އަލް ހިލާލް، މޮޅުވުމުގެ ސިލްސިލާ ކުރިއަށް

ސައުދީ ޕްރޯ ލީގުގައި އައްތައާވުނާ ދެކޮޅަށް ކުޅުނު މެޗުން މޮޅުވެ، އަލް ހިލާލްއިން، މޮޅުވުމުގެ ސިލްސިލާ ދަމަހައްޓައިފިއެވެ.

ހުކުރު ދުވަހުގެ ރޭ އައްތަޢާވުނާ ދެކޮޅަށް ކުޅުނު މެޗުން އަލް ހިލާލް މޮޅުވެފައި ވަނީ 2-0ންނެވެ. އަނިޔާގެ ސަބަބުން އެ ޓީމުގެ ބްރެޒިލްގެ ތަރި ނޭމާ ޖޫނިއާ ކުޅުމާ ދުރުގައި ހުރިނަމަވެސް، އަލް ހިލާލުން އަންނަނީ ރަނގަޅު ނަތީޖާތަކެއް ނެރެމުންނެވެ.

ދެ ޓީމުގެ ފަރާތުން ވެސް ވާދަވެރި ކުޅުމެއް ފެނުނު މެޗުގައި އަލް ހިލާލުން ލީޑު ނެގީ 81 ވަނަ މިނެޓުގައެވެ. އެ ޓީމަށް ލީޑު ނަގައިދިނީ ސާބިއާގެ ފޯވާޑް އެލެކްސެންޑާ މިޓްރޮވިޗެވެ. ފުލަމް ދޫކޮށް އަލް ހިލާލަށް ބަދަލުވި މިޓްރޮވިޗް އަންނަނީ އެ ޓީމުގައި މޮޅު ކުޅުމެއް ދައްކަމުންނެވެ. މި ސީޒަންގެ ލީގުގައި އެ ޓީމުގައި އެންމެ ރަނގަޅަށް ކުޅެމުން އަންނަ އެއް ކުޅުންތެރިޔަކީވެސް އޭނާއެވެ. މިޓްރޮވިޗް ވަނީ މިހާތަނަށް އަލް ހިލާލަށް ކުޅެދިން 17 މެޗުގައި، 17 ލަނޑު ޖަހާފައެވެ. އޭގެ ތެރެއިން ސައޫދީ ލީގުގައި އޭނާ ވަނީ 10 ލަނޑު ޖަހާފައެވެ. މެޗުގައި އަލް ހިލާލްގެ ދެވަނަ ލަނޑު މުޙައްމަދު ކަންނޫ ޖެހީ، މެޗުގެ ފުރިހަމަ ވަގުތު ހަމަވެ، އިތުރަށް ދިން ވަގުތުގައެވެ.

މޮޅާއެކު އަލް ހިލާލް އެއްވަނާގައި އޮތީ، މިހާތަނަށް ކުޅުނު 13 މެޗުން 35 ޕޮއިންޓު ހޯދައިގެންނެވެ. 13 މެޗުގެ ތެރެއިން އެ ޓީމު ވަނީ 11 މެޗުން މޮޅުވެ، ދެ މެޗުން އެއްވަރުވެފައެވެ. މި ސީޒަންގެ ލީގުގައި ކުޅުނު އެއްވެސް މެޗަކުން އެ ޓީމު ބަލިވެފައެއް ނުވެއެވެ. ދެވަނާގަައި އޮތީ އެ ޓީމަށްވުރެ އެއް މެޗު މަދުން ކުޅެގެން، 28 ޕޮއިންޓާއެކު އައްނަޞްރެވެ. އަލް ހިލާލް އަތުން ބަލިވި އައްތަޢާވުން އޮތީ، 25 ޕޮއިންޓާއެކު ހަތަރުވަނާގައެވެ.