''އީކޮލައި'' ޖަރާސީމުން ތަޣަޔަރުވުމުގެ ފުރުސަތު އޮތުމާ ގުޅިގެން ފްރާންސްގެ ޗީޒެއް ރާއްޖޭގައި ވިއްކުން، ފުޑް އެންޑް ޑުރަގު އޮތޯރިޓީ (އެމްއެފްޑީއޭ) އިން މަނާކޮށްފިއެވެ.
އެމްއެފްޑީއޭއިން ބުދަ ދުވަހު ނެރުނު ބަޔާނެއްގައި ބުނީ "ފްރޮމެޖަރީ ޓުރެޓް- ސްޓްރެސްބާގް" ބްރޭންޑުގެ އެ ޗީޒް ރާއްޖެއަށް އެތެރެވެފައިވާ ކަމުގެ މައުލޫމާތު ދުނިޔޭގެ ސިއްޙަތު ޖަމިއްޔާގެ އިންޓާނޭޝަނަލް ފުޑް ސޭފްޓީ އޮތޯރިޓީ ނެޓް ވޯކް އަދި ޔޫރަޕުގެ ރެޕިޑް އެލާޓް ސިސްޓަމް ފޯ ފުޑް އެންޑް ފީޑްއިން އެ އޮތޯރިޓީއަށް އަންގާފައިވާ ކަމަށެވެ.
މި އެލާޓާ ގުޅިގެން އެ އުފެއްދުމުގެ ސަބަބުން ކާބޯތަކެތީގެ ރައްކާތެރިކަމަށް އޮތް ހިރާސްގެ މިންވަރު ބެލުމުގެ މަސައްކަތް މިހާރު ކުރަމުން އަންނަ ކަމަށް ވެސް އެ އޮތޯރިޓީން ބުންޏެވެ.
އެމްއެފްޑީއޭއީން ބުނެފައިވާ ގޮތުގައި ފައިން ފުޑްސް ޖީއެމްބީއެޗް އިން ޑިސްޓްރިބިއުޓް ކުރާ މި ޗީޒް މި މަހުގެ 3 ވަނަ ދުވަހަށް މުއްދަތު ހަމަވާނެއެވެ.
މި ޗީޒް ރާއްޖޭގައި ނުވިއްކުމަށާއި ބޭނުން ނުކުރުމަށް އެމްއެފްޑީއޭއިން ވަނީ އަންގާފައެވެ.
