ހުޅުމާލެ މަގުތަކުގައި ހުރި އަދި ފޭސް-2ގެ ބީޗް ސަރަހައްދުގައި އޮންނަ ހުސްބިމުގައި ޖަހާފައިހުރި ހަޓުތައް ނެގުމަށް އަންގައިފި
16 ނޮވެމްބަރު 2023 | ބުރާސްފަތި 04:03ދެވިފައިވާ މުއްދަތުގައި ތަކެތި ނަގާފައިނުވާނަމަ މި ސަރަހައްދުތައް ސާފުކުރުމުގެ މަސައްކަތް ކުރާނެ
ހުޅުމާލެ ޕޭވްމަންޓުގައި ގޮނޑިއާއި މޭޒު ބަހައްޓާފައި
ހުއްދަނެތި ވިޔަފާރި ކުރުމަށް ހުޅުމާލެ މަގުތަކުގެ ޕޭވްމަންޓު މަތީގައި ޖަހާފައިހުރި ގޮނޑިމޭޒާއި، ހުޅުމާލެ ފޭސް-2 ހިޔާ ފްލެޓް 12 ކައިރި ބީޗް ސަރަހައްދަށްވާ ގޮތަށް އޮންނަ ހުސްބިމުގައި ޖަހާފައިހުރި ހަޓުތަކާއި ތަކެތި ނެގުމަށް އާބަންކޯއިން އަންގައިފިއެވެ.
ބުރާސްފަތި ދުވަހު އާބަންކޯއިން ބުނީ ހުޅުމާލެ އެކި ސަރަހައްދުތަކުގެ ޕޭވްމަންޓު އަދި ހެޖުތެރޭގައި ކެފޭ، ރެސްޓޯރަންޓް އަދި ޖޫގޯ ޕޮއިންޓްތަކުން ގަވާއިދާ ޚިލާފަށް ގޮޑި މޭޒު ޖަހައިގެން ވިޔަފާރި އުސޫލުން ޚިދުމަތް ދެމުންދާ ކަމަށެވެ.
އެހެންކަމުން 20 ނޮވެންބަރު 2023 ގެ ނިޔަލަށް އެ ސަރަހައްދު ވިޔަފާރި އުސޫލުން ބޭނުން ކުރުމަށް ބެހެއްޓިފައިވާ ގޮނޑި، މޭޒުތައް ނެގުމަށް އަބަންކޯއިން ވަނީ އެދިފައެވެ.
މީގެ އިތުރުން އާބަންކޯއިން ބުނީ ހުޅުމާލެ ފޭސް-2 ހިޔާ ފްލެޓް 12 ކައިރި ބީޗް ސަރަހައްދަށްވާ ގޮތަށް އޮންނަ ހުސްބިމުގައި ހަދާފައިވާ ހަޓުތަކާއި ތަކެތި 16 ނޮވެންބަރު 2023 ވަނަ ދުވަހުން ފެށިގެން 25 ނޮވެންބަރު 2023 ގެ ނިޔަލަށް ނަގާ އެ ސަރަހައްދު ސާފުކުރަންޖެހޭ ކަމަށެވެ.
ދެވިފައިވާ މުއްދަތުގައި ތަކެތި ނަގާފައިނުވާނަމަ މިތަކެތި ނަގައި މި ސަރަހައްދުތައް ސާފުކުރުމުގެ މަސައްކަތް ކުރާނެ ކަމަށް އާބަންކޯއިން ބުނެއެވެ. އަދި އާބަންކޯއިން ބުނީ ސާފުކުރުމުގެ ތެރޭގައި އެއްވެސް މުދަލަކަށް ލިބޭ ގެއްލުމަކަށް އެ ކޯޕަރޭޝަނުން ޒިންމާ ނުވާނެ ކަމަށެވެ.
ދޭތެރެދޭތެރެއިން ހުޅުމާލޭގެ ހުސްބިންތަކުގައި ދިވެހިންނާއި ބިދޭސީން ހިމެނޭހެން ހުސް ޤަވާއިދާ ޚިލާފަށް ވިޔަފާރި ކުރާ މައްސަލަ ބޮޑުވެގެން ދެއެވެ.
