"އެއް ހަނގުރާމައިން އަނެއް ހަނގުރާމައަށް ވަންނާކަށް ބޭނުމެއް ނޫން"

މިޞްރާއި ފަލަސްޠީނު ހިއްސާކުރާ ސަރަޙައްދީ އިން ނުވަތަ ރަފަހް ބޯޑަރު ސަރަޙައްދުގައި، އޭނާގެ 9 މަހުގެ ތުއްތު ދަރިފުޅު އުރާލައިގެން، ޔޫކްރައިންއަށް އުފަން ޓަޓިޔާނާ ޓަޕަލޯވާ ހުރީ ކެތްތެރިކަމާއެކީގައެވެ. ފާއިތުވެދިޔަ 20ށް ވުރެ ގިނަ އަހަރު، އޭނާގެ އަމިއްލަ ގެދޮރު ކަމުގައި ދެކިގެން އުޅުނު ޣައްޒާގައި އިޒްރޭލުން ހިންގަމުންދާ ޤަތުލުޢާންމުން ސަލާމަތްވާނެ ފުރުޞަތެއްގެ އިންތިޒާރުގައެވެ.

ޓަޕަލޯވާގެ އުންމީދުތައް ވިއްސިވިހާލިވީ، ޣައްޒާ ދޫކޮށް އެހެން ސަރަޙައްދަކަށް ބަދަލުވުމުގެ ހުއްދަ ދޫކޮށްފައި ވާ މީހުންގެ ލިސްޓުގައި، އޭނާގެ ފިރިމީހާގެ ނަން ނެތްކަން އެނގުނު ހިސާބުންނެވެ. މިދިޔަ 23 އަހަރު، އޭނާގެ ޙަޔާތުގެ ބައިވެރިޔާގެ މަޤާމުގައި ހުރި، އޭނާގެ 5 ދަރިންގެ ބައްޕައަށް ޣައްޒާއިން ނުކުތުމުގެ ހުއްދަ ނުލިބޭންވީ ސަބަބެއް ޓަޕަލޯވާއަކަށް ނުވިސްނުނެވެ.

ޣައްޒާގައި ތިބި ބޭރު ޤައުމުތަކުގެ ޕާސްޕޯޓް އޮތް މީހުންނާއި، ޞިއްޙީ ފަރުވާ ބޭނުންވާ ފަލަސްޠީނު ރައްޔިތުންނަށް ރަފަހް ބޯޑަރު ހުރަސް ކުރުމުގެ ފުރުޞަތު މިޞްރުން އަލުން ހުޅުވާލީ ބުރާސްފަތި ދުވަހުއެވެ. އެއީ 1 ދުވަހުގެ މުއްދަތަށް ބޯޑަރ ބަންދުކޮށްފައި ބޭއްވުމަށް ފަހުގައެވެ.

ޣައްޒާ ދޫކޮށް ނުކުމެވުނު ކަމުގައި ވީ ނަމަވެސް، ދިރިއުޅުމައިގެން ކުރިއަށް ދިޔުމަށް، ޓަޕަލޯވާއަށް މާ ގިނަ އިޚުތިޔާރުތަކެއް ނެތް ކަމަށް އޭނާ ޤަބޫލު ކުރެއެވެ.

ބޭރު ޤައުމުތަކުގެގެ ޕާސްޕޯޓް އޮންނަ 7000 އެއްހާ މީހުންނާއި، ދެ ޤައުމުގެ ރަށްވެހިކަން އޮންނަ މީހުންނާއި، އެމީހުންނަށް ބަލަދު އަރާ ފަރާތްތަކާއި، މިހާރުން މިހާރަށް ޞިއްޙީ އެހީ ބޭނުންވާ މީހުންނަށް ޚާއްޞަކޮށްގެން، ރަފަހް ބޯޑަރު ހުރަސްކޮށް، ޣައްޒާއިން މީހުން ބޭލުމުގެ އޮޕަރޭޝަން ފެށީ ނޮވެމްބަރު 1 ވަނަ ދުވަހުއެވެ.

ރަފަހަ ބޯޑަރަކީ ޣައްޒާއަށް އިންތިހާ ބޭނުން ޖެހިފައި ވާ އިންސާނީ އެހީގެ ސަޕްލައިވެސް އެތެރެ ކުރެވެން އޮތް ހަމަ އެކަނި މަގެވެ. ދުވާލެއްގެ މައްޗަށް އެންމެ މަދުވެގެން 500 އެއްހާ ޓްރަކްގެ އިންސާނީ އެހީ ޣައްޒާއަށް ބޭނުންވި ނަމަވެސް، އިޒްރޭލުގެ ލާއިންސާނީ ޖަރީމާތަކާއެކު އެ ޢަދަދު ވަނީ އެންމެ 50 އަށް ދަށްވެފައެވެ. 2.3 މިލިއަން މީހުންގެ އާބާދީއެއް ދިރިއުޅެމުން ދިޔަ ޣައްޒާގެ އާބާދީގެ 100 ޕަސެންޓް މީހުންނަށް މިއަދު ކާބޯތަކެތީގެ ކަށަވަރު ކަމެއް ނެތެވެ. ސާފު ބޯފެނެއް ނުލިބެއެވެ. ކަރަންޓާއި އެނޫންވެސް ޛަރޫރީ ޚިދުމަތްތަކުގައި އިޒްރޭލުން އޮތީ އަތް އަޅައިގެންނެވެ.