ރޮޑްރީގޯ ވެސް ރެއާލްގެ އެއްބަސްވުން އައުކޮށްފި
2028 ގެ ނިޔަލަށް ކްލަބްގައި ހުންނާނެ
2028 ގެ ނިޔަލަށް ރޮޑްރީގޯ ކްލަބްގައި މަޑުކުރާނެ: ފޮޓޯ-ރެއާލް މެޑްރިޑް
ރެއާލް މެޑްރިޑް އަށް ކުޅެމުން އަންނަ ބްރެޒިލް ފޯވާޑް ރޮޑްރީގޯ ވެސް އެ ކްލަބާއެކު ހަދާފައިވާ އެއްބަސްވުން އައުކޮށްފިއެވެ.
ބްރެޒިލް ފޯވާޑް ވިނީޝިއުސް ޖޫނިއަރ އެއްބަސްވުން އައުކުރިތާ ދެދުވަސް ތެރޭގައި ރޮޑްރީގޯވެސް އެއްބަސްވުން އާކުރުމުން ރެއާލް އަށް ބޮޑު ހިތްހަމަޖެހުމެއް ލިބޭނެއެވެ. އައު އެއްބަސްވުމުގައި ވާގޮތުން ރޮޑްރީގޯ 2028 ވަނަ އަހަރުގެ ނިޔަލަށް ރެއާލް މެޑްރިޑްގައި ދެމިހުންނާނެއެވެ. 22 އަހަރުގެ ފޯވާޑް ރޮޑްރީގޯވެސް ރެއާލްއާ ގުޅުނީ 18 އަހަރުގައެވެ. އެއީ ބްރެޒިލްގެ ސަންތޯސްއިންވެ.
ރޮޑްރީގޯ ވަނީ މިހާތަނަށް ރެއާލް މެޑްރިޑަށް ކުޅުނު 179 މެޗުން 39 ގޯލް ޖަހާފައެވެ. އޭނާގެ ގޯލްތަކާއެކު ރޮޑްރީގޯ ވަނީ ލަލީގާ ދެ ފަހަރު, ކޮޕަ ޑެލެރޭ, ޗެމްޕިއަންސް ލީގު, ޔޫރަޕިއަން ސުޕަރ ކަޕް އަދި ކްލަބް ވަރލްޑް ކަޕްވެސް ހޯދާފައެވެ. ރޮޑްރީގޯ އަކީ ބްރެޒިލް ގައުމީ ޓީމްގެ ވެސް މުހިއްމު ކުޅުންތެރިއެކެވެ. ގައުމީ ޓީމަށް 18 މެޗު ވަނީ ކުޅެފައެވެ. އޭގެތެރޭގައި އެންމެ ފަހުން ގަތަރު ވަރލްޑްކަޕްގައި ކުޅުނު ފަސް މެޗު ހިމެނެއެވެ.
