ސަގާފީ އަދި އާސާރީ ތަކެތީގެ އަމިއްލަވަންތަކަން ހިފަހައްޓައި ރައްކާތެރިކުރުމުގެ މުއާހަދާގައި ސޮއިކުރަން ނިންމައިފި
7 ނޮވެމްބަރު 2023 | އަންގާރަ 10:53އެ މުއާދަހާގައި ސޮއިކުރަން، ވަޒީރުންގެ މަޖިލީހުން ވަނީ ލަފާއަރުވާފައި
ވަޒީރުންގެ މަޖިލީހުގެ ބައްދަލުވުމެއްގެ ތެރެއިން
"ޔުނެސްކޯ 1970 ކޮންވެންޝަން އޮން ދަ މީންސް އޮފް ޕްރޮހިބިޓިންގ އެންޑް ޕްރިވެންޓިންގ ދަ އިލިސިޓް އިމްޕޯޓް، އެކްސްޕޯޓް އެންޑް ޓްރާންސްފަރ އޮފް ކަލްޗަރަލް ޕްރޮޕަޓީ" މުއާހަދާގައި ސޮއިކުރުމަށް ދިވެހި ސަރުކާރުން ނިންމައިފިއެވެ.
ވަޒީރުންގެ މަޖިލީހުގެ އަންގާރަ ދުވަހުގެ ބައްދަލުވުމުގައި މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖުން ހުށަހެޅުއްވި ކަރުދާހުގެ މައްޗަށް ވަނީ މަޝްވަރާކޮށްފައެވެ. އެ މަޝްވަރާއަށްފަހު ވަޒީރުންގެ މަޖިލީހުގެ ލަފަޔާއެކު، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވަނީ، "ޔުނެސްކޯ 1970 ކޮންވެންޝަން އޮން ދަ މީންސް އޮފް ޕްރޮހިބިޓިންގ އެންޑް ޕްރިވެންޓިންގ ދަ އިލިސިޓް އިމްޕޯޓް، އެކްސްޕޯޓް އެންޑް ޓްރާންސްފަރ އޮފް ކަލްޗަރަލް ޕްރޮޕަޓީ" މުއާހަދާގައި ސޮއިކުރައްވަން ނިންމަވާފައެވެ.
މި މުއާހަދާއަކީ، ސަގާފީ އަދި އާސާރީ ތަކެތީގެ އަމިއްލަވަންތަކަން ހިފަހައްޓައި އެ ތަކެތި ރައްކާތެރިކުރުމުގެ ބާރު ލިބިދޭ ގޮތަށް އެކުލަވާލާފައިވާ މުއާހަދާއެކެވެ.
ރައީސް އޮފީހުން ބުނީ، ރާއްޖޭގެ ސަގާފީ އަދި އާސާރީ ތަކެއްޗާއި ލިޔެކިޔުންތައް ދުނިޔޭގެ އެހެނިހެން ގައުމުތަކުގެ ދާރުލްއާސާރުތަކާއި އަރުޝީފުތަކުގައި ހުރިކަމުގެ މައުލޫމާތުތައް ލިބެމުންދާއިރު، މިގޮތަށް ގެންދެވޭ ކޮންމެ އެއްޗަކާއެކު ދިވެހީންގެ އެތައް ތަރިކައެއް ނެތިގެން ދާކަމަށެވެ. އަދި، ތާރީޚް ދިރާސާކުރެވޭނެ ގޮތްތައް ގެއްލިގެން ދާކަމަށްވެސް އެ އޮފީހުން ބުންޏެވެ.
އެހެންވެ، ސަގާފީ ތަކެތީގެ އަމިއްލަވަންތަކަން ހިފަހައްޓައި ރައްކާތެރިކަން ކަށަވަރުކުރުމަކީ މުހިންމު ކަމެއްކަން ރައީސް އޮފީހުން ފާހަގަކުރެއެވެ.
މި މުއާހަދާގައި 143 ގައުމުން މިހާތަނަށް ވަނީ ސޮއިކޮށްފައެވެ. ރާއްޖެއިން މި މުއާހަދާގައި ސޮއިކުރުން ވެގެންދާނީ، ކުރިއަށް އޮތް ތަނުގައި މިފަދަ ކަންކަން ތަކުރާރުނުވާނެ ގޮތަށް މަސައްކަތްކުރުމަށް ފަސޭހަވެގެންދާނެ ކަމަކަށް ކަމަށާއި، އޮންނަ އުސޫލާއި ހަމަތަކުގެ މަތިން، ގާނޫނާ ޚިލާފަށް ގެންގޮސްފައިވާ އާސާރީތަކެއްޗާއި ލިޔެކިޔުންތައް އަނބުރާ ރާއްޖެއަށް ގެނެވޭނެ މަގު ފަހިވެ، އެ ތަކެއްޗާއި ލިޔެކިޔުންތަކުގެ ދަފުތަރު ބެލެހެއްޓުމަށް ވެސް މި މުއާހަދާގެ ސަބަބުން އިތުރު ބާރެއް ލިބިގެންދާނެ ކަމަށް ސަރުކާރުން ބުނެއެވެ.
މީގެ އިތުރުން، މި މުއާހަދާގައި ސޮއި ކުރުމުން، ސަގާފީ އަދި އާސާރީ ތަކެތީގެ އަމިއްލަވަންތަކަން ހިފަހައްޓައި ރައްކާތެރިކުރުމަށް ޔުނެސްކޯގެ ފަންނީ އެހީތެރިކަން ލިބޭނެކަމަށާއި، ދިވެހިރާއްޖޭގެ ސަގާފީ ތަރިކައިގެ ގާނޫނާއި އެ ގާނޫނާ ގުޅިގެން އާންމުކޮށްފައިވާ ގަވާއިދުތަކަށް އަމަލުކުރުމަށްވެސް ފަސޭހަވާނެކަމަށް ސަރުކާރުން ބުނެއެވެ.
