އަދީބާއި ޒިޔަތުގެ އަދަބު ލުއިކޮށްދެއްވުމާ ގުޅިގެން، އެޗްއާރްސީއެމްއިން އެދުނީ ގާނޫނު ބަދަލުކުރަން

އެމްއެމްޕީއާރްސީގެ ޚިޔާނާތުގެ މައްސަލާގައި ދައުވާ ލިބި، ޖަލު ހުކުމެއް ތަންފީޒުކުރައްވަމުން ގެންދެވި ކުރީގެ ނައިބު ރައީސް އަހުމަދު އަދީބާއި އެމްއެމްޕީއާރްސީގެ އޭރުގެ މެނޭޖިންގ ޑިރެކްޓަރު އަބްދުﷲ ޒިޔަތަށް މައާފުދެއްވި މައްސަލާގައި، ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް)އިން ކަންބޮޑުވުން ފާޅުކޮށްފިއެވެ.

އެޗްއާރްސީއެމްއިން ބުދަ ދުވަހު ނެރުނު ބަޔާނެއްގައި ބުނީ، ކުށުގެ ބާވަތަށް ރިއާޔަތްކުރުމުއްނެތި، ކުށުގެ އަދަބަށް ކަނޑައަޅާފައިވާ މުއްދަތުގެ ހަތަރުބައިކުޅަ އެއްބައި ތަންފީޒުވެ ނިމިފައިވާ ފަރާތްތަކުގެ އަދަބު ލުއިކޮށްދިނުމުގެ ބާރު ލިބިދީފައިވަނީ ޖިނާއީ ބޮޑެތި ކުށްތަކަށް އަދަބު ކަނޑައަޅާފައިވާ މަގުސަދު ހާސިލްކުުރުމަށް ހުރަސްއެޅޭ ގޮތަށް ކަމަށެވެ.

އަދި އެ ބަޔާނުގައި ބުނީ، ބޮޑެތި ކުށްކުރާ ފަރާތްތަކާއި ކުދި ކުށްތަކުގައި ކުށް ސާބިތުވާ ފަރާތްތަކަށް މައާފުދިނުމާއި އަދަބު ލުއިކޮށްދިނުމުގެ ގާނޫނުގެ ދަށުން، އެ ފުރުސަތު އެއް ހަމައަކުން ލިބިދީފައިވުމަކީ ކްލެމެންސީ ދިނުމުގައި އެންމެ އިންސާފުވެރި ގޮތް ނޫންކަމަށެވެ.

އެހެންކަމުން، އެ މަގުސަދު ހާސިލްކުރުމަށްޓަކައި، މައާފުދިނުމާއި އަދަބު ލުއިކޮށްދިނުމުގެ ގާނޫނު ވީ އެންމެ އަވަހަކަށް އިސްލާހުކުރުމަކީ ކޮންމެހެން ބޭނުންތެރިކަމެއް ކަމަށް އެ ކޮމިޝަނުން ބުނެއެވެ.

އަދީބާއި ޒިޔަތަށްވެސް މައާފު ދެއްވާފައިވަނީ މިދިޔަ ހޯމަ ދުވަހުއެވެ. ޕެރޯލް ގާނޫނުގެ ދަށުން ރައީސުލްޖުމްހޫރިއްޔާއަށް ލިބިދޭ ބާރުގެ ދަށުން އެ ދެ މީހުންނަށް މައާފު ދެއްވާފައިވާއިރު، އެ ދެ ބޭފުޅުންނަށް މައާފު ދެއްވާފައިވަނީވެސް، ގޭބަންދަށް ބަދަލުކޮށްފައި ވަނިކޮށެވެ.

އެމްއެމްޕީއާރްސީގެ ކޮރަޕްޝަން މައްސަލާގައި އަދީބަށް 20 އަހަރުގެ ޖަލު ހުކުމެއް އިއްވައި، ދެ މިލިއަން ރުފިޔާއިން ޖޫރިމަނާކުރީ 2020 ވަނަ އަހަރުއެވެ. އެކަމަކު ދައުލަތާއެކު އަދީބު ހެއްދެވި އިއުތިރާފު އެއްބަސްވުމާއެކު، އެ ހުކުމަށްފަހު އަދީބު ޖަލު ބަންދުން ގޭބަންދަށް ބަދަލުކުރީ ސިއްހީ ހާލުކޮޅު ހުރިގޮތުން ކަމަށް ބުނެއެވެ.

އަދި ޒިޔަތުގެ މައްޗަށްވެސް، ދައުލަތަށް ލިބެންޖެހޭ ބޮޑެތި ފައިސާގެ އަދަދުތަކަށް ޒިޔަތު ޚިޔާނާތްތެރިވެވަޑައިގަތް ކަމަށް ސާބިތުވެފައިވާއިރު، އޭރު އިއްވާފައިވާ ހުކުމްތަކަށް ބޮޑު ލުޔެއް ދީފައިވަނީ، އެމްއެމްޕީއާރުސީގެ ޚިޔާނާތުގެ މައްސަލަތައް ތަހުގީގުކުރުމަށް އޭނާގެ ފަރާތުން އެއްބާރުލުން ދެއްވުމާއި ކުށަށް އިއުތިރާފް ވެވަޑައިގަތުމުގެ އެއްބަސްވުމުގެ ދަށުންނެވެ.

އަދަބު ލުއިކޮށްދިންއިރު، އެމްއެމްޕީއާރްސީ ޚިޔާނާތާ ގުޅިގެން އިއްވާފައިވާ ގިނަ ދައުވާތަކެއް ސާބިތުވެ، ޒިޔަތު ގެންދެވީ ޖުމްލަ 21 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ.