އަމިއްލަ ދަނޑުގައި އެމްޕޮލީ އަތުންވީ ބައްޔާއެކު، ނަޕޯލީގެ ކޯޗު ރޫޑީ ގާސިއާ ހޫނު ފެނަށް ވެއްޓިއްޖެ އެވެ.
އިޓާލިއަން ލީގުގައި އަމިއްލަ ދަނޑުގައި އެމްޕޮލީ އަތުން އެންމެ ފަހުގެ ޗެމްޕިއަން ނަޕޯލީ ބަލިވީ 1-0 އިންނެވެ. އެއާއެކު، މި ސީޒަންގައި އެ ޓީމުގެ ނަތީޖާތައް ދަށްވަމުންދާތީ، ފްރާންސްގެ ގާސިއާ އަށް ވަނީ ޕްރެޝަރު ބޮޑުވެފަ އެވެ. އެމްޕޮލީ އަތުން ނަޕޯލީ ބަލިވި މެޗުގެ ފަހު ކަށިގަނޑު ރެފްރީ ފުމުމުގެ ކުރިން އެ ކުލަބުގެ ރައީސް އައުރެލިއޯ ޑީ ލައުރެންޓިސް ވަނީ ދަނޑު ދޫކޮށް ވަޑައިގެންފަ އެވެ.
އެމެޗަށްފަހު ނަޕޯލީގެ އިސްވެރިން ވަނީ، ގާސިއާގެ ކުރިމަގާ ގުޅޭ ގޮތުން މަޝްވަރާކޮށްފައި ކަމަށް މީޑިއާ ރިޕޯޓުތައް ބުނެ އެވެ. އެ ބައްދަލުވުމަށްފަހު، ނަޕޯލީގެ އިސްވެރިން ވަނީ ގާސިއާއާ ބައްދައްލުކޮށްފައި ކަމަށް ވެސް މީޑިއާ ތަކުން ބުނެ އެވެ. އެއަށްފަހު އެ ކުލަބުން ބޭނުންވަނީ އޭނާ މަގާމުން ވަކި ކުރަން ކަމަށް ބުނެފައިވާއިރު، ގާސިއާ ވަކި ކުރުމަށްފަހު ގެންނާނެ މީހަކު ވެސް ނަޕޯލީން ހޯދަމުން އަންނަ ކަމަށް އިޓަލީގެ މީޑިއާ ތަކުން ބުނެ އެވެ.
ނަޕޯލީގެ ކޯޗުކަމާ ގާސިއާ ހަވާލުވީ ވެސް މިއަހަރުގެ ޖޫން މަހު އެވެ. އޭގެ ކުރިން އޭނާ ހުރީ ސައުދީ ޕްރޯ ލީގުގެ އަލް ނަސްރުގެ ކޯޗުކަމުގެ މަގާމުގަ އެވެ. އެ ކުލަބު ދޫކޮށް، ގާސިއާ ނަޕޯލީއާ ހަވާލުވީ ނަޕޯލީގެ ކޯޗު އެ ޓީމު ދޫކޮށްލުމުންނެވެ.
