ސިޓްރިޒީން ދިޔާ ބޭސް ރާއްޖެއަށް އެތެރެކުރުމާއި ވިއްކުން މަނާކޮށްފި

ސިޓްރިޒީން ދިޔާ ބޭސް ރާއްޖެ އެތެރެކުރުމާއި ވިއްކުން މަނާކޮށްފިއެވެ.

އާދިއްތަ ދުވަހު މޯލްޑިވްސް ފުޑް އެންޑް ޑްރަގް އޮތޯރިޓީން ނެރުނު އިންޒާރެއްގައި ބުނެފައިވަނީ، ކެއްސުމާއި ހުމާއި ރޯގާއަށް ބޭނުންކުރާ ސިޓްރިޒީން ބޭހުގައި، ކެމިކަލް މާއްދާއެއްކަމަށްވާ ޑައިއީތައިލިން ގްލައިކޯލްއާއި އިތައިލިން ގްލައިކޯލް ހިމެނޭކަމަށް ދުނިޔޭގެ ސިއްހަތު ޖަމްއިއްޔާއިން އެންގުމާގުޅިގެން، ގުޅިގެން އެކަން ކަށަވަރު ކުރުމަށްޓަކައި މާކެޓުން ސާމްޕަލް ނަގައި ސްކްރީން ކުރިއިރު، ޕާކިސްތާނުން އުފައްދާ ސިޓްރިޒީންގެ ބާވަތެއް ކަމަށްވާ ބީ220ގައި ކެމިކަލެއް ހުރިކަން ކަށަވަރުކުރެވިފައި ވާކަމަށެވެ.

މީގެ އިތުރުން، މި ބޭހުގެ އިތުރު ބެޗުތައްވެސް ސްކްރީން ކުރުމުން، ހުރިހާ ބެޗެއްގައިވެސް ޑައިއީތައިލިން ގްލައިކޯލްއާއި އިތައިލިން ގްލައިކޯލް ހުރިހަކަން ކަށަވަރުވެފައި ވާކަމަށް އެ އޮތޯރިޓީން ވަނީ ބުނެފައެވެ.

އެހެންކަމުން، 12 ނޮވެމްބަރު 2023ން ފެށިގެން އެ ބްރޭންޑްގެ އެއްވެސް ބެޗެއް ރާއްޖެ އެތެރެކުރުމާއި، ވިއްކުމާއި، ބޭނުންކުރުން، މޯލްޑިވްސް ފުޑް އެންޑް ޑްރަގް އޮތޯރިޓީ ވަނީ މަނާކޮށްފައެވެ.

މީގެއިތުރުން، މި ބޭސް ރާއްޖެ އެތެރެކޮށް ވިއްކާ ފަރާތްތަކުން، ބޭސް ނައްތާލުމަށް ހަމަޖެހިފައިވާ އުސޫލާ އެއްގޮތަށް ބޭސްތައް ނައްތާލުމަށް އެ އޮތޯރިޓީން ވަނީ އަންގާފައެވެ.