ގުޅިފައިވާ ސިޔާސީ ޕާޓީތަކުގެ ރައްޔިތުންގެ މަޖިލީހުގެ މެންބަރުން މަޖިލިސް ކުރާ ގޭގެ ތެރޭގައި ހަރަކާތްތެރިވަމުން ދަނިކޮށް އެސްއޯ ފުލުހުން ވަދެ ބާރުގެ ބޭނުންކޮށް ބައެއް މެންބަރުން މަޖިލިސް އިދާރާތެރެއިން ނެރެފިއެވެ.

މިއީ ރާއްޖޭގެ ތާރީޚްގައި ފުލުހުން މަޖިލިސް އިދާރާތެރެއަށް ވަދެ މިގޮތަށް އަމަލުކުރި ފުރަތަމަ ފަހަރެވެ.

ރާއްޖެއެމްވީއަށް ލިބުނު ވީޑިއޯއިން ފެންނަ ގޮތުގައި ގިނަ އަދަދެއްގެ އެސްއޯ ފުލުހުން މަޖިލިސް އިދާރާތެރެއަށް ވަދެ ބައެއް މެންބަރުން ގަދަކަމުން ނެރެގެންދާތަން ވަނީ ފެނިފައެވެ. ފުލުހުން މަޖިލީހުގެ ތެރެއަށް ވަނުމުން މަޖިލީހުގެ ސަލާމަތީ ކަންކަން ބަލަހައްޓާ ސިފައިން، އެ ފުލުހުން ނެރުނެވެ. ނަމަވެސް ފަހުން ފުލުހުން ވަދެ އަނެއްކާ ވެސް މެމްބަރުންތައް ނެރެމުންދިޔަ އެވެ. 

"ފުލުހުން މެމްބަރުންގެ ގަޔަށް ބޮލަށް އަރައިގަތީ، ފުލުހުންގެ ގައިން ބަނގުރާ ވަސް ވެސް ދުވާ. ބޮއިގެން ތިބި މީހުން ތިބި އޭގެ ތެރޭގައި،" އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވި އެވެ. 

މަޖިލީހުގެ ތެރޭގައި މިހާރުވެސް ބައެއް މެންބަރުން ތިއްބެވިއިރު އެމެންބަރުން މަސައްކަތް ކުރައްވަމުން ގެންދަވަނީ ޖަލްސާއެއް ބޭއްވުމަށެވެ.

މަޖިލީހުގެ ތެރެެއިން ބައެއް މެމްބަރުން ނެރުމުގައި އަނިޔާވާ ގޮތަށް ފުލުހުން އަމަލުކުރި އެވެ. 

މިއީ ރާއްޖޭގެ ބަރުލަމާނީ ހަޔާތުގައި ވެސް ފުލުހުން މަޖިލީހުގެ ތެރެއަށް ވަދެ، އެ މަޖިލީހުގެ މެމްބަރުން ނެރުނު ފުރުތަމަ ފަހަރެވެ. 

މަޖިލީހުގެ ސަލާމަތީ ކަންކަން ބަލަހައްޓަނީ ސިފައިންކަމަށްވާއިރު، ފުލުހުން މަޖިލިހުގެ އިދާރާއަށް ވަނީ ކޮން ފަރާތަކުން އަންގައިގެން ކަމެއް އަދި ނޭނގެ އެވެ. 

މިކަމާ ގުޅޭ ގޮތުން ފުލުހުންގެ ބަހެއް ވެސް ސިފައިންގެ ބަހެއް ވެސް ، މަޖިލީހުގެ އިދާރާގެ ބަހެއް ވެސް ނުލިބެ އެވެ.