމަންނާން ޔޫސުފަށް
އޭނާއަކީ 29 އަހަރު ފުލުހުންގެ އިދާރާއަށް ޚިދުމަތްކުރައްވާފައިވާ ބޭފުޅެއް
ޑެޕިއުޓީ ކޮމިޝަނަރ އޮފް ޕޮލިސް، އަބްދުލްމަންނާން ޔޫސުފް
ފުލުހުންގެ އިދާރާ ހިންގެވުން ވަގުތީގޮތުން، ޑެޕިއުޓީ ކޮމިޝަނަރ އޮފް ޕޮލިސް ޢއަބްދުލްމަންނާން ޔޫސުފާ ހަވާލުކުރައްވައިފިއެވެ.
ޑީސީޕީ މަންނާނު އެ މަގާމަށް އައްޔަނުކުރައްވާފައި ވަނީ، ކޮމިޝަނަރ އޮފް ޕޮލިސްގެ މަގާމުގައި ހުންނެވި މުހައްމަދު ހަމީދު ރިޓަޔަރ ކުރައްވާފައި ވާތީއެވެ.
ފުލުހުން ބުނީ، ކޮމިޝަނަރ އޮފް ޕޮލިސްގެ މަގާމުން މުހައްމަދު ހަމީދު ޝަރަފުވެރިކަމާއެކު ރިޓަޔަރ ކުރައްވާފައިވާތީ ދިވެހި ފުލުހުންގެ ޚިދުމަތުގެ ގާނޫނުގެ 58 ވަނަ މާއްދާގެ (ނ)ގައި ވާ ގޮތުގެ މަތިން ކޮމިޝަނަރެއް އައްޔަނުކުރެވެންދެން، ކޮމިޝަނަރ އޮފް ޕޮލިސްގެ މަސްއޫލިއްޔަތުތައް އަދާކުރައްވާނީ ޑެޕިއުޓީ ކޮމިޝަނަރ އޮފް ޕޮލިސް އަބްދުލްމަންނާން ޔޫސުފް ކަމަށެެވެ. އެގޮތަށް ކަނޑައަޅުއްވާފައި ވަނީ ބުދަ ދުވަހު، ހޯމް މިނިސްޓަރު ޢިމްރާންއެވެ.
މަންނާނުއަކީ ކުރީގެ ރައީސް އަބްދުﷲ ޔާމީން އަބްދުލް ގައްޔޫމްގެ ވެރިކަމުގައި 2018 ވަނަ އަހަރު ފެބްރުއަރީ 1ގައި ސުޕްރީމް ކޯޓުން ނެރުނު އަމުރު ތަންފީޒުކުރުމަށް މަސައްކަތްކުރެއްވި ކަމަށް ތުހުމަތުކޮށް، އެ އަހަރުގެ މޭ މަހު ފުލުހުންގެ ވަޒީފާއިން ވަކިކޮށްފައިވާ ބޭފުޅެކެވެ. އޭނާ އަލުން ވަޒީފާއަށް އައްޔަން މކުރެއްވީ ޔާމީންގެ ވެރިކަން ނިމުނު ފަހުންނެވެ. އަދި މަންނާނު ޑެޕިއުޓީ ކޮމިޝަނަރަކަށް އައްޔަންކުރީ ނޮވެމްބަރު 19، 2018ގައެވެ. އޭނާއަކީ 29 އަހަރު ފުލުހުންގެ އިދާރާއަށް ޚިދުމަތް ކުރައްވާފައިވާ ބޭފުޅެކެވެ.
