ނަޝީދުގެ އިތުބާރު ނެތްކަމުގެ މައްސަލަ ބޭރެއް ނުވޭ - 11:30ގައި މަޖިލީހުގެ ޖަލްސާއެއް ބާއްވަނީ
12 ނޮވެމްބަރު 2023 | އާދީއްތަ 06:11ގަރާރު ބޭރުކޮށްލީ ޑިމޮކްރެޓްސްގެ މެންބަރުންގެ ރޭވުމާއި އެކުގައި ކަަަމަށް އެމްޑީޕީގެ މެންބަރުން ތުހުމަތުކުރައްވާ
މުހައްމަދު ނަޝީދު - ރައްޔިތުންގެ މަޖިލީހުގެ ރައީސް
ރައްޔިތުންގެ މަޖިލީހުގެ އާދިއްތަ ދުވަހުގެ ޖަލްސާ ޤަވާއިދާއި ޚިލާފަށް ނިންމާލާފައިވާތީ މަޖިލީހުގެ ޖަލްސާ އެއް މިއަދު 11:30ގައި ބާއްވަން ނިންމައިފިއެވެ.
އާދިއްތަ ދުވަހުގެ ޖަލްސާ އަށް އެޖެންޑާކޮށްފައި އޮތީ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ އެވެ. އެ ޖަލްސާގެ ރިޔާސަތު ބެލެހެއްޓެވީ ވިލުފުށީ ދާއިރާގެ މެންބަރު ހަސަން އަފީފެވެ. ޖަލްސާ ފެށުމާއެކު މަޖިލީހުގެ މެދު ހެންވޭރު ދާއިރާގެ މެންބަރު އަލީ އާޒިމް ވަނީ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލައިގައި ގަރާރެއްގެ ސިފަ ހަމަ ނުވާ ކަމަށް ވިދާޅުވެ ނިޒާމީ ނުކުތާ އެއް ނަންގަވާފައެވެ. އެ ނިޒާމީ ނުކުތާ ބަލައިގަނެ އަފީފް ވިދާޅުވީ އެ މައްސަލަ ހުށަހަޅާފައި ވަނީ ޤަވާއިދާއި ޚިލާފަށް ކަމަށާއި އެ މައްސަލަ ކުރިއަށް ނުގެންދެވޭނެ ކަަމަށެވެ. އެހެން ވިދާޅުވުމަށް ފަހު އަފީފް ވަނީ ޖަލްސާ ނިންމަވާލައްވާފައެވެ.
ނަމަވެސް ޖަލްސާ ނިންމަވާލެއްވީ ޤަވާއިދާއި ޚިލާފަށް ކަމަށާއި އެ މައްސަލަ ބޭރު ނުވާ ކަމަށް ވެސް މަޖިލީހުގެ އިދާރާ އިން ވަނީ ބުނެފައެވެ. މަޖިލީހުގެ އިތުރު ޖަލްސާ އެއް 11:30ގައި ބޭއްވުމަށް ހަމަޖެހިފައިވާއިރު، މައުލޫމާތު ލިބިފައިވާ ގޮތުން އެ ޖަލްސާގައި ނަޝީދުގެ އިތުބާރު ނެތްކަމުގެ މައްސަލަ ކުރިއަށް ގެންދަން ވަނީ ހަމަޖެހިފައެވެ.
ނަޝީދުގެ އިތުބާރު ނެތްކަމުގެ މައްސަލަ ބޭރުކޮށްލީ ގަވާއިދާއި ޚިލާފަށް ކަމަށް ބައެއް މެންބަރުން ވެސް ގެންދަވަނީ ފާހަަގަކުރައްވަމުންނެވެ. ގަރާރު ބޭރުކޮށްލީ ޑިމޮކްރެޓްސްގެ މެންބަރުންގެ ރޭވުމާއި އެކުގައި ކަަަމަށް މެންބަރުން ތުހުމަތުކުރެއެވެ.
އެ ގަރާރު ހުށަހެޅީ 49 މެންބަރުންގެ ސޮޔާއެކު ނިމިދިޔަ އޮކްޓޯބަރު މަހުގެ ތެރޭގައެވެ.
