އިންތިޚާބީ ރައީސް ހުވާކުރެއްވުމުގެ ޖަލްސާއާ ގުޅޭގޮތުން ފޮރިން މިނިސްޓްރީއާއި މަޖިލީހުގެ އިދާރާއިން މަޝްވަރާކޮށްފި
2 ނޮވެމްބަރު 2023 | ބުރާސްފަތި 15:23މި ޖަލްސާގެ އިންތިޒާމްތަކަށް 22.9 މިލިއަން ރުފިޔާ ހޭދަވާނެކަަމަށް ވަނީ އަންދާޒާކޮށްފައި
ފޮރިން މިނިސްޓްރީއާއެކު މަޖިލީހުގެ އިދާރާއިން ބޭއްވި ބައްދަލުވުން
އިންތިޚާބީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުއާއި އެމަނިކުފާނުގެ ނައިބު ހުސައިން މުހައްމަދު ލަތީފް ހުވާކުރެއްވުމުގެ ޖަލްސާއަށް ވަޑައިގަންނަވާ ބޭރުގެ އިއްޒަތްތެރީންގެ އިންތިޒާމްތަކާ ގުޅޭގޮތުން، މަޖިލީހުގެ އިދާރާއިން، މިނިސްޓްރީ އޮފް ފޮރިން އެފެއަރޒާއެކު މަޝްވަރާކޮށްފިއެވެ.
މަޖިލީހުގެ އިދާރާއިން ބުނީ ހުވާކުރުމުގެ ޖަލްސާއަށް އަވައްޓެރި ބައެއް ގައުމުތަކުގެ ރައީސުން ވަޑައިގަންނަވާނެ ކަމަށެވެ. ނަމަވެސް އަދި ޖަލްސާގައި ބައިވެރިވަޑައިގަންނަވާ ވެރިންގެ ތަފްސީލް ހާމަކުރައްވާފައެއް ނުވެއެވެ. އިންތިޚާބީ ރައީސާއި ނައިބު ރައީސް ހުވާކުރެއްވުމުގެ ޖަލްސާ ބާއްވާނީ މިމަހުގެ 17 ވަނަ ދުވަހު، ޖުމްހޫރީ މައިދާނުގައެވެ. ނަމަވެސް މޫސުން ގޯސްވެއްޖެނަމަ އެ ހާލަތުގައި މިޖަލްސާ ރައްޔިތުންގެ މަޖިލީހުގައި ބޭއްވުމަށް ވަނީ ނިންމާފައެވެ.
މި ޖަލްސާގެ އިންތިޒާމްތަކަށް 22.9 މިލިއަން ރުފިޔާ ހޭދަވާނެކަަމަށް ވަނީ އަންދާޒާކޮށްފައެވެ.
އެ ޖަލްސާއަށް 3500 މީހުންނަށް ދައުވަތު ދިނުމަށް ވަނީ ހަމަޖެހިފައެވެ.
