ބ އަތޮޅު ނެލިވަރު އަދި ހުރާފަރު ސަރަހައްދަކީ ހިމާޔަތްކޮށްފައިވާ ދެ ސަރަހައްދުގެ ގޮތުގައި ކަނޑައަޅައިފިއެވެ.

މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީން ބުނީޤާނޫނު ނަންބަރު 4/93 (ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާ ބެހޭ ޤާނޫނު) ގެ 4 ވަނަ މާއްދާގެ ދަށުން މާޅޮސްމަޑުލު ދެކުނުބުރި (ބ. އަތޮޅު) ނެލިވަރު ސަރަހައްދާއި ހުރާފަރު ސަރަހައްދަކީ ޙިމާޔަތްކޮށްފައިވާ ސަރަހައްދެއް ކަމުގައިހަމަޖައްސާފައިވާ ކަމަށެވެ.

އެގޮތުން ނެލިވަރު ސަރަހައްދު ބެލެހެއްޓުމުގައި އަމަލުކުރާނީ ގުދުރަތީ ނުވަތަ ތަބީއީގޮތުގައި ރައްކާތެރިކޮށް ދަމަހައްޓާ ތަންތަނާ ބެހޭ ގަވާއިދުގެ މަތިން ކަމަށް ވަނީ ބުނެފައެވެ. ހިމާޔަތްކޮށްފައިވަނީ 665.28 ހެކްޓަރުގެ ސަރަހައްދެކެވެ. ކޯ އޭރިއާގެ ގޮތުގައި 206.46 ހެކްޓަރު ކަނޑައަޅާފައިވާ އިރު ބަފަރ ޒޯންގެ ގޮތުގައި 458.82 ހެކްޓަރު ވަނީ ހަމަޖައްސާފައެވެ.

އަދި ހުރާފަރު ސަރަހައްދުން ހިމާޔަތްކޮށްފައިވަނީ 694.36 ހެކްޓަރުގެ ސަރަހައްދެކެވެ. ކޯ އޭރިއާގެ ގޮތުގައި 353.02 ހެކްޓަރު ކަނޑައަޅާފައިވާ އިރު ބަފަރ ޒޯންގެ ގޮތުގައި 123.09 ހެކްޓަރު ވަނީ ހަމަޖައްސާފައެވެ.

އެންވަޔަރމަންޓް މިނިސްޓްރީން ބުނީ ނެލިވަރު ސަރަހައްދަކީ ބ. ކުންފުނަދޫގެ އިރުއުތުރަށް އޮންނަ އެންމަޑި އެއްވާ ސަރަހައްދު ކަމަށާއި، ހުރާފަރު ސަރަހައްދަކީ ހަނިފަރު ސަރަހައްދުގެ އުތުރަށް އޮންނަ ހަނިފަރާއި އެއްގޮތް ސިފަތަކެއް ހުންނަ ސަރަހައްދެއް ކަމަށެވެ. އަދި 2020ގެ ނިޔަލަށް ނެލިވަރު ސަރަހައްދުން 105 އެންމަޑި 119 ފަހަރު ފެނިފައިވާ ކަމަށާއި، ހުރާފަރު ސަރަހައްދުން 2020ގެ ނިޔަލަށް 436 އެންމަޑި 1239 ފަހަރު ފެނިފައިވާ ކަމަށެވެ. މި ސަރަހައްދަކީ އެންމަޑި ކާނާ ހޯދުމަށާއި، ވިހާ އާލާވުމަށް ހާއްސަ ސަރަހައްދެއް ކަމަށް ވެސް މިނިސްޓްރީން ވަނީ ބުނެފައެވެ.

މި ސަރަހައްދުގައި ހިމެނޭ ހުރިހާ ޒޯނެއްގައި ކުރުން މަނާ ކަންކަން:

ނެލިވަރު ސަރަހައްދުގައި ހިމެނޭ ފިނޮޅުގައި 4 ކަމެއް ކުރުން ވަނީ މަނާކޮށްފައެވެ. އެގޮތުން ރަށުން ބޭރުން ގެނެސްގެން އެއްވެސް ބާވަތެއްގެ ގަހެއް/ އޮށެއް އިންދުމާއި، ކަޅުފަސް ނުވަތަ ދޮންފަސް ނެގުމާއި، ދަނޑުވެރިކަން ކުރުމުގެ އިތުރުން އެއްވެސް ދިރުމެއްގެ ބިސް ނެގުން ނުވަތަ/އަދި ހާއްޔަކަށް ގެއްލުން ދިނުން ހިމެނެއެވެ. އަދި މިކަންތައްތަކުގެ އިތުރުން ހުރާފަރުގައި އަލިފާން ރޯކުރުން / ގެންގުޅުމާއި ރޭގަނޑު 6:00ން ފަތިހު 6:00ށް ހުރާފަރު ސަރަހައްދަށް އެރުން ވަނީ މަނާކޮށްފައެވެ.

މީގެ އިތުރުން ކަނޑައެޅިފައިވާ އުސޫލެއްގެ ދަށުން ހާއްސަ ހުއްދައާއެކު ކުރުން ހުއްދަ ކަންކަމުގެ ތެރޭގައި ހިމާޔަތްކޮށްފައިވާ ސަރަހައްދަށް އާންމުންނާއި ފަތުރުވެރިން ޒިޔާރަތްކުރުމާއި، އިކޯ ޓޫރިޒަމްގެ މަސައްކަތެއް ކުރުމާއި ދިރާސާކުރުން އަދި ރިސްޓޮރޭޝަން ނުވަތަ ރިހިބިލިޓޭޝަންގެ ބޭނުމަށް މަސައްކަތްކުރުން ހިމެނެއެވެ.