ޔޫނިއަން ބާލިންގެ ކޯޗު މަގާމުން ވަކިކޮށްފި
ބާލިން އިން މި ނިންމުން ނިންމަން ޖެހުނީ، މޮޅެއް ނުހޯދި އެ ކުލަބުން 14 މެޗު ނިންމާލަން ޖެހުމާއެކު
ޔޫނިއަން ބާލިންގެ ކޯޗަކަށް ހުރި އާސް ފިޝާ
ޖަރުމަނު ލީގުގެ ޔޫނިއަން ބާލިންގެ ކޯޗުކަމުގެ މަގާމުން ސްވިޒަލެންޑުގެ އާސް ފިޝާ ވަކިކޮށްފި އެވެ.
ޔޫނިއަން ބާލިންގެ ކޯޗުކަމުން ފިޝާ ވަކި ކުރަން ނިންމާފައިވާކަން އެ ކުލަބުން ވަނީ ރަސްމީކޮށް އިއުލާން ކޮށްފަ އެވެ. އެގޮތުން އެ ކުލަބުން ހާމަކޮށްފައިވާ ގޮތުގައި އޭނާ މަގާމުން ވަކި ކުރަން ނިންމީ، ދެ ފަރާތުގެ ދެމެދުގައި ކުރިއަށް ގެންދިޔަ މަޝްވަރާތަކަށްފަހު، ދެ ފަރާތް އެއްބަސްވީ ގޮތުގެ މަތިންނެވެ. ބާލިންގެ ކޯޗުކަމުން ފިޝާ ވަކި ކުރަން އެ ކުލަބުން ނިންމީ، އޭނާގެ އިރުޝާދުގެ ދަށުން މި ސީޒަންގައި އެ ކުލަބަށް އެކަށީގެންވާ ނަތީޖާއެއް ނުނެރެވޭތީ އެވެ.
ބާލިން އިން މި ނިންމުން ނިންމަން ޖެހުނީ، މޮޅެއް ނުހޯދި އެ ކުލަބުން 14 މެޗު ނިންމާލަން ޖެހުމާއެކު އެވެ. ޖަރުމަނު ލީގުގައި އެންމެ ފަހުން ބަޔާ ލެވަކޫސަންއާ ދެކޮޅަށް ކުޅުނު މެޗުން ވެސް އެ ޓީމު ވަނީ ބަލިވެފަ އެވެ. މިވަގުތު އެ ޓީމު އޮތީ ވެސް ހަ ޕޮއިންޓާއެކު ޖަރުމަނު ލީގު ތާވަލްގެ އެންމެ ފުލުގަ އެވެ. އޭނާ ވަކި ކުރުމަށްފަހު، ބާލިން އިން އަންނަނީ އައު ކޯޗެއް ހޯދުމުގެ މަސައްކަތް ކުރަމުންނެވެ. ދެން އެ ކުލަބަށް ހަމަޖައްސާ ކޯޗުގެ އެންމެ ބޮޑު ޒިންމާ އަކަށް ވާނީ ރެލިގޭޝަން ޒޯނުން އެ ކުލަބު ސަލާމަތް ކުރުމެވެ.
ބާލިންގެ ކޯޗުކަމާ ފިޝާ ހަވާލުވީ 2018 ވަނަ އަހަރުގެ ޖުލައި މަހު އެވެ. އޭނާގެ އިރުޝާދުގެ ދަށުން އެ ކުލަބުން ވަނީ ރަނގަޅު ނަތީޖާތަކެއް ވެސް ނެރެފަ އެވެ. މިދިޔަ ސީޒަންގެ ޖަރުމަނު ލީގު އެ ކުލަބުން ނިންމާލީ ހަތަރު ވަނައިގަ އެވެ. މިއީ އެކުލަބުގެ ތާރީޚުގައި ވެސް ޖަރުމަނު ލީގުގައި ހޯދުނު އެންމެ ބޮޑު ކާމިޔާބީ އެވެ.
