ޖަރުމަނު ލީގުގައި ޔޫނިއަން ބާލިންއާ ދެކޮޅަށް ކުޅުނު މެޗުން މޮޅުވެ، ބަޔާ ލެވަކޫސަން އަނެއްކާ ވެސް ލީގު ތާވަލްގެ އެއް ވަނަ އަށް ޖެހިލައިފި އެވެ.

ލީގުގައި ލެވަކޫސަންގެ އަމިއްލަ ދަނޑުގައި ބާލިންއާ ދެކޮޅަށް ކުޅުނު މެޗު އެ ޓީމު ކާމިޔާބު ކުރީ 4-0 އިންނެވެ. އެ މެޗަށް ނިކުތްއިރު، އެއް ވަނައިގައި އޮތީ އެންމެ ފަހުގެ ޗެމްޕިއަން ބަޔާން މިއުނިކް އެވެ. ނަމަވެސް މެޗުގެ އަދަދު ހަމަކޮށް، ލެވަކޫސަން ވަނީ އަނެއްްކާ ވެސް އެއް ވަނަ އަށް ޖެހިލައިފަ އެވެ.

މެޗުގެ ފުރަތަމަ ހާފުގެ 23 ވަނަ މިނެޓުގައި ލެވަކޫސަން އަށް ލީޑު ނަގައިދިނީ އެލެކްސް ގްރިމާލްޑޯ އެވެ. އޭނާ އެ ލަނޑު ޖެހީ ފްލޯރިއަން ވާޓްޒް ތަނަވަސްކޮށްދިން ފުރުސަތެއްގަ އެވެ. ލެވަކޫސަންގެ އަނެއް ތިން ލަނޑު ވެސް އެ ޓީމުން ޖެހީ ދެ ވަނަ ހާފުގަ އެވެ. ދެ ވަނަ ހާފު ފަށައިގެން، 12 ވަނަ މިނެޓުގައި ޖޯނަސް ހޮފްމަން ތަނަވަސްކޮށްދިން ފުރުސަތެއްގައި އެ ޓީމަށް ލީޑު ފުޅާ ކޮށްދިނީ އޮޑިލޮން ކަސޯނޯ އެވެ. ލެވަކޫސަންގެ ތިން ވަނަ ލަނޑު ޖޮނަތަން ޓާހް ޖެހީ ގްރިމާލްޑޯ ތަނަވަސްކޮށްދިން ފުރުސަތެއްގައި 73 ވަނަ މިނެޓުގަ އެވެ. އެ ޓީމުގެ ފަހު ލަނޑު 83 ވަނަ މިނެޓުގައި ޖެހީ ނަތަން ޓެލާ އެވެ. އޭނާ ލަނޑު ޖަހަން ފުރުސަތު ތަނަވަސްކޮށްދިނީ އަމީން އަދްލީ އެވެ.

މޮޅާއެކު ލެވަކޫސަނުން ވަނީ އެއް ވަނައިގައި ދެ ޕޮއިންޓުގެ ލީޑެއް ނަގައިފަ އެވެ. މިހާތަނަށް ކުޅުނު 11 މެޗުން އެ ޓީމަށް ލިބެނީ 31 ޕޮއިންޓެވެ. އޭގެ ތެރެއިން 10 މެޗުން އެ ޓީމު މޮޅުވެފައިވާއިރު، އެއް މެޗުން ވަނީ އެއްވަރުވެފަ އެވެ. މި ސީޒަންގެ ލީގުގެ އެއްވެސް މެޗަކުން ލެވަކޫސަން ބަލިވެފައެއް ނުވެ އެވެ.