މެންބަރުން މަޖިލީހަށް ވަދެ ޖަލްސާ ބޭއްވުމުގެ މަސައްކަތް ފަށައިފި
24 ޖުލައި 2017 | ހޯމަ 08:56ފުލުހުން ހުރަސްއެޅުމުގެ ތެރޭގައި ބައެއް މެންބަރުންނަށް އަނިޔާވެފައި
މެންބަރުން މަޖިލިސް ގޯތި ތެރޭގައި
ގުޅިފައިވާ ޕާޓީތަކުގެ ރައްޔިތުންގެ މަޖިލީހުގެ މެންބަރުންނަށް ފުލުހުން ހުރަސްއަޅަމުން ދަނިކޮށްވެސް މެންބަރުން ރައްޔިތުންގެ މަޖިލީހުގެ އިދާރާތެރެއަށް ގަދަކަމުން ވަދެވަޑައިގެން ޖަލްސާ ބޭއްވުމުގެ މަސައްކަތް ފަށައިފިއެވެ.
އެ މެންބަރުން މަޖިލީހަށް ވަޑައިގަތުމަށްޓަކައި މ ކުނޫޒްއިން ނުކުތުމާއެކު އެސްއޯ ފުލުހުން ވަނީ އެމެންބަރުން އެއްވެސް ކޮޅަކަށް ވަޑައިގަތަނުދީ ހިފަހައްޓާފައެވެ. އެގޮތުގައި ހިފެހެއްޓުމަށް ފަހު ފުލުހުން ވަނީ މަގު ހުޅުވާލާފައެވެ. އެއާއެކު މެންބަރުން މަޖީދީމަގުން ވަޑައިގެން ރައްޔިތުންގެ މަޖިލީހުގެ އިރުމަތީ ފަރާތު ގޭޓުން މަޖިލީސް ތެރެއަށް ވަދެވަޑައިގެން ވަގުތު ފުލުހުން ވަނީ މެންބަރުންގެ ގައިކޮޅަށް އަރައިގެންފައެވެ. މަޖިލީހުގެ މެމްބަރުންނަށް ފުލުހުން އަނިޔާކުރި މަންޒަރު ފެނުނުއިރު، ނޫސްވެރިންނަށް ވެސް ފުލުހުން އަނިޔާކުރި މަންޒަރު ފެނެނެވެ.
މެމްބަރުން މަޖިލީހުގެ ތެރެއަށް ވަދެވަޑައިނުގަތުމަށްޓަކައި، ފުލުހުން ޕެޕަ ސުޕްރޭ އިންތިހާއަށް ޖެހި އެވެ. ނަމަވެސް، ޕެޕަ ސްޕްރޭގެ ތެރެއިން މެމްބަރުން މަޖިލީހުގެ ތެރެއަށް ދެމިގަތީ ގޭޓް ހުޅުވުމަށް ފަހު އެވެ. އަދި ބައެއް މެމްބަރުން ފާރުމަތިން ވެސް މަޖިލީހުގެ ތެރެއަށް ވަދެވަޑައިގަތެވެ.
މަޖިލީސް ތެރެއަށް ވަދެވަޑައިގެންނެވިއިރު އެމްޑީޕީގެ ޕާލަމެންޓްރީ ގުރޫޕްގެ ލީޑަރ އިބްރާހީމް މުހައްމަދު ސޯލިހާއި މަކުނުދޫ ދާއިރާގެ މެންބަރު އަނާރާ ނައީމަށް ވަނީ އަނިޔާވެފައެވެ. ކާށިދޫ ދާއިރާގެ މެމްބަރު ފައިސަލް ނަސީމަށް އަނިޔާލިބުމުގެ ސަބަބުން މިހާރު ދަނީ އޭޑީކޭ ހޮސްޕިޓަލްގައި ފަރުވާ ދެމުންނެވެ.
މަޖިލީހުގެ އެތެރޭގައި ހުންނެވި އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވީ ގުޅިފައިވާ ޕާޓީތަކުގެ ގިނަ މެމްބަރުންނަށް މަޖިލީހުގެ އިދާރާއަށް ވަދެވަޑައިގެންނެވިފައިވާ ކަމަށާއި މިހާރު އެ ބޭފުޅުން ކުރައްވަމުން ގެންދަވާ މަސައްކަތަކީ ޖަލްސާ ބޭއްވުމަށް ތައްޔާރުވުމުގެ މަސައްކަތް ކަމަށެވެ.
