ނަޕޯލީގެ ކޯޗުކަމުން ގާސިއާ ވަކިކޮށްފި

އިޓާލިއަން ލީގުގެ ނަޕޯލީގެ ކޯޗުކަމުން ފްރާންސްގެ ރޫޑީ ގާސިއާ ވަކިކޮށްފި އެވެ.

ނަޕޯލީން އެ ޓީމުގެ ކޯޗުކަމުން ގާސިއާ ވަކިކޮށްފައި ވަނީ އެ ޓީމުގެ ނަތީޖާތައް ދަށްވުމުންނެވެ. އެންމެ ފަހުން އިޓާލިއަން ލީގުގައި އަމިއްލަ ދަނޑުގައި އެމްޕޮލީއާ ދެކޮޅަށް ކުޅުނު މެޗުން ވެސް ނަޕޯލީ ވަނީ ބަލިވެފަ އެވެ. މީގެ ކުރިން ވެސް ޕްރެޝަރު ބޮޑުވެފައިވާ ގާސިއާ ހޫނު ފެނަށް ވެއްޓުނީ އެ މެޗަށްފަހު އެވެ. އެމްޕޮލީ އަތުން ނަޕޯލީ ބަލިވި މެޗުގެ ފަހު ކަށިގަނޑު ރެފްރީ ފުމުމުގެ ކުރިން އެ ކުލަބުގެ ރައީސް އައުރެލިއޯ ޑީ ލައުރެންޓިސް ވަނީ ދަނޑު ދޫކޮށް ވަޑައިގެންފަ އެވެ.

އެ މެޗަށްފަހު ނަޕޯލީގެ އިސްވެރިން ވަނީ ކުއްލި ބައްދަލުވުންތަކެއް ވެސް ބާއްވައިފަ އެވެ. އަދި އެއަށްފަހު ކުލަބުގެ އިސްވެރިން ވަނީ ގާސިއާއާ ވަކި ބައްދަލުކޮށްފަ އެވެ. އެއާއެކު ނަޕޯލީން ގާސިއާ ވަކި ކުރާނެ ކަމުގެ އަޑުތައް މީގެ ކުރިން ވެސް ވަނީ ފެތުރިފަ އެވެ. ގާސިއާގެ އިރުޝާދުގެ ދަށުން ނަޕޯލީ ކުޅެފައި ވަނީ 16 މެޗެވެ. އޭގެ ތެރެއިން އެ ޓީމު މޮޅުވެފައި ވަނީ އަށް މެޗުންނެވެ. ހަތަރު މެޗުން ބަލިވެފައިވާއިރު، ހަތަރު މެޗުންް ވަނީ އެއްވަރުވެފަ އެވެ. ލީގުގައި މިހާތަނަށް ކުޅުނު 12 މެޗުން ލިބުނު 21 ޕޮއިންޓާއެކު ނަޕޯލީ އޮތީ ވެސް ހަތަރު ވަނައިގަ އެވެ.

ނަޕޯލީގެ ކޯޗުކަމާ ގާސިއާ ހަވާލުވީ ވެސް މިއަހަރުގެ ޖޫން މަހު އެވެ. އޭގެ ކުރިން އޭނާ ހުރީ ސައުދީ ޕްރޯ ލީގުގެ އަލް ނަސްރުގެ ކޯޗުކަމުގެ މަގާމުގަ އެވެ. އެ ކުލަބު ދޫކޮށް، ގާސިއާ ނަޕޯލީއާ ހަވާލުވީ ނަޕޯލީގެ ކޯޗު އެ ޓީމު ދޫކޮށްލުމުންނެވެ.