މަސްތުވާތަކެތި ކަމަށް ބެލެވޭ އެއްޗިއްސާއެކު ހައްޔަރުކުރި ފިރިހެނަކު، ޝަރުތުތަކާއެކު ދޫކޮށްލައިފި
15 ނޮވެމްބަރު 2023 | ބުދަ 11:29ހައްޔަރުކޮށްފައިވަނީ 32 އަހަރުގެ ފިރިހެނެއް
ކްރިމިނަލް ކޯޓް
މަސްތުވާތަކެތި ކަމަށް ބެލެވޭ އެއްޗިއްސާއެކު ހައްޔަރުކުރި ދިވެހި ފިރިހެނަކު، ޝަރުތުތަކާއެކު ކޯޓުން ދޫކޮށްލައިފިއެވެ.
ފުލުހުން ބުނީ މާލޭގައި އަންގާރަ ދުވަހުގެ ރޭ ހިންގި އޮޕަރޭޝަނެއްގައި، ކޯޓު އަމުރެއްގެ ދަށުން ގެއެއް ބަލައި ފާސްކޮށް، 32 އަހަރުގެ ފިރިހެނެއް ހައްޔަރުކޮށްފައި ވާކަމަށެވެ. އަދި އެ ގެ ބަލައި ފާސްކުރިއިރު، މަސްތުވާތަކެތި ކަމަށް ބެލެވޭ އެއްޗެއް އެއްކޮށްފައިހުރި 3 ބިޑިއާއި، މަސްތުވާތަކެތި ކަމަށް ބެލެވޭ އެއްޗެއް ހުރި ސެލޯފިންކޮޅެއް ފެނިފައިވާކަމަށެވެ.
މީގެ އިތުރުން ފުލުހުން ބުނީ، މިމައްސަލައާ ގުޅިގެން އޭނާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ބުދަ ދުވަހު ހާޒިރުކުރުމުން، ކޯޓުން ޝަރުތުކުރުމަށްފަހު ވަނީ ދޫކޮށްލާފައި ކަމަށެވެ.
މިމައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
