މަޖިލީހުގެ ޤަވާއިދަށް ބަލާލުމުން މަޖިލީހުގެ ޤަވާއިދުގައި ބުނާ ޤަރާރާއި ޤާނޫނު އަސާސީގައި ބުނާ ޤަރާރު ތަފާތުކަން ވަރަށް ސާފުކޮށް އެނގޭ ކަމަށާއި މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ކުރިއަށް ނުގެންދެވޭނެ އެއްވެސް ހާލަތެއް ނެތް ކަމަށް ވިލިމާލޭ ދާއިރާގެ މެންބަރު އަހުމަދު އުޝާމް ވިދާޅުވެއްޖެއެވެ.
އުޝާމް މި ފަދައިން ވިދާޅުވީ ނަޝީދުގެ އިތުބާރު ނެތްކަމުގެ މައްސަލަ ޤާނޫނު އަސާސީގެ 82 ވަނަ މާއްދާގެ (ބ)ގެ ދަށުން ހުށަހަޅާފައިވާއިރު އެ މައްސަލައިގައި ޤަރާރެއްގެ ސިފަ ފުރިހަމަ ނުވާ ކަމަށް ބުނެ ޑިމޮކްރެޓްސް އިން އެ މައްސަލަ ކުރިއަށް ގެންދިއުމަށް ދެކޮޅު ހަދަން ފެށުމުންނެވެ. ޑިމޮކްރެޓްސްގެ މެންބަރުން ވިދާޅުވަމުން ގެންދަވަނީ ޤާނޫނު އަސާސީގެ 82 ވަނަ މާއްދާގެ (ބ)ގައި އޮތީ މަޖިލީހުގެ ރައީސްގެ އިތުބާރު ނެތްކަމުގެ މައްސަލަ މަޖިލީހަށް ހުށަހެޅުމުގެ 14 ދުވަސް ކުރިން އެކަން މަޖިލީހަށް އަންގަންވާނެ ކަމަށެެވެ. އަދި ގަރާރުގައި ދީބާޖާ އެއް ނެތް ކަމަށް ވެސް ޑިމޮކްރެޓްސްއަށް ނިސްބަތްވެވަޑައިގަންނަވާ މެންބަރުން ގެންދަވަނީ ވިދާޅުވަމުންނެވެ. މީގެއިތުރުން މަޖިލީހުގެ ގަވާއިދުގެ 167 ވަނަ މާއްދާގައި ބުނާ ގަރާރުގެ ސިފަ ނެތުމުން އެ މައްސަލަ ކުރިއަށް ގެންދަން ފުރުސަތު ނުދޭނެ ކަަމަށް ޑިމޮކްރެޓްސްގެ މެންބަރުން ގެންދަވަނީ ވިދާޅުވަމުންނެވެ.
މިކަމާއި ގުޅިގެން މެންބަރު އުޝާމް ވިދާޅުވީ މަޖިލީހުގެ ޤަވާއިދާއި އެއްގޮތަށް ނަޝީދުގެ އިތުބާރު ނެތްކަމުގެ މައްސަލަ ކުރިއަށް ގެންދެވިދާނެތޯ ނޫންތޯ ބަހުސްކުރަމުން ދާކަަމަށެވެ. އެ މައްސަލަ ކުރިއަށް ގެންދިއުމާއި މެދުގައި ސުވާލު އުފައްދާ ނިޒާމީ މައްސަލަތައް ނަންގަވަމުންދާ އިރު މަޖިލީހަށް ހުށަހަޅާ ޤަރާރުތަކުގެ ވާހަކަ ޤާނޫނު އަސާސީގައި ދެ ހާލަތެއްގައި ބަޔާންކޮށްފައިވާ ކަމަށެވެ. އޭގެ ތެރޭގައި ޤާނޫނު އަސާސީގެ 82 ވަނަ މާއްދާގެ (ބ)ގައި ބުނާ މަޖިލީހުގެ ރައީސް އާއި ނާއިބު ރައީސްގެ އިތުބާރު ނެތްކަމުގެ މައްސަލަ ހުށަހަޅާ ޤަރާރު ހިމެނޭކަން އުޝާމް ފާހަގަކުރެއްވިއެވެ. ހަމައެއާއެކު ޤާނޫނު އަސާސީގެ 100 ވަނަ މާއްދާގައި ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނާއިބުގެ ޤަރާރުގެ ވާހަކަ ބަޔާންކޮށްފައިވާ ކަމަށް މެންބަރު އުޝާމް ވިދާޅުވިއެވެ.
އެހެންކަމަށް ވާއިރު ޤާނޫނު އަސާސީގެ އެ ބުނާ ޤަރާރާއި މަޖިލީހުގެ ގަވާއިދުގެ 167 ވަނަ މާއްދާގައި ބުނާ ގަރާރާއި އެއީ އެއް ބާއްވަތެއްގެ ގަރާރުތޯ ކުރަމުންދާ ބަހުސްގައި އޭނާ ދެކިވަޑައިގަންނަވާ ގޮތް ހާމަކުރެއްވިއެވެ. އުޝާމް ވިދާޅުވީ 167 ވަނަ މާއްދާގައި ބުނާ ގަރާރަކީ މަޖިލީހުން ކަމެއްގައި ދެކޭ ގޮތް ހާމަކުރުމަށް ހުށަހަޅާ ގަރާރެއް ކަމަށެވެ. 167 ވަނަ މާއްދާގައި ހުށަހަޅާ ގަރާރަށް ހިނގާނީ ބިލުގެ މައްޗަށް ހިނގާ އުސޫލު ކަމަށް އުޝާމް ވިދާޅުވިއެވެ. މަޖިލީހުގެ ރައީސްގެ މައްޗަށް ހުށަހަޅާ އިތުބާރު ނެތްކަމުގެ މައްސަލައާ މެދު އެގޮތަށް ޢަމަލުކުރާ ނަމަ، ފުރަތަމަ ކިޔުން އިއްވަން ޖެހޭނެ ކަަމަށް އުޝާމް ވިދާޅުވިއެވެ. އެއަށް ފަހު ބަހުސްކޮށް، ކޮމިޓީ މަރުހަލާ ނިންމާ، ކޮމިޓީގެ ރިޕޯޓް ހުށަހަޅައިގެން ނޫނީ އެފަދަ މައްސަލަތައް ކުރިއަށް ނުގެންދެވޭނެކަމަށް ވެސް އުޝާމް ވިދާޅުވިއެވެ.
