ހުއްދަ ނޫންގޮތުގައި މީހަކު ހިފަހައްޓާ މާރާމާރީ ހިންގާ ފޭރުނު މީހަކު ބަންދުކޮށްފި

ހުއްދަ ނޫންގޮތުގައި މީހަކު ހިފަހައްޓާ މާރާމާރީ ހިންގާ ފޭރުނު މީހަކު ބަންދުކޮށްފިއެވެ.

ދިވެހިފުލުހުންގެ ހިދުމަތުން އެދިގެން ކްރިމިނަލް ކޯޓުން ނެރުނު އަމުރުގައި ބުނެފައިވަނީ މި މައްސަލައިގައި އަމުރު ނެރެފައިވަނީ ކ. މާލެ / ހ. ފެންޑިއުމް، މުހައްމަދު އިޒްނީން މުސްތަފާގެ މައްޗަށެވެ. މި މައްސަލައިގައި އޭނާ ކަސްޓޯޑިއަލް ޖަލެއްގައި ބެހެއްޓުމަށް 15 ދުވަހުގެ މުއްދަތެއް ކޯޓުން ވަނީ ދީފައެވެ.

ކޯޓު އަމުގައި ބުނެފައިވަނީ އޭނާގެ މައްޗަށް ތުހުމަތުކުރެވޭ މިންވަރަށް ހެކި ހުށަހަޅާފައިވާ ކަމަށެވެ. އެގޮތުން އަނިޔާވި ފަރާތުން ބުނާ ބުނުމާއި، އަނިޔާ ލިބުނު ފަރާތަށް ލިބިފައިވާ އަނިޔާގެ ފޮޓޯއާއި ސީސީޓީވީގެ ފުޓޭޖްގެ ސްނެޕްޝޮޓްތަކާއި ހެއްކެއްގެ ބަޔާނާއި ބޭންކް ސްޓޭޓްމަންޓް ހުށަހަޅާފައިވާ ކަމަށެވެ.

ބަންދުގައި ބަހައްޓަން އަމުރު ކުރީ ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީގެ 49 ވަނަ މާއްދާއާއި، ޖިނާއީ އިޖްރާއަތުގެ ގާނޫނުގެ 59 ވަނަ މާއްދާއާއި 60 ވަނަ މާއްދާގެ ދަށުން، މުޖްތަމައުގެ ސަލާމަތާއި ރައްކާތެރިކަމަށްޓަކައި ކަމަށް ބުނެފައިވެއެވެ.

އަދި ބަންދުގައި ބަހައްޓަން ޖެހޭ ހާލަތު އޮތްކަމަށް ދެކޭ ސަބަބެއްގެ ގޮތުގައި ބުނެފައިވަނީ ޝަރީއަތްކުރުމާ ބެހޭ ޖިނާއީ އިޖުރާއަތުގެ ގަވާއިދުގެ 13 ވަނަ މާއްދާގެ (މ) ގެ (1) (3) (4) އަދި (6) އަށް ރިއާޔަތްކޮށެވެ.

މި މީހާގެ ބަންދުގެ މުއްދަތު ޖަހާފައިވަނީ ބުރާސްފަތި ދުވަހުއެވެ. އެހެންކަމުން އޭނާގެ ބަންދުގެ މުއްދަތު ހަމަވާނީ މި މަހުގެ 17 ވަނަ ދުވަހުއެވެ.