ވޮކޭޝަނަލް އެޑިޔުކޭޝަނަށް ޚާއްސަކޮށްގެން އަމީނިއްޔާ ސްކޫލުގައި ގާއިމްކުރި ލެބް ހުޅުވައިފި

ސްކޫލުތަކުގައި ވޮކޭޝަނަލް އެޑިޔުކޭޝަންގެ ތައުލީމު ދިނުމަށް ގާއިމުކުރާ ލެބްތަކުގެ ތެރެއިން އަމީނިއްޔާ ސްކޫލުގައި ގާއިމުކުރި ލެބް ހުޅުވައިފިއެވެ.

ބުދަ ދުވަހު މި ލެބް ހުޅުއްވައިދެއްވީ، އެޑިއުކޭޝަން މިނިސްޓަރު ޑރ. އާއިޝަތު އަލީއެވެ. މިނިސްޓަރު ވަނީ މި ލެބް ބައްލަވާލައްވައި، ދަރިވަރުން ކުރަމުންދާ މަސައްކަތްތައް ފާހަގަކުރައްވައި އެ ދަރިވަރުންނާ ވާހަކަދައްކަވާފައެވެ.

ސްކޫލުތަކުގައި ވޮކޭޝަނަލް އެޑިޔުކޭޝަންގެ ތައުލީމު ދިނުމަށް ގާއިމުކުރާ ލެބްތަކުގެ ތެރެއިން އަމީނިއްޔާ ސްކޫލުގައި ގާއިމުކުރި ލެބާއެކު، ކުދިންނަށް އިތުރު ކުރިއެރުން ލިބޭނެކަމަށް މިނިސްޓްރީން ބުނެއެވެ.

ރާއްޖޭގެ ހުރިހާ އަތޮޅުތަކެއް ހިމެނޭހެން 28 ސްކޫލެއްގައި މަސައްކަތްތެރިކަމުގެ ތައުލީމު ދަސްކޮށްދޭ ލެބްތައް ގާއިމުކުރުމަށް ވަނީ ހަމަޖެހިފައެވެ. އެގޮތުން މިހާރު 5 ސްކޫލެއްގައި ލެބް ގާއިމްކުރެވިފައި ވާކަމަށް އެޑިޔުކޭޝަން މިނިސްޓްރީން ބުނެއެވެ.

މި ލެބްތަކުގެ އެހީގައި، ދަރިވަރުން އާންމު ދިރިއުޅުމަށް ބޭނުންވާ މުހިންމު ހުނަރުތައް ކަމަށްވާ؛ ކެއްކުމާއި، ފެހުމާއި، ވަޑާންކުރުމުގެ މަސައްކަތުގެ އިތުރުން އާރޓް އެންޑް ކްރާފްޓުގެ މަސައްކަތް ދަސްކޮށްދެވޭނެ ކަމަށް އެޑިއުކޭޝަން މިނިސްޓްރީން ބުނެއެވެ. އަދި ދަރިވަރުންގެ ފަންނީ ހުނަރުތަކުގެ އިތުރުން، އުފެއްދުންތެރި ވިސްނުމާއި، ދިރިއުޅުމުގައި ދިމާވާ ކަންކަން ހައްލުކުރުމުގެ ހުނަރުތައް ދަސްވުމާއެކު، މުސްތަގުބަލުގައި ހުނަރުވެރި، ތައުލީމީ ޖީލެއް ބައްޓަންކުރުމަށް މަގުފަހިވެގެންދާނެ ކަމަށްވެސް އެ މިނިސްޓްރީން ބުނެއެވެ.

ވޮކޭޝަނަލް އެޑިޔުކޭޝަން ޖެނެރަލް ލެބްގެ އިތުރުން، ވަކިވަކި ހުނަރުތައް ދަސްކޮށްދިނުމަށް ޚާއްސަ ލެބްތައް ވެސް ދަނީ ގާއިމްކުރަމުންނެވެ. މީގެ ތެރޭގައި އެއަރކޮންޑިޝަން މަރާމާތުކުރުމުގެ މަސައްކަތް ދަސްކޮށްދޭ ލެބްތަކާއި، އިލެކްޓްރޯނިކް މަސައްކަތާއި ވަޑާމުގެ މަސައްކަތްތަކަށް ޚާއްސަ ލެބްތައް ހިމެނެއެވެ.

ވޮކޭޝަނަލް އެޑިއުކޭޝަން ކިޔަވައިދޭނީ، މިހާރުގެ މަންހަޖުގައި ކިޔަވައިދޭ މާއްދާތަކަށް މަސައްކަތްތެރިކަމާއި ހުނަރުގެ ބައިތައް އެއްކޮށްގެން، ދަރިވަރުންގެ ޝައުގުވެރިވާ ގޮތައް ކަމަށް މިނިސްޓްރީން ބުނެއެވެ.