ހައްޔަރު ކުރިއިރު ޤާނޫނީ އިންޒާރު ނުދޭތީ، ފޭރުމުގެ މައްސަލައެއްގައި ހައްޔަރުކުރި ބަޔަކު ދޫކޮށްލައިފި

ފޭރުމުގެ މައްސަލައެއްގައި ފުލުހުން ހައްޔަރުކުރި ބަޔަކަށް ޤާނޫނީ އިންޒާރު ދީފައިނުވާތީ އެ މައްސަލައިގައި ހައްޔަރުކުރި ބަޔަކު ކްރިމިނަލް ކޯޓުން ދޫކޮށްލައިފިއެވެ.

މި މައްސަލައިގައި ހައްޔަރުކޮށްފައިވަނީ އުމުރުން 40 އަހަރުގެ އަންހެނަކާއި، 39 އަހަރާއި، 36 އަހަރާއި، 42 އަހަރުގެ 3 ފިރިހެނެކެވެ.

އެމީހުންގެ ބަންދާމެދު ގޮތެއް ނިންމުމަށް ބޭއްވި މަޖިލީހުގައި ކޯޓުން ވަނީ އެ ހަތަރު މީހުންވެސް ބަންދުން ދޫކޮށްލުމަށް އަމުރުކޮށްފައެވެ.

ކްރިމިނަލް ކޯޓުން ބުނީ، އެމީހުން ހައްޔަރުކޮށްފައިވަނީ ކޯޓު އަމުރެއްގެ ދަށުން ނޫންކަން މުއްދަތު މަޖިލީހަށް ހުށަހެޅިފައިވާ ލިއެކިޔުންތަކުން އެނގޭކަމަށެވެ.

އަދި އެމީހުންނަށް ދޭންޖެހޭ ޤާނޫނީ އިންޒާރު ދީފައިވާކަންވެސް އެނގެން ނެތްކަމަށް ކޯޓުން ނެރުނު އަމުރުގައި ބަޔާންކޮށްފައިވެއެވެ.

ކްރިމިނަލް ކޯޓުގައި މި އަމުރު ނެރުއްވީ ގާޒީ ހުސައިން ފާއިޒް ރަޝާދެވެ.  

ކުށުގެ ތުހުމަތެއްގައި ހައްޔަރު ކުރެވިއްޖަނަމަ 24 ގަޑިއިރުގެ ތެރޭގައި އެމީހަކު ފަނޑިޔާރެއްގެ ކުރިމައްޗަށް ހާޒިރުކުރަން ޖެހެއެވެ.

އަދި އޭނާގެ ބަންދާމެދު ގޮތެއް ނިންމުމަށްޓަކައި ބޭއްވޭ އަޑުއެހުމުގައި އޭނާ ހައްޔަރުކޮށްފައިވަނީ ޤާނޫނާ އެއްގޮތަށްތޯ ނުވަތަ ނޫންތޯ ފަނޑިޔާރު ނިންމަވަން ޖެހޭކަމަށް ޖިނާއީ އިޖުރާއަތުގެ ޤާނޫނުގައި ބަޔާންކޮށްފައިވެއެވެ.