ރައްޔިތުންގެ މަޖިލީހުގެ އަމީންއާންމު އަދި ކައުންސިލް ޖެނެރަލް މަސައްކަތް ކުރައްވަނީ މަޖިލީހުގެ ރައީސާއި ނައިބު ރައީސްގެ ވަކީލުންގެ ގޮތުގައި ކަމަށް ދެކެވަޑައިގަންނަވާ ކަމަށް ވެލިދޫ ދާއިރާގެ މެމްބަރު މުޙައްމަދު އަބްދުﷲ ޝަފީގު ވިދާޅުވެއްޖެއެވެ.
"ރާއްޖެ ޓީވީ" ގެ ފަލަސުރުޚީގައި ވާހަކަފުޅު ދައްކަވަމުން މުޙައްމަދު ޝަފީގު ވިދާޅުވީ މީގެ ކުރިން ވެސް މަޖިލީހުގެ އަމީން އާންމު އާއި ކައުސިލް ޖެނެރަލް މަސައްކަތް ކުރެއްވީ އޭރުގެ މަޖިލީހުގެ ރައީސްގެ މަގާމުގައި ހުންނެވި މަސީހު ވިދާޅުވިގޮތަކަށް ކަމަށެވެ. މިހާރުވެސް ފެނިގެންދަނީ އެ މަންޒަރު ކަމަށާއި އެ ދެ ބޭފުޅުން ވެސް މަސައްކަތް ކުރައްވަނީ މަޖިލީހުގެ ރައީސާއި ނައިބު ރައީސާ ގުޅިގެން ކަމަށެވެ.
އަމީން އާންމު އާއި ކައުންސިލް ޖެނެރަލް އަކީ ޤާނޫނީ ވަކީލުންކަން ފާހަގަކުރައްވައި މުޙައްމަދު ޝަފީގު ވިދާޅުވީ އެ ދެބޭފުޅުންނަށް ވެސް ކްލައިންޓު އޮޅިވަޑައިގެންފައިވާ ކަމަށެވެ. އެގޮތުން، މަޖިލީހުގެ ރައީސާއި ނައިބު ރައީސްގެ ދިފާއުގައި މަސައްކަތް ކުރައްވާ މަންޒަރު ފެނިވަޑައިގަންނަވާ ކަމަށާއި ހަގީގަތުގައި އެ ދެ ބޭފުޅުން ވެސް މަސައްކަތް ކުރައްވަން ޖެހޭނީ މަޖިލީހުގެ ދިފާއުގައި ކަމަށް އޭނާ ވިދާޅުވިއެވެ.
ރައްޔިތުންގެ މަޖިލީހުގެ ގަވާއިދުގެ ރޫހަކީ އަދި ގާނޫނު އަސާސީގެ ވެސް ރޫހަކީ ރައްޔިތުންގެ މަޖިލީހުގެ މަސައްކަތްތައް ހުއްޓުވާލާފައި ބޭއްވުމެއް ނޫން. ރައްޔިތުންގެ މަޖިލީހުގެ ރައީސްގެ މައްޗަށް އިތުބާރު ނެތްކަމުގެ މައްސަލައެއް ހުށަހެޅޭ ހިނދު އެ މަސައްކަތް ނުކޮށް ދެން ރައީސް ސަލާމަތް ކުރެވޭނެ ގޮތެއް ހޯދުމެއް ނޫން. އޭގެ ބަދަލުގައި މަޖިލީހުގެ މަސައްކަތްތައް ކުރިއަށްދާނެ ގޮތަކަށް އެ ބޭފުޅުން އިސްކަންދެއްވަން ވާނީ،ވެލިދޫ ދާއިރާގެ މެމްބަރު މުޙައްމަދު އަބްދުﷲ ޝަފީގު
މުޙައްމަދު ޝަފީގު ވިދާޅުވީ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމުގެ މައްސަލަ ހުށަހަޅައިފައިވަނިކޮށް ނައިބު ރައީސް ސަލާމް ފޮނުއްވުމުން ނުވަތަ ޖަލްސާއަށް ހާޒިރުވެވަޑައިނުގެންނެވުމުން އެ މައްސަލަ ކުރިއަށް ނުގެންދެވި އޮންނަން ނުޖެހޭ ކަމަށެވެ. މަޖިލީހުގެ ގަވާއިދުގައި އިތުރު ފަސް މެމްބަރަކަށް ރިޔާސަތުގައި އިންނެވޭ ގޮތަށް ކަނޑައަޅާފައި އޮންނަނީ އެފަދަ ހާލަތްތައް މެދުވެރިވެދާނެތީ ކަމަށްވާއިރު އެގޮތަށް އެކަން ކުރަން ޖެހޭ ކަމަށް އޭނާ ވިދާޅުވިއެވެ.
މި މައްސަލަ ކުރިއަށްގެންދެވޭނެ ގޮތެއް ހޯދުމަށް އެމްޑީޕީން ވަނީ ސުޕްރީމް ކޯޓަށް މައްސަލައެއް ވެސް ހުށަހަޅައިފައެވެ. އެ މައްސަލަ މިހާރު ކޯޓުން ބަލައިގެންފައިވާއިރު މިހާރު މަޖިލީހުގައި ކަންކަންވާގޮތުން ދެން ކުރިއަށްދެވޭނީ ސުޕްރީމް ކޯޓުގެ ލަފާ ލިބިގެން ކަމަށް މުޙައްމަދު ޝަފީގު ވިދާޅުވިއެވެ.
މަޖިލީހުގެ އަމީން އާންމު އެމްޑީޕީ ޕީޖީ ގްރޫޕުގެ ލީޑަރަށް ފޮނުއްވި ސިޓީގައި ވިދާޅުވެފައިވާ ގޮތުން މަޖިލީހުގެ ނައިބު ރައީސް ސަލާމް ފިނުއްވުމާ ގުޅިގެން ބުދަ ދުވަސް ހިމެނޭހެން ތިން ޖަލްސާއަކަށް ނަޝީދުގެ މައްސލަަ އެޖެންޑާކުރުމަށްފަހު ޖަލްސާ ވަނީ ކެންސަލްކުރަން ޖެހިފައެވެ. އަދި އަންގާރަ ދުވަހުގެ ޖަލްސާއަށް އެ މައްސަލަ އެޖެންޑާ ނުކުރީ ވެސް އެކަމަނާ ސަލާމް ފޮނުއްވުމުންކަން އެ ސިޓީގައި ވަނީ ބަޔާންކޮށްފައެވެ.
