އެކްސް ގައި ކުރެއްވުނު ޕޯސްޓަކާ ގުޅިގެން އާޖެންޓިނާގެ ރައީސްގެ އިތުބާރު ނެތް ކަމަށް ހުށަހަޅާނެ ކަމަށް އިދިކޮޅު ފަރާތްތަކުން ބުނެފި

އެކްސް ގައި ކުރެއްވި ޕޯސްޓެއްގައި ކްރިޕްޓޯކަރަންސީ އެއް ޕްރޮމޯޓު ކުރެއްވިގެން އާޖެންޓީނާގެ ރައީސް ހާވިއަރ މިލެއީ ގެ އިއަށް އިތުބާރު ނެތްކަމަށް ހުށަހަޅާނެ ކަމަށް އެ ގައުމުގެ އިދިކޮޅު ފަރާތްތަކުން ބުނެފިއެވެ.

އާޖެންޓިނާގެ ރައީސްގެ މައްސަލަ ހޫނުވީ، މާ މަޝްހޫރު ނޫން ކްރިޕްޓޯކަރަންސީ އެއް ޕްރޮމޯޓު ކުރެއްވުމުގެ ގޮތުން ސޯޝަލް މީޑިއާގައި ކުރެއްވި ޕޯސްޓަކާ ގުޅިގެން އޭގެ އަގު ކުއްލި އަކަށް މައްޗަށް ގޮސް މަދު ވަގުތު ކޮޅެއްގެ ތެރޭގައި އަގުވެއްޓި އިންވެސްޓް ކުރި އެތައް ހާސް ފަރާތްތަކަށް ބޮޑު ގެއްލުމަކާ ކުރިމަތި ވުމާ ގުޅިގެންނެވެ.

މި ކަމާ ހެދި އާޖެންޓީނާގައި ސިޔާސީ ބޮޑު ހަމަ ނުޖެހުމެއް އުފެދިފައިވާއިރު، އިދިކޮޅު ފަރާތްތަކުން މިލެއީ އަށް ތުހުމަތު ކުރަނީ މަކަރުން ފައިސާ ހޯދުމަށް ހިންގި ހަރަކާތެއް ޕްރޮމޯޓް ކުރައްވަން މަސައްކަތް ކުރެއްވި ކަމަށެވެ. މި ތުހުމަތު ރިޔާސީ އޮފީހުން ދޮގުކޮށްފައިވެއެވެ.

މިކަން ފެށުނީ ރައީސް އެމަނިކުފާނުގެ އެކްސް އެކައުންޓުން ކުރެއްވި ޓްވީޓަކުންނެވެ. 3.8 މިލިއަނަށްވުރެ ގިނަ ފޮލޯވަރުން ތިބި މި އެކައުންޓުން ކުރެއްވި ޕޯސްޓުގައި. "މި އަމިއްލަ މަޝްރޫޢު އަމާޒު ކުރެވިފައި ވަނީ އާޖެންޓީނާގެ އިޤްތިޞާދު ކުރިއެރުވުމަށް ހިތްވަރުދިނުމަށެވެ،" އޭނާ ލިޔުއްވާފައިވެއެވެ. އަދި $LIBRA ކްރިޕްޓޯކަރަންސީ މަޝްރޫޢުގެ ލިންކެއްވެސް ހިމަނުއްވާފައިވެއެވެ.

ގަޑިއިރުތަކެއް ފަހުން، މިލެއީ އެ މެސެޖު ފޮހެލެއްވި އެވެ. އަދި އިތުރު ޕޯސްޓެއްގައި ވިދާޅުވީ، އޭނާ އާ އެ މަޝްރޫޢާ އެއްވެސް ގުޅުމެއް ނެތް ކަމަށެވެ. "އަޅުގަނޑަކަށް މަޝްރޫޢުގެ ތަފްސީލުތަކެއް ނޭނގެއެވެ. އަދި އެކަން އެނގުމާއެކު އެކަން އިތުރަށް ނުފެތުރުމަށް ނިންމީމެވެ،" އޭނާ ވިދާޅުވިއެވެ.

ސީއެންއެންގެ ސުވާލަކަށް ޖަވާބުދެމުން، މިލެއީގެ ޓީމުން މި ހާދިސާ ސިފަކޮށްފައިވަނީ މިސްޓޭކެއްގެ ގޮތުގައެވެ.

ހޮނިހިރު ދުވަހު ރިޔާސީ އޮފީހުން މިކަމާ ގުޅޭ ތަޙުޤީޤެއް ހިންގާނެކަން އިޢުލާނު ކޮށްފައި ވެއެވެ. "ރައީސް ހާވިއަރ މިލެއީ ވަނީ ވަގުތުން އެންޓި-ކޮރަޕްޝަން އޮފީސް މިކަމުގައި ބައިވެރި ކުރުމަށް ނިންމާފައެވެ. މިއީ މައި ސަރުކާރުގެ އެއްވެސް މެންބަރެއްގެ، ރައީސް ވެސް ހިމެނޭގޮތަށް، ނުރަނގަޅު ޢަމަލެއް ހިނގާފައިވޭތޯ ބެލުމަށެވެ."

މި ކްރިޕްޓޯކަރަންސީ ފެށުނު އިރު، އޭގެ ބޮޑު ބައެއް ހުރީ މަދު ޑިޖިޓަލް ވޮލެޓްތަކެއްގައެވެ. އަދި އޭގެ އަގު ހުރީ ގާތްގަނޑަކަށް ސުމެއްގައެވެ. ރައީސްގެ ޕޯސްޓަށްފަހު، އޭގެ އަގު ކުޑަ ވަގުތު ކޮޅެއްގެ ތެރޭގައި 5 ޑޮލަރާ ހަމައަށް މައްޗަށް ދިޔައެވެ.

ނަމަވެސް 3 ގަޑިއިރަށްވުރެ ކުރު ވަގުތުކޮޅެއްގެ ތެރޭގައި އޭގެ އަގު މަދު ސެންޓުތަކަކަށް ވެއްޓިފައިވާ ކަމަށް ރިޕޯޓުތައް ބުނެއެވެ.

މިލެއީ އާ ގާތް ފަރާތްތަކުން ވަނީ މިކަމާ ގުޅުވާފައި ރައީސްގެ އިތުބާރު ނެތް ކަމަށް ހުށަހަޅާނެ ފުރުސަތު ނުލިބޭނެ ކަމަށް ބުނެފައިވެއެވެ. އާޖެންޓިނާގެ ކޮންގްރެސް ގެ މެމްބަރު ޑިއޭގޯ ސަންޓިލީ ބުނެފައިވަނީ މިފަދަ ގޮވާލުންތަކަކީ ރައީސް ވެރިކަމުން "ވައްޓާލުމަށް" ކުރާ މަސައްކަތެއް ކަމަށެވެ.