މަސްތުވާތަކެތީގެ މައްސަލައެއްގައި ކޯޑިނޭޓަރު މުއާޒު ހައްޔަރު ކޮށްފި
17 ޖޫން 2017 | ހޮނިހިރު 09:48މުއާޒާއެކު ފަސްމީހަކު ހައްޔަރުކޮށްފައިވޭ
ކޯޑިނޭޓަރު މުއާޒު
ނެޝެނަލް ސެންޓަ ފޯ ދި އާޓްސް( އެންސީއޭ)ގެ ކޯޑިނޭޓަރު އަދި ފިލްމީ ތަރި އަބްދުﷲ މުއާޒް މަސްތުވާތަކެތީގެ މައްސަލައެއްގައި ހައްޔަރުކޮށްފި އެވެ
ފުލުހުންގެ މީޑިއާ އޮފިޝަލް ވަނީ މުއާޒު ހައްޔަރުކުރިން "ރާއްޖެއެމްވީ"އަށް ކަށަވަރުކޮށްދެއްވާފަ އެވެ. އޮފިޝަލް ވިދާޅުވީ މުއާޒްގެ އިތުރުން އިތުރު ހަތަރު މީހަކު ހައްޔަރުކޮށްފައިވާ ކަމަށެވެ. އަދި ހައްޔަރުކުރި ތަނުން ހަތަރު ފުޅި ބަނގުރާ ވެސް ފެނިފައިވާ ކަމަށް އޭނާ ވިދާޅުވިއެވެ.
އެމީހުންގެ ބައްދުގެ މުއްދަތު އިތުރުކޮށްފައިވޭތޯ ސުވާލު ކުރުމުން، އިތުރު އެއްވެސް ތަފްސީލެއް ދެވެން ނެތް ކަމަށް ފުލުހުުންގެ މީޑިއާ އޮފިޝަލް ވިދާޅުވިއެވެ.
ޔޫތު މިނިސްޓްރީގެ ދަށުން ހިންގަމުން އަންނަ އެންސީއޭގެ ކޯޑިނޭޓަރުގެ މަގާމަށް މުއާޒު އައްޔަން ކުރައްވާފައިވަނީ ރައީސް ޔާމީންގެ ސަރުކާރުގެ ދުވަސްވަރު އެވެ. އޭގެފަހުން އެމްއެމްޕީއާރުސީގެ ހިޔާނާތާއި ގުޅިގެން ކުރީގެ ނައިބު ރައީސް އަހުމަދު އަދީބު ހައްޔަރުކޮށް، އަދީބާ ގުޅުން އޮންނަ ގިނަ ބަޔަކު ސަރުކާރުގެ މަގާމުތަކުން ވަކިކުރިއިރު މުއާޒު ވެސް އެދުވަސްވަރު ކޯޑިނޭޓަރުގެ މަގާމުން ވަނީ ވަކިކޮށްފަ އެވެ. ނަމަވެސް ދާދިފަހުން ހަމަ އެމަގާމަށް މުއާޒު ވަނީ އައްޔަން ކުރައްވާފަ އެވެ.
