ސައުދީ ޕްރޯ ލީގުގައި އަލް ފާތެހާ ދެކޮޅަށް ކުޅުނު މެޗުން މޮޅުވެ، އަލް ޙިލާލުން ލީގު ތާވަލްގެ އެއް ވަނައިގައި ލީޑު ފުޅާ ކޮށްފި އެވެ.

ހުކުރު ދުވަހުގެ ރޭ އަލް ފާތެހާ ދެކޮޅަށް ކުޅުނު މެޗުން އަލް ޙިލާލް މޮޅުވީ 2-0 އިންނެވެ. މެޗުގެ ފުރަތަމަ ހާފުގައި އަލް ޙިލާލުން އެއް ލަނޑު ޖެހިއިރު، އަނެއް ލަނޑު ޖެހީ މެޗުގެ ދެ ވަނަ ހާފުގަ އެވެ.

މެޗު ފަށައިގެން ފަސް ވަނަ މިނެޓުގައި އަލް ޙިލާލަށް ލީޑު ނަގައިދިނީ މި ސީޒަނުގައި މޮޅު ކުޅުމެއް ދައްކަމުން އަންނަ ސާބިއާގެ އެލެކްސެންޑާ މިޓްރޮވިޗް އެވެ. އެއީ އެ ޓީމަށް ލިބުނު ޕެނަލްޓީއެއް ކާމިޔާބު ކޮށްގެން މިޓްރޮވިޗް ޖަހައިދިން ލަނޑެކެވެ. އޭގެ ފަހުން މިޓްރޮވިޗަށް ވަނީ ލީޑު ފުޅާ ކުރުމަށް ވެސް ފުރުސަތު ލިބިފަ އެވެ. މެޗުގައި އަލް ޙިލާލްގެ ދެ ވަނަ ލަނޑު، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ޖެހީ ދާދި ފަހުން އޭޝިއާގެ މޮޅު ކުޅުންތެރިޔާގެ މަގާމު ހޯދި ސަލީމް އަލް ދައުސަރީ އެވެ.

މިއީ މި ސީޒަންގައި އަލް ޙިލާލުން ކުޅުނު 12 ވަނަ މެޗެވެ. އޭގެ ތެރެއިން އެ ޓީމު ވަނީ 10 މެޗަކުން މޮޅުވެފަ އެވެ. ދެ މެޗެއް އެއްވަރުވެފައިވާއިރު، މިހާތަނަށް އެއްވެސް މެޗަކުން އެ ޓީމު ބަލިވެފައެއް ނުވެ އެވެ. އަލް ޙިލާލް އެއް ވަނައިގައި އޮތީ 32 ޕޮއިންޓާއެކު އެވެ. އެ ޓީމަށް ވުރެ އެއް މެޗު މަދުން ކުޅެގެން ދެ ވަނައިގައި އަލް ނަސްރަށް ލިބެނީ 25 ޕޮއިންޓެވެ.