އިސްރާއީލާއި އެކު ވިޔަފާރީގެ އެއްވެސް މުއާމަލާތެއް ނުކުރުމަށް މުސްލިމް ޤައުމުތަކަށް އިރާނުން ގޮވާލައިފި

ފަލަސްތީނުގެ 8،500 އަށް ވުރެ ގިނަ މީހުން ޝަހީދުކޮށްލައި، ޣައްޒާއަށް ދެމުންދާ ބޮމުގެ ހަމަލާގެ ބަދަލު ހިފުމުގެ ގޮތުން ތެލާއި ކާބޯތަކެތީގެ އެކްސްޕޯޓް ކުރުން ހުއްޓުވުން ފަދަ ވިޔަފާރީގެ މުއާމަލާތްތައް ހުއްޓާލުމަށް އީރާނުގެ އެންމެ މަތީ ލީޑަރު އާޔަތުالله އަލީ ޚާމަނާއީ މުސްލިމް ގައުމުތަކަށް ގޮވާލައްވައިފި އެވެ.

ތެހެރާނުގައި ކިޔަވާ ދަރިވަރުންނަށް ދެއްވި ބަސްދީގަތުމެއްގައި ޚާމަނާއީ ވިދާޅުވީ ބޮމުގެ ހަމަލާތައް ވަގުތުން ހުއްޓާލުމަށް އިސްލާމީ ސަރުކާރުތަކުން ބާރު އަޅަން ޖެހޭ ކަމަށާއި އިގްތިސާދީ ގޮތުން އިސްރާއީލު އެކަހެރި ކުރުމަށް އެއްބާރުލުން ދޭން ޖެހޭ ކަމަށެވެ. އޭނާ ވަނީ ފަލަސްތީނާ ދެކޮޅަށް އިނގިރޭސިވިލާތް، ފަރަންސޭސިވިލާތް އަދި އެމެރިކާ އިން ތެދުވި ކަމަށް ބުނެ އެކަމަށް ވަރަށް ބޮޑަށް ފާޑު ވިދާޅުވެފަ އެވެ.

ޣައްޒާގެ ރައްޔިތުންނަށް ދެމުންދާ ލާއިންސާނީ އުދުވާންތައް ވަރަށް ބޮޑަށް ކުށްވެރި ކުރައްވަމުން އަދި ހުޅަނގުގެ ނޭއްގާނީކަމަށް ވަރަށް ބޮޑަށް ފާޑު ވިދާޅުވަމުން ޚާމަނާއީ ވިދާޅުވީ ވިޔަފާރީގެ ގުޅުންތަކާ މެދު ވިސްނާއިރު އިސްރާއީލުގެ އަމަލުތަކަށް މަގުފަހިކޮށްދެނީ ކާކުކަން މުސްލިމް ގައުމުތަކުން ހަނދާން ބަހައްޓަން ޖެހޭ ކަމަށެވެ. އިޒްރޭލާ ގުޅުން ކަނޑާލުމަށް އީރާނުން ޒަމާނުއްސުރެ މުސްލިމް ގައުމުތަކަށް ބާރު އަޅައެވެ.

ނަމަވެސް އަރަބި ބައެއް ގައުމުތަކުން ވަނީ އޭގެ ބަދަލުގައި ޑިޕްލޮމެޓިކް ގޮތުން އިސްރާއީލާ ގުޅުން ބަދަހިކޮށްފަ އެވެ. ހަނގުރާމަ ހުއްޓާލުމުގެ މަސައްކަތް ތައް ހުއްޓުމަކަށް އައިސްފައިވާއިރު، އީރާނުން ގެންދަނީ އިގްތިސާދީ ވަސީލަތްތައް މެދުވެރިކޮށް ސަރަހައްދީ ޤައުމުތަކަށް ކުރަމުންދާ ޕްރެޝަރު ކުޑަކުރުމަށް މަސައްކަތް ކުރަމުންނެވެ.

ތަޖުރިބާކާރުން ބުނަނީ ޚާމަނާއީގެ މި އެދުމަށް ގަލްފުގެ ގައުމުތަކުން މާބޮޑު އެއްބާރުލުމެއް ދޭނެ ކަމަށް ނުބެލެވޭ ކަމަށެވެ.

ހަނގުރާމަ ހުއްޓާލުމަށް ބައިނަލް އަޤުވާމީ ފެންވަރުގައި މިހާތަނަށް ކުރެވިފައިވާ ހުރިހާ މަސައްކަތްތަކެއް ފަނުފުލުން ގޮސްފައިވާއިރު، ހުސްވި އޮކްޓޯބަރުގެ 7 ވަނަދުވަހުން ފެށިގެން މިހާތަނަށް ފަލަސްތީނުން ވަނީ 8500ށް ވުރެ ގިނަމުސްލިމުން ޝަހީދުކޮށްފައެވެ. އަދި އޭގެތެރޭގައި ގިނައީ ކުޑަކުދިންނާއި، އަންހެނުންނެވެ.