ފެނަކަ ކޯޕަރޭޝަންގެ އެމްޑީ، މަގާމުން އިސްތިއުފާ ދެއްވަނީ
އިސްތިއުފާ ދެއްވާނީ 17 ނޮވެމްބަރުން ފެށިގެން
ފެނަކަ ކޯޕަރޭޝަންގެ މެނޭޖިންގ ޑިރެކްޓަރު، އަހްމަދު ސައީދު މުހައްމަދު
ފެނަކަ ކޯޕަރޭޝަންގެ މެނޭޖިންގ ޑިރެކްޓަރު އަހްމަދު ސައީދު މުހައްމަދު، މަގާމުން އިސްތިއުފާދެއްވަން ނިންމަވައިފިއެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުގެ ރައީސަށް ފޮނުއްވި ސިޓީފުޅުގައި ސައީދު ވިދާޅުވީ، ފެނަކަ މެނޭޖިންގ ޑިރެކްޓަރުގެ މަގާމާއި ބޯޑު ޑިރެކްޓަރުގެ މަގާމުގައި އިތުރަށް ހުންނަވަން ބޭނުންފުޅުނުވާތީ، 17 ނޮވެމްބަރުން ފެށިގެން އިސްތިއުފާދެއްވަން ބޭނުންފުޅުވާ ކަމަށެވެ.
ފެނަކަ ކޯޕަރޭޝަންގެ މެނޭޖިންގ ޑިރެކްޓަރގެ މަގާމަށް ގދ. ވާދޫ، މައިފޫނާ، އަހްމަދު ސައީދު މުހައްމަދު ހަމަޖެއްސެވީ 16 ޑިސެންބަރ 2018ގައެވެ.
ސައީދު މަގާމުން އިސްތިއުފާދެއްވަން ނިންމަވާފައިވާއިރު، ފެނަކަ ކޯޕަރޭޝަނުން ކޮރަޕްޝަނަށް މަގުފައިވާގޮތަށް އަމަލުކުރާކަމަށް ބުނެ ފަތުރަމުންދާ ޚަބަރުތައް އެ ކުންފުނިން ވަނީ ދޮގުކޮށްފައެވެ.
ފެނަކައިން 100 މިލިއަން ރުފިޔާއާ ގާތްކުރާ ކޮރަޕްޝަނެއް ހިންގާކަމަށް ދިޔަރެސް ނޫހުން އާންމުކޮށްފައިވާ ޚަބަރާ ގުޅިގެން ނެރުނު ބަޔާނެއްގައި އެ ކުންފުނިން ބުނީ، އެއީ އެއްވެސް އަސާސެއް ނެތް، ދޮގު ވާހަކަތަކެއް ކަމަށެވެ. އެ ވާހަކަތައް ފަތުރަނީ ފެނަކައިގެ މިހާރުގެ މެނޭޖްމަންޓުން ކުންފުންޏަށް ހޯދައިދީފައިވާ ކުރިއެރުންތަކާއި ކާމިޔާބީތަކަށް ހަސަދަވެރި ނިޔަތެއް އޮވެގެން ކަމަށް ވެސް ބުނެފައިވެއެވެ.
މީގެ އިތުރުން އެއީ ކުންފުނީގެ ނަން ކިލަނބުކޮށް، ކުންފުނީގެ މެނޭޖްމަންޓާއި މުވައްޒަފުންގެ އަގު ވައްޓާލުމަށް، އެއްވެސް ޒިންމާދާރުކަމެއްނެތި ރޭވުމެއްގެ ތެރެއިން ފަތުރާ ވާހަކަތައް ކަމަށްވެސް ފެނަކައިން ބުންޏެވެ.
ރާއްޖޭގެ އެންމެ ގިނަ ރަށުގައި ފެނާއި ނަރުދަމާގެ ނިޒާމުތައް ހިންގައި ބަލަހައްޓަމުންދާ ކުންފުންޏަކީ ފެނަކަ ކަމަށްވާއިރު، އެ ކުންފުނިން އަންނަނީ ރާއްޖޭގެ އެކި ރަށްތަކުގެ އިންޖީނުގެތައް ޒަމާނީ ފެންވަރަށް އަޕްގްރޭޑް ކުރުމަށް ވެސް މަސައްކަތް ކުރަމުންނެވެ.
ފެނަކައިން ކުރަމުންދާ މަސައްކަތްތަކަށް ބައިނަލްއަގުވާމީ ގިނަ އެވޯޑުތަކެއްވެސް ވަނީ ލިބިފައެވެ. މީގެތެރޭގައި އެ ކުންފުނީގެ ޕްރޮޖެކްޓުތަކަށް ލިބުނު އެވޯޑުތަކާއި، އެ ކުންފުނީގެ އެމްޑީ އަހުމަދު ސައީދުއަށް ލިބިވަޑައިގަތް އެވޯޑުވެސް ހިމެނެއެވެ.
