އަންނަ އަހަރު ޖީޑީޕީގެ ނިސްބަތުން ޑެފިސިޓް ހުންނާނެ ކަމަށް ލަފާކުރަނީ 12 އިންސައްތައިގައި
2025 ވަނަ އަހަރާއި 2026 ވަނަ އަހަރަކީ ދަރަނި އަނބުރާ ދައްކަން ކުރަންޖެހޭ ހޭދަ ނިސްބަތުން އުފުލިފައި ހުންނާނެ ދެ އަހަރު
މޯލްޑިވްސް މަނިޓަރީ އޮތޯރިޓީ (އެމްއެމްއޭ)
2024 ވަނަ އަހަރު ޖީޑީޕީގެ ނިސްބަތުން އޯވަރޯލް ޑެފިސިޓް ހުންނާނެކަމަށް ލަފާކުރެވެނީ 12 އިންސައްތައިގައި ކަމަށް ބަޖެޓުގައި ބުނެފިއެވެ.
ފިނޭންސް މިނިސްޓްރީން މަޖިލީހަށް ހުށަހަޅާފައިވާ އަންނަ އަހަރުގެ ދައުލަތުގެ ބަޖެޓުގައި ބުނެފައިވަނީ ހަރަދުކުޑަކުރަން އަޅަން ރާވާފައިވާ ފިޔަވަޅުތައް އަންނަ އަހަރު ތަންފީޒުކުރެވުމާއެކު، ބަޖެޓް ޑެފިސިޓް ދަށަށްދާން ފަށައި، 2024 ވަނަ އަހަރު ޖީޑީޕީގެ ނިސްބަތުން އޯވަރޯލް ޑެފިސިޓް ހުންނާނެ ކަމަށް ލަފާކުރެވެނީ 12 އިންސައްތައިގައި ކަމަށެވެ. އަދި އާމްދަނީ އިތުރުވިނަމަވެސް، ބައެއް ސަބްސިޑީތަކަކާާއި، އާސަންދަ އަދި ޕީއެސްއައިޕީއަށް ކުރަންޖެހުނު ހަރަދު އިތުރުވުމާއި ގުޅިގެން 2023 ވަނަ އަހަރު މި ނިސްބަތް ހުންނާނެކަމަށް ބެލެެވެނީ 13.8 އިންސައްތައިގައެވެ.
އަދި ކުރިއަށް އޮތް އަހަރު ޖީޑީޕީގެ ނިސްބަތުން 7.4 އިންސައްތައިގައި ޕްރައިމަރީ ޑެފިސިޓް ހުންނާނެކަމަށް އަންދާޒާކުރެވޭ އިރު، މި ނިސްބަތް 5 އިންސައްތައަށްވުރެ ދަށުގައި ބަހައްޓަން ފިސްކަލް ސްޓްރެޓަޖީގައި ކަނޑައެޅި ފިސްކަލް އެންކަރ ހާސިލުވާނެކަމަށް ބެލެވެނީ 2026 ވަނަ އަހަރުކަމަށް ބަޖެޓުގައި ބުނެފައިވެއެވެ.
މީގެ އިތުރުން 2024 ވަނަ އަހަރަށް އެކުލަވާލާފައިވާ ބަޖެޓު ފައިނޭންސް ކުރުމަށް 17.2 ބިލިއަން ރުފިޔާ ހޯދަންޖެހޭނެކަމަށް ލަފާކޮށްފައިވާ އިރު، އޭގެ ތެރެއިން 71.8 އިންސައްތައަކީ ބޭރުގެ ފަރާތްތަކުން ހޯދަން ރާވާފައިވާ ފައިސާ ކަމަށް ބަޖެޓުގައި ބުނެފައިވެއެވެ. ބަޖެޓުގައި ބުނެފައިވަނީ 2023 ވަނަ އަހަރުގެ ޑެފިސިޓް އަންދާޒާކުރި މިންވަރަށްވުރެ އިތުރުވެ، ފައިނޭންސިންގ ހޯދަންޖެހޭ މިންވަރުވެސް، މި އަހަރަށް ފާސްކުރި ބަޖެޓުގައި ހިމަނާފައިވާ މިންވަރަށްވުރެ 66 އިންސައްތަ އިތުރުވާނެކަމަށް ވަނީ ލަފާކޮށްފައެވެ.
އަދި 2025 ވަނަ އަހަރާއި 2026 ވަނަ އަހަރަކީ ދަރަނި އަނބުރާ ދައްކަން ކުރަންޖެހޭ ހޭދަ ނިސްބަތުން އުފުލިފައި ހުންނާނެ ދެ އަހަރުގައިކަމުގައިވުމާއެކު، ފައިނޭންސް ހޯދަންޖެހޭ މިންވަރު، މެދުރާސްތާގައި މަތިވާނެކަމަށް ވަނީ ބުނެފައެވެ.
ބަޖެޓުގައި ބުނެފައިވަނީ ގެރެންޓީ ދީފައިވާ ދަރަނި ދަށްވާ މިންވަރަށްވުރެ، ދައުލަތުގެ ސީދާ ދަރަނި އިތުރުވާ މިންވަރު މަތިވެ، 2024 ވަނަ އަހަރު ޖީޑީޕީގެ ނިސްބަތުން ޖުމުލަ ދަރަނީގެ މިންގަނޑު 114.3 އިންސައްތައަށް މަތިވާނެކަމަށެވެ. އަދި މިއާއެކު ޖީޑީޕީގެ ނިސްބަތުން ޖުމުލަ ދަރަނި ދަށަށްދާނެ މިސްރާބުގައި ބަހައްޓަން ކަނޑައެޅި ފިސްކަލް އެންކަރ އަންނަ އަހަރު ހާސިލުވާނެކަމަށް ނުބެލެވުނު ނަމަވެސް، މެދުރާސްތާފައި މި މިންގަނޑު ދަށްވަމުން އައިސް 2026 ވަނަ އަހަރު ނިމޭއިރު 107 އިންސައްތަ ދަށްވާނެކަމަށް ބަޖެޓުގައި ވަނީ ލަފާކޮށްފައެވެ.
