"ޖުޑީޝަރީ ފޯ ޖޫނިއާސް" ގައި ބައިވެރިވާން ހުޅުވާލައިފި
8 ނޮވެމްބަރު 2023 | ބުދަ 03:49މި މަހުގެ 21 އާ ހަމައަށް އޮންލައިންކޮށް ހުށަހެޅޭނެ
މިދިޔަ އަހަރު ބޭއްވި ޖޫޑީޝަރީ ފޯ ޖޫނިއާސް ޕްރޮގްރާމްގެ ތެރެއިން
މި އަހަރުގެ "ޖުޑީޝަރީ ފޯ ޖޫނިއާސް" (ޖޭ4ޖޭ) ގައި ބައިވެރިވާން ހުޅުވާލައިފިއެވެ.
މިއީ ޖުޑިޝަލް ސަރވިސް ކޮމިޝަން (ޖޭއެސްސީ) އާއި ޔޫއެންޑީޕީ މޯލްޑިވްސް ގުޅިގެން ހިންގާ ޕްރޮމްރާމެކެވެ. މި ޕްރޮގްރާމް ހާއްސަކޮށްފައި ވަނީ އުމުރުން 15 އަހަރާއި 20 އަހަރާ ދެމެދުގެ ޒުވާނުންނަށެވެ.
މި ޕްރޮގްރާމަކީ ޝަރުޢީ ދާއިރާއިން ކިޔަވަމުންދާ ދަރިވަރުންނާއި ޒުވާނުންނަށް އެ ދާއިރާއާ ގުޅޭ މައުލޫމާތު ހިއްސާކޮށް، ދާއިރާއަށް ޝައުގުވެރިކަން އިތުރު ކުރުމަށް ކުރިއަށްގެންދާ ޕްރޮގްރާމެކެވެ. މިދިޔަ އަހަރު ބޭއްވި ޖޭ4ޖޭގައި 37 ޒުވާނުން ބައިވެރިވިއެވެ.
"ޖޭ4ޖޭ" ގައި ބައިވެރިވާން ޝައުގުވެރިވާ ފަރާތްތަކަށް އެކަމަށް އެދި ހުށަހެޅުމުގެ ފުރުސަތު މި މަހުގެ 21 އާ ހަމައަށް އޮންލައިންކޮށް ވަނީ ހުޅުވާލައިފައެވެ. ބައިވެރިވާން ހުށަހަޅާ ފަރާތްތަކުގެ ތެރެއިން 40 ފަރާތަކަށް ފުރުސަތު ލިބިގެންދާނެ ކަމަށް ޔޫއެންޑީޕީ މޯލްޑިވްސް އިން ބުނެއެވެ.
މި ޕްރޮގްރާމުގައި ސެޝަންތައް ކުރިއަށްގެންދާނީ ރާއްޖޭގެ ކޯޓުތަކުގެ ފަނޑިޔާރުންނާއި ވަކީލުންނާއި ޖޭއެސްސީގެ މުވައްޒަފުންނާއި ޑީޖޭއޭގެ މުވައްޒަފުންނާއި ޔޫއެންޑީޕީގެ މުވައްޒަފުން ހިމެނޭހެން ފެސިލިޓޭޓަރުންގެ ޓީމަކުންނެވެ.
މި ޕްރޮގްރާމް ކުރިއަށް ގެންދަން ނިންމާފައިވާ އަންނަ ޑިސެމްބަރު މަހުގެ 14 އިން 21 އަށެވެ.
