ޣައްޒާގެ އުތުރުގައި ދިރިއުޅޭ އެތައް ހާސް ރައްޔިތުން ފުރާނަ ސަލާމަތްކުރުމަށް ފައިމަގުގައި ޣައްޒާގެ ދެކުނަށް
ބުދަ ދުވަހު އެކަނިވެސް 15،000 ރައްޔިތުން ހިނގާފައި ދެކުނަށް ގޮސްފައިވޭ
ޣައްޒާގެ އުތުރުގައި ދިރިއުޅޭ ރައްޔިތުން ފައި މަގުގައި ދެކުނަށް ބަދަލުވަނީ
ޣައްޒާގެ އުތުރުގައި ދިރިއުޅޭ އެތައް ހާސް ރައްޔިތުންނެއް ފުރާނަ ސަލާމަތްކުރުމަށް ފައިމަގުން ޣައްޒާގެ ދެކުނަށް ބަދަލުވާން ފަށައިފިއެވެ.
ޣައްޒާގެ މައި މަގު ސަލާހް އަލް ދިން އިން ބުދަ ދުވަހު އެކަނިވެސް 15،000 ރައްޔިތުން ހިނގާފައި ދެކުނަށް ގޮސްފައިވާކަމަށް އދ ން ބުނެއެވެ. މިއީ ހޯމަ ދުވަހަށްވުރެ ތިން ގުނަ އިތުރު އަދަދެއްކަމަށް އދން ބުނެއެވެ. މި މީހުން ދެކުނަށް ދިޔައީ ހުދަ ކުލައިގެ ދިދަ ވިހުރުވަމުންނެވެ.
ބުދަ ދުވަހު އިސްރާއީލުގެ އަސްކަރިއްޔާއިން ވަނީ ޣައްޒާގެ އުތުރުގައި އުޅޭ ރައްޔިތުން ދެކުނަށް ބަދަލުވާން ހަތަރު ގަޑިއިރުގެ މުހުލަތެއް ދީފައެވެ.
އަލްޖަޒީރާއިން ރިޕޯޓްކޮށްފައިވާ ގޮތުގައި ޣައްޒާގެ އުތުރަށް އިސްރާއީލުގެ އަސްކަރިއްޔާއަށް ވަދެވިފައިވަނީ ކިހާ ވަރަކަށް ކަމެއް ސާފެއް ނޫނެވެ. ނަމަވެސް މީހުން ބުނާގޮތުގައި އިސްރާއީލު ސިފައިން ވަނީ އިމާރާތްތަކާއި ކައިރިވެފައެވެ.
އެތައް ހާސް ބަޔަކު ފައިމަގުގައި ދެކުނަށް ދާއިރު އެމީހުން ދަނީ ބޮޑެތި ގްރޫޕްތައް ހަދާފައެވެ. އެއީ މަދު އަދަދުތަކުންދާނަމަ އިސްރާއީލު ސިފައިންގެ ހަމަލާތައް އަމާޒުވެދާނެކަމުގެ ބިރަށެވެ. އިސްރާއީލު އަސްކަރިއްޔާއިން ބުނެފައިވާ ގޮތުގައި ލައްކައަކަށްވުރެ ގިނަ މީހުން މިހާރު ވަނީ ޣައްޒާގެ ދެކުނަށް ބަދަލުވެފައެވެ.
އިސްރާއީލު އަސްކަރިއްޔާއިން ބުނާގޮތުގައި އާންމުން މަދުވާވަރަކަށް އިސްރާއީލު އަސްކަރިއްޔާއަށް ހަމާސްގެ އަސްކަރިއްޔާގެ ތަންތަނަށާއި ހަމާސްގެ ހަނގުރާމަވެރިންނަށް ހަމަލާދޭން ފަސޭހަވެގެންދާނެކަމަށެވެ.
އިސްރާއީލުން ބުނާގޮތުގައި ޣައްޒާ ސިޓީ އެމީހުން ވަނީ މިހާރު ވަށާލާފައެވެ. އެސަރަހައްދުގައި އުޅޭ އާންމުން ބުނާގޮތުގައި އެސަރަހައްދުގެ އެއްވެސް ތަނެއް އިސްރާއީލުގެ ހަމަލާތަކުން ސަލާމަތްވެފައެއް ނުވެއެވެ.
ގިނަ އަދަދަކަށް ކުޑަކުދިންނާއި ބޮޑެތި މީހުންނާއި ނުކުޅެދުންތެރިކަން ހުންނަ މީހުން ދެކުނަށް ބަދަލުވަމުންދާއިރު އެމީހުންނަށް ދެކުނަށް ދެވެނީ އިސްރާއީލުގެ ޗެކް ޕޮއިންޓްތައް ހުރަސްކޮށްފައެވެ. ބައެއް މީހުން މި ޗެކްޕޮއިންޓްތަކުން ހައްޔަރުކޮށްފައިވާކަމަށް މަންޒަރު ދުށް މީހުންނާ ހަވާލާދީ އަލް ޖަޒީރާއިން ރިޕޯޓްކޮށްފައިވެއެވެ.
