ފަންނުވެރިކަމާއި ހުނަރުވެރިކަމަކީ ތާ އަބަދުމެ 'ސީރިއަސް' މަސައްކަތްތަކަށް ޚާއްޞަ ވެފައި އޮންނަ ކަމެއް ނޫނެވެ. މަޖަލާއި ސަކަރާތުގެ ތެރޭގައިވެސް ފަންނުވެރިކަމާއި ހުނަރުވެރިކަމުގެ ބޭނުން ހެޔޮ ގޮތުގައި ހިފި ދާނެއެވެ. އެކަމުގެ އެންމެ ރީތި މިސާލެއް ދާދި މިދާކަށް ދުވަހު ފެނުނީ އާޖެންޓީނާއިންނެވެ. އާޖެންޓީނާގެ 'ފޮށިގަނޑު' ރޭހުގެ މައިދާނަކީ މި ދެންނެވި ފަދައިން، ފަންނުވެރި، ހުނަރުވެރިންގެ އާދަޔާ ޚިލާފު އީޖާދުތައް ފެނުނު މައިދާނެކެވެ.
އާޖެންޓީނާގެ ވެރިރަށް ބޮއެނަސް އައެރިސްގައި ނޮވެމްބަރު 12 ވަނަ ދުވަހު ކުރރިއަށް ގެންދިޔަ ފޮށިގަނޑު ކާރު ރޭސް ބަލާލުމަށް އެކަނިވެސް 30000 އެއްހާ މީހުން ޖަމާވިއެވެ.
ހުސް ފޮށިގަނޑުތައް ބޭނުންކޮށްގެން ތައްޔާރު ކޮށްފައި ވާ، ތަފާތު 30 ކާރެއް، ރޭސް ޓްރެކުން ފެނިގެން ދިޔައެވެ. އޭގެ ތެރޭގައި، ތާނގި ބުރިބުރިއާއި، ފާޚާނާ ތަށީގެ ބައްޓަމަށް ހަދާފައިވާ ފޮށިގަނޑު ކާރުތަކުގައި މީހުން ދުއްވާތީ ފެނުނެވެ.
އަހަރެމެންގެ ޓީމަށް ކިޔަނީ ހައި ސްޓޫ. އަހަރެމެންގެ ކާރު ފަރުމާ ކުރީ، އާޖެންޓީނާ ރަމްޒުވާ ގޮތަށް، ސޫޕް ތެއްޔެއްހެން. އެއީ، އަހަރެމެންގެ ސުފުރާތައް މަތިން އަބަދުވެސް ލިބެން ހުންނާނެ، ރަނގަޅު ފެންވަރު ސޫޕްތައް. އެހެންވެ.ޓޮބާޔާސް ހައިމޭ؛ ރޭހުގެ ބައިވެރިއެއް
ފޮށިގަނޑު ކާރު ރޭހުގެ ޓްރެކް ތައްޔާރު ކޮށްފައި އޮތީ އެކި ކަހަލަ ހުރަސްތަކާއި، ލެނބުންތަކާއި، ބަނޑިބަނޑިތައް ގިރާ ކޮށްގެން ނޫނީ ފުރިހަމަ ނުކުރެވޭ ސަރކިޓެއްގެ ގޮތުގައެވެ. މުބާރާތެއްގެ އުސޫލުން ކުރިއަށް ގެންދިޔަ ރޭހުގައި ބައިވެރި ކުރި ކާރުތަކަށް ވަނަ ދިނުމުގައި ބަލާފައި ވަނީ، އުފެއްދުމުގެ އަސްލު ވަންތަ ނުވަތަ އަމިއްލަ ވަންތަކަމަށާއި، ކާރުގެ ޕަރފޯމަންސްގެ އިތުރުން މުޅި ސަރކިޓް ފުރިހަމަ ކުރުމަށް ހޭދަވި ވަގުތަށެވެ.
ވަރަށް ހާސްވެ، ނުތަނަވަސްވެފަ މި ތިބީ އަހަރެމެން. ރޭ ހޭލާ ތިބިން މެންދަމުން އަލިވެ 1 ޖަހާލަންދެން. ކާރު ހަދާލަހަދާލާ. ހާސްވީ ރޭސް ޓްރެކް އޮންނާނެ ގޮތް ނޭނގޭތީ. ލެނބުންތަކާއި ބަނޑިތައް ހުންނާނެ ގޮތެއް ނޭނގޭތީ. އެކަމަކު، ވަރަށް އުފާވެރި ކަމެއް މީ.މިޝޭލް ޝްރޯޑަރ؛ ރޭސްޖަހާ މީހެއް
'ރެޑް ބުލް ކްރޭޒީ ކަރޒް ރޭސް'، އާޖެންޓީގައި ކުރިއަށް ގެންގޮސްފައި މި ވަނީ 10 އަހަރު ދުވަހުގެ މެދުކެނޑުކަމަށް ފަހުގައެވެ. 10 އަހަރަށް ފަހު ފުރަތަމަ ފަހަރަށް ކުރިއަށް ގެންދިޔާ ކާރު ރޭހުގައި 30 ޓީމަކުން ވާދަ ކުރި ކަމަށް، ރޭސް އިންތިޒާމު ކުރުމުގައި އުޅުނު ފަރާތްތަކުން ދިން ބަޔާނުގައި ވަނީ ބުނެފައެވެ.
މަށަކީ ދުއްވާ އެއްޗެއްސަށް ވަރަށް ލޯބި ކުރާ މީހެއް. ރޭސް އޮތްކަން އެނގުނީމަ، ދެވަނަ ވިސްނުމަކަށް ދާކަން ނުޖެހޭ އަހަރެމެންނަކަށް. ބޭބެ އަހައިފި ބައިވެރިވާނަންހޭ... މަ ބުނިން، ޔަޤީނެއްނޫންހޭ، އެކަމަކު މަށޭ ދުއްވާނީ. ދެން އަހަރެމެން އެންމެން ވެގެން ކާރު ފަރުމާކޮށް އުފެއްދީ. ވަރަށް ރަނގަޅަށް ރޭސް ދިޔައީ.ކެރިން ޝްރޯޑަރ؛ ރޭސްޖަހާ މީހެއް
މުބާރާތުގެ ފަޚްރުވެރި 1 ވަނަ މަޤާމު ގެންދިޔައީ އިހުގެ އެމްބިއުލާންސް އަސްލަކަށް ބަލައިގެން ފަރުމާކޮށްފައި އޮތް ކާރެކެވެ. އެ ކާރު، ރޭސް ނިންމާލީ، ރޭސް ފެށިތާ މިނެޓެއްވެސް ނުވަނީހެވެ.
