ސޮފްވާންއާއި ޝުޢައިބު އަބަދުވެސް ކުޅުންތެރިން އުފެއްދުމުގައި!

މާލޭގައި ޔޫތު މުބާރާތެއް ކުރިއަށްދާނަމަ އެއިން ޓީމެއްގެ ކޯޗަކަށް ޝުއައިބު އާއި ސޮފްވާން ވެސް ހުންނާނެއެވެ. ކޮލެޖް ޔުނިވަރސިޓީއެއްގެ އެތެރޭގެ މުބާރާތެއް ނަމަ އެއީ ކޮންމެވެސް އެއް ފެކަލްޓީއެއްގެ ޓީމް ބައްޓަން ކުރާ ކޯޗުންނެވެ. ރަށެއްގައި މުބާރާތެއް ކުރިއަށް ދާނަމަ އެއިން ޓީމެއްގެ ކޯޗަކަށްވެސް މިއިން މީހަކު ނުހުރެ ނުދާނެއެވެ. އަތޮޅު މުބާރާތެއް ނަމަ އެމުބާރާތުގައި ވާދަކުރާ ކޮންމެވެސް ރަށެއްގެ ޓީމް ތަމްރީނުކުރަން އެރަށެއްގައި ހުންނާނެއެވެ. މިއީ ވޮލީބޯޅަ ކޯޗު ޝުއައިބު އަހުމަދާއި ސޮފްވާންގެ ޝައުޤާއި ގުޅިފައިވާ މަސައްކަތެކެވެ.

މި ދެކޯޗުންނަކީ ވެސް ޒުވާން ކުޅުންތެރިންނަށް އެހީވާ, އެކުޅުންތެރިންގެ ހުނަރު ތަރައްޤީކޮށް އެހެން ކޯޗުންނަށް ދައްކާ ކޯޗުންނެވެ. ސީނިއަރ ލެވެލް އަށް ކުޅުންތެރިން ތައްޔާރުކޮށް ފުރުޞަތު ހޯދައިދޭ ކޯޗުންނެވެ. އިންޓަރ ސްކޫލް މުބާރާތްތަކާއި ޔޫތް މުބާރާތްތަކުގައި އެންމެ ފަރިތަ ކޯޗުންނެވެ. ހަގީގަތުގައި މިއީ އެ ދެ ކޯޗުންނަށް ޝުކުރު ހައްގު މަސައްކަތެކެވެ.

މިއީ ކުރާނެ އެހެން މަސައްކަތެއް ނެތިގެން, އެހެން ފުރުޞަތެއް ނުލިބިގެން އެ ކޯޗުން ކުރާ މަސައްކަތެއް ނޫނެވެ. އެކަމަކު ފާއިތުވި ވިއްސަކަށް އަހަރުވެސް ސޮފްވާންއާއި ޝުއައިބު ދިވެހި ވޮލީގައި ޝައުޤުވެރިކަމާއެކު ކުރަމުންދާ މަސައްކަތަކީ ޒުވާން ކުޅުންތެރިންގެ ހުނަރު ދެނެގަނެ, ހުނަރު ތަރައްޤީ ކޮށްދިނުމެވެ. ވޮލީގެ އައު ޖީލެއް ދެމިގެންދާނެ ގޮތަށް މަސައްކަތް ކޮށްދިނުމެވެ.

ސޮފްވާންގެ ވާހަކައާއި ޝުއައިބުގެ ވާހަކައިގައި ވެސް ތަފާތެއް ނެތެވެ. ހުރީ ވާހަކަ ދެއްކުމާއި, ފާޅުކުރުމުގައި ހުރި ތަފާތެކެވެ. ދެ ކޯޗުންގެވެސް ވިސްނުމާއި, ޝައުޤާއި, މިކަމުގައި ދެމިތިބި ސަބަބު ހަމަ އެއްގޮތެވެ. ވޮލީބޯޅަ އަށް ޚިދުމަތް ކުރުމުގެ ޝައުޤާއި, އައު ޖީލެއް ބިނާކުރުމުގައި އެހީވެދީގެން ލިބޭ އުފަލަކާއި ހިތްހަމަޖެހުމެއް ނޫނީ ނުވެސް ލިބެއެވެ.

މި މުހިއްމު މަސައްކަތުގައި ދެ ކޯޗުންނަށްވެސް އޮތީ އެއް ގޮންޖެހުމެކެވެ. ވަޞީލަތްތައް ނެތުމެވެ. ރަސްމީ ފަރާތްތަކުގެ އެކަށީގެންވާ އެހީތެރިކަން ނެތުމާއި, ފުރުޞަތު ފަހިކޮށް ނުދިނުމެވެ. ޑިވެލޮޕްމަންޓަށް މަސައްކަތްކުރާނެ މާހައުލެއް ހަގީގަތުގައި ނެތެވެ. ޕްރެކްޓިސް ކުރާނެ ތަނެއް ނެތެވެ. އެހެން ފަރާތެއްގެ އެހީތެރިކަން ނުލިބުނަސް, ލިބެން އޮތް ވަޞީލަތެއް ލިބެން އޮތް މިންވަރަކަށް ބޭނުންކޮށްގެންވެސް ވޮލީބޯޅައިގެ އައު ޖީލެއް ބިނާކުރުން މަތީ ދެމިތިބުމަކީ ދެކޯޗުންގެ ވެސް އަޒުމެވެ. އެކަމުގައި ދެ ކޯޗުންނަށްވެސް ލިބޭ ބޮޑު ހިތްހަމަޖެހުމަކީ އަދި އުޖޫރަ އަކީވެސް އެމީހުންގެ އެހީތެރިކަން ލިބިގެން ސީނިއަރ ލެވެލް އަށް ދިޔަ ކުޅުންތެރިން އެ ކޯޗުންގެ އަގު ވަޒަން ކުރުމެވެ. ގައުމީ ޖަރޒީގައި އެކުޅުންތެރިން ކުޅުމެވެ.

ދާއިމީކޮށް ޕްރެކްޓިސް ކުރާނެ ވަޞީލަތްތައް މަދަސް, ޖޫނިއަރ ކުޅުންތެރިން އުފައްދަން ކުރާ މަސައްކަތުގެ ނަތީޖާ ހޯދުމަށް ދާއިމީ ގޮތެއްގައި މުބާރާތްތައް ބޭއްވުން މުހިއްމެވެ. ޔޫތު ޗެމްޕިއަންޝިޕާއި, އިންޓަރ ސްކޫލް މުބާރާތްތައް ދާއިމީ ކޮށް ނުބޭއްވުމަކީ އެ މަސައްކަތުގައި އޮތް ގޮންޖެހުމެކެވެ. ކުޅުންތެރިން ސީނިއަރ ލެވެލް އަށް ދިއުމުގެ މަރުހަލާގައި ވާދަކޮށްލާނެ ވާދެވެރި މުބާރާތްތަކުގެ ޔަޤީންކަމެއް ނެތެވެ.

ކުޅުންތެރިން ބިނާކުރުން މިއީ ދުނިޔޭގެ ހުރިހާތަނެއްގައިވެސް އެންމެ ބޮޑަށް އިސްކަންދޭ އެއް ދާއިރާ އެވެ. ނަމަވެސް ރައްޖޭގައި އެކަމަށް ސަމާލުކަން ނުދެވޭކަން ދެ ކޯޗުންވެސް ފާހަގަކުރެއެވެ. އެންމެ ފަހުން އިންޓަރ ސްކޫލް މުބާރާތް ބޭއްވުނީވެސް މެދުކެނޑުމަކަށް ފަހުއެވެ. ދެ ކޯޗުން ދެކެނީ ސްކޫލްތަކުގެ އަތޮޅު މުބާރާތެއްވެސް މުހިއްމު ކަމަށެވެ. އަތޮޅު ތެރޭގައި އިތުރު މުބާރާތްތައްވެސް ބާއްވަން ޖެހޭ ކަމަށެވެ. ރަށް ރަށުގެ ކައުންސިލްތަކާއި, އަތޮޅު ކައުންސިލްތަކާއި, ކްލަބް ޖަމްއިއްޔާތަކުން ރަށްރަށުގައި އެކި ފަންތީގެ މުބާރާތްތައް ބާއްވައެވެ. އެފަދަ މުބާރާތްތަކުގައި ވެސް ދެ ކޯޗުން އެހީވެއެވެ. އެކަމަކު ލިބޭ ފުރުޞަތާއި, އަތޮޅުތަކުން ޑިމާންޑް އޮންނަ މިންވަރަށް ބަލާއިރު އަތޮޅުތަކުގައި ގާއިމްވެ ތިބެ އެންމެ އެދެވޭ މިންވަރަށް މަސައްކަތްކުރަން ވަގުތު ނުދެވޭކަން ދެ ކޯޗުންވެސް ފާހަގަކުރިއެވެ.

ހުރި ގޮންޖެހުންތަކާއި, ހުރަސްތަކާއެކުވެސް ކުޅުންތެރިން ބިނާކޮށް, ވޮލީގެ ޖީލެއް އަބަދުވެސް ދެމިގެން ދިއުމަށް ކޯޗު ސޮފްވާންއާއި, ޝުއައިބު ކުރަމުންދަނީ ތައުރީފް ހައްގު މަސައްކަތެކެވެ. އެ މަސައްކަތަށް ޝުކުރު އަދާކުރުމާއެކު އިތުރު ފުރުޞަތުތައް ފަހިކޮށްދީ, މަގު ތަނަވަސްކޮށްދޭން ޖެހެއެވެ. މިއީ ވޮލީބޯޅަ އެސޯސިއޭބަންގެ ދެން އަންނަން އޮތް އެކްސްކޯއިން އިތުރަށް ސަމާލުކަން ދޭންޖެހޭނެ ކަމެއް ކަމެކެވެ.