ޖުޑީޝަރީގެ އިތުބާރު ދެމެހެއްޓުމުގެ އެންމެ ބޮޑު ޒިންމާއެއް އޮތީ ކޯޓުތަކާއި ފަނޑިޔާރުންގެ އަތްމަތީގައި - ހިސާން
ޖުޑީޝަރީގެ އިތުބާރު ގާއިމްކުރުމަކީ ވަކި މީހެއް، ނުވަތަ ވަކި މުއައްސަސާއެއްގެ އެކަނި ޒިންމާއެއް ނޫން
ޖޭއެސްސީގެ ރައީސް އަދި ތުޅާދޫ ދާއިރާގެ މެންބަރު، ހިސާން ހުސައިން
ޖުޑީޝަރީގެ އިތުބާރު ގާއިމްކުރުމަކީ ވަކި މީހެއް، ނުވަތަ ވަކި މުއައްސަސާއެއްގެ އެކަނި ޒިންމާއެއް ކަމަށް ދެކިގެން ނުވާނެކަމަށާއި، ޖުޑީޝަރީގެ އިތުބާރު ދެމެހެއްޓުމުގެ އެންމެ ބޮޑު ޒިންމާއެއް އޮތީ ކޯޓުތަކާއި ފަނޑިޔާރުންގެ އަތްމަތީގައި ކަމަށް، ޖޭއެސްސީގެ ރައީސް އަދި ތުޅާދޫ ދާއިރާގެ މެންބަރު ހިސާން ހުސައިން ވިދާޅުވެއްޖެއެވެ.
އޭނާ އެފަދައިން ވިދާޅުވީ، ދިވެހިރާއްޖޭގެ ކޯޓުތަކަށް އައްޔަންކުރާ ފަނޑިޔާރުން ހުވާކުރުމާއި ފަތްކޮޅު ދެއްވުމަށް ބުރާސްފަތި ދުވަހު ބޭއްވި ރަސްމިއްޔާތުގައި ވާހަކަދައްކަވަމުންނެވެ.
ހުވާކުރެއްވި ފަނޑިޔާރުންނަށް މަރުހަބާ ވިދާޅުވެ ހިސާން ވަނީ، އެ ބޭފުޅުންނަކީ ނަމޫނާ ބަޔަކަށް ވުމަށް އިލްތިމާސްކުރައްވާފައެވެ. އެ ފަނޑިޔާރުން އެ ދާއިރާއާ ގުޅުމަކީ ޖުޑީޝަރީއަށް ލިބުނު އިތުރު ތަރައްގީއާއި ކުރިއެރުމެއް ކަމަށް ހިސާން ވަނީ ވިދާޅުވެފައެވެ. ފަނޑިޔާރުން ދައްކަވާ ރީތި ނަމޫނާއަކީ ޝަރުއީ ދާއިރާގެ ކުރިމަގާމެދު ދެކޭ ހުވަފެންތައް ހަގީގަތަކަށް ހެދުމަށް އެޅޭ ފާލަމެއް ކަަމަށް އޭނާ ވިދާޅުވިއެވެ. ފަނޑިޔާރުން ނަމޫނާ ބަޔަކަށް ވުމަކީ މުސްތަގުބަލުގެ ޖުޑީޝަރީ ކުރަހައިލުމަށް އެޅޭ ބިންގަލެއްކަން ހިސާން ވަނީ ސިފަކުރައްވާފައެވެ.
ހިސާން ވިދާޅުވީ، މަސައްކަތުގެ އަޚުލާގަކީ ކޮންމެ ދާއިރާއެއްގެވެސް މައިގަނޑު އަސާސްކަަމަށެވެ. ރިވެތި އަޚުލާގާއި ނަމޫނާއާނުލައި އެއްވެސް ތަނެއް ކުރިއަރައި ނުދާނެކަަމަށް ހިސާން ވަނީ ވިދާޅުވެފައެވެ. މަސައްކަތުގެ ރިވެތި އަޚުލާގު ފަނޑިޔާރުންގެ ކިބައިން ފެންނަނަމަ، މުވައްޒަފުންގެ ފަރާތުންވެސް އެ ނަމޫނާ ފެނިގެންދާނެކަން ހިސާން ވަނީ ފާހަގަކުރައްވާފައެވެ. މަސައްކަތުގެ އަޚުލާގާނުލައި ފަނޑިޔާރުންގެ ކިބައިން ބޭނުންވާ ނަތީޖާ ހާސިލްނުކުރެވޭނެ ކަަމަށާއި، ފަނޑިޔާރުންނަކީ ވަގުތަށް ކަމޭނުހިތާ، ކޯޓުގެ މަސްލަހަތަށްވުރެ އަމިއްލަ މަސްލަހަތު އިސްކުރާ މީހަކަށް ވާނަމަ، މުވައްޒަފުންނަކީ ވަގުތަށް ކަމޭހިތާ ބަޔަކަށް ހެދުން ވާނީ އުނދަނގޫ ކަމަކަށް ކަމަށްވެސް އޭނާ ވަނީ ވިދާޅުވެފައެވެ.
ކޯޓުތަކުގެ ރަސްމީ ގަޑިއަކީ ވަރަށް މުހިންމު ގަޑިއެއް ކަަމަށާއި، އެ ވަގުތުތައް ކޯޓުތަކުން ހުސްކުރަންވާނީ އާއްމުންނަށް ޚިދުމަތް ދިނުމަށް ކަމަށް ހިސާން ވަނީ ވިދާޅުވެފައެވެ. ޒަރޫރިއްޔަތެއް ނެތި އަމިއްލަ ކަންކަމުން ދުރުވެފައިވާ ވަގުތަކަށް އެ ވަގުތު ހަދަންޖެހޭ ކަމަށާއި، ކޯޓުތަކުން ދޭ ޚިދުމަތަކީ އަދާހަަމަ ޚިދުމަތްތަަކަކަށް ވާންޖެހޭ ކަމަށް ހިސާން ވަނީ ވިދާޅުވެފައެވެ. އެ ދާއިރާގެ ފަންނާއި ވަސީލަތްތައް ރަނގަޅަށް ބޭނުންކޮށް، ކޯޓުތަކުން ނިންމާ ނިންމުންތައް އަވަހަށް ނިންމައި، އިންސާފުގެ ދަތުރު އަވަސްކޮށްދިނުމަށް ހިސާން އެދިވަޑައިގަތެވެ.
