ފީފާ ވޯލްޑް ކަޕް ކޮލިފިކޭޝަންގައި އާޖެންޓީނާ އިން ކުޅެން ޖެހޭ ދެ މެޗަށް އެކުލަވާލި ސްކޮޑު އިއުލާން ކުރި އިރު، ކެޕްޓަން ލިއޮނަލް މެސީ ޓީމުގައި ނުހިމަނަން ނިންމައިފި އެވެ.

ވޯލްޑް ކަޕް ކޮލިފިކޭޝަންގައި މި މަހު އާޖެންޓީނާ އިން ދެ މެޗު ކުޅޭނެ އެވެ. އެގޮތުން ފުރަތަމަ މެޗުގައި މި މަހުގެ 22 ވަނަ ދުވަހު ނިކުންނާނީ އުރުގުއޭއާ ދެކޮޅަށެވެ. އަދި ދެ ވަނަ މެޗުގައި މި މަހުގެ 26 ވަނަ ދުވަހު ނިކުންނާނީ ބްރެޒިލްއާ ދެކޮޅަށެވެ.

އެ ދެ މެޗަށް އާޖެންޓީނާގެ ކޯޗު ލިއޮނަލް ސްކަލޯނީ އެކުލަވާލި ސްކޮޑުން މެސީ އަށް ފުރުސަތު ދީފައެއް ނުވެ އެވެ. އެއީ މެސީ އަށް ލިބިފައިވާ އަނިޔާއެއްގެ ސަބަބުންނެވެ.

މެސީ އަށް އަނިޔާވެފައި ވަނީ މޭޖާ ލީގު ސޮކާ (އެމެރިކާ ލީގު) ގައި އިންޓަ މިއާމީން އެޓްލަންޓާ ޔުނައިޓެޑާ ދެކޮޅަށް ކުޅުނު މެޗުގަ އެވެ. ފައިގެ މަސްގަނޑަަށް ލިބުނު އެ އަނިޔާގެ ސަބަބުން، އަންގާރަ ދުވަހު މެސީގެ އިތުރު ޓެސްޓުތަކެއް ހެދުމަށް ވެސް ވަނީ ނިންމައިފަ އެވެ.

ކޮލިފިކޭޝަންގެ ދެކުނު އެމެރިކާ ސަރަހައްދުގެ އެއް ވަނައިގައި އޮތީ އާޖެންޓީނާ އެވެ. އެއީ މިހާތަނަށް އެ ޓީމު ކުޅެފައިވާ 12 މެޗުން 25 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ދެ ވަަނައިގައި އުރުގުއޭ އަށް ލިބެނީ 20 ޕޮއިންޓެވެ.

އެ ދެ މެޗުގައި މެސީ އަށް ނުކުޅެވޭއިރު، ދެން އެންމެ އަވަހަށް ވެސް އޭނާ ފެންނާނެ ކަމަށް ލަފާ ކުރެވެނީ މި މަހުގެ 30 ވަނަ ދުވަހު އެމެރިކާ ލީގުގައި މިއާމީން ފިލަޑެލްފިއާއާ ދެކޮޅަށް ކުޅޭ މެޗުގަ އެވެ. ނަމަވެސް، އެ މެޗުގައި ވެސް މެސީ ފެންނާނެކަން ޔަގީން ވާނީ އޭނާގެ އަނިޔާގެ ރިކަވަރީ ކުރިއަށްދާ ގޮތަކުންނެވެ.

މެސީ ވަނީ މިހާތަނަށް އާޖެންޓީނާ އަށް ކުޅެދިން 191 މެޗުގައި 119 ލަނޑު ޖަހައިފަ އެވެ. އާޖެންޓީނާ އިން 2022 ވަނަ އަހަރު ޤަތަރުގައި އޮތް ފީފާ ވޯލްޑް ކަޕް ކާމިޔާބު ކުރުމުގައި ވެސް އެންމެ އިސް ދައުރެއް އަދާ ކުރި އެއް ކުޅުންތެރިޔަކީ މެސީ އެވެ.