ރައީސް ޔާމީން ވެރިކަމަށް ގެންނެވުނީތީ ރައްޔިތުންގެ ކިބައިން މާފަށް އެދެން:ރައީސް މައުމޫން
ރައީސް ޔާމީން ވެރިކަމަށް ގެނައުމަށް ގިނަ މަސައްކަތްތަކެއް ކުރިން
ރައީސް މައުމޫން އަބްދުލް ގައްޔޫމް ކުނޫޒްގައި ވާހަކަދައްކަވަނީ
ރައީސް ޔާމީން ވެރިކަމަށް ގެންނެވުނީތީ ރައްޔިތުންގެ ކިބައިން ކުރީގެ ރައީސް މައުމޫން އަބްދުލް ގައްޔޫމް މައާފަށް އެދިވަޑައިގެންފި އެވެ.
މ. ކުނޫޒްގައި ބޭއްވި ޖަލްސާގައި ވާހަކަދައްކަވަމުން ރައީސް ޔާމީންގެ އެއްބަފާ ބޭބޭފުޅުން ރައީސް މައުމޫން ވިދާޅުވީ، ރައީސް ޔާމީން ވެރިކަމަށް ގެންނެވުމަށް އެ މަނިކުފު އަމިއްލަ ފުޅަށް ގިނަ މަސައްކަތްތަކެއް ކުރެއްވި ކަމަށެވެ. އެގޮތުން ރައްޔިތުންގެ އަރިހަށް ގޮސް ވެރިކަމަށް ގެނައުމަށް ގިނަ މސައްކަތްތަކެއް ކުރެވުނު ކަމަށް އެމަނިކުފާނު ވިދާޅުވި އެވެ.
ރައީސް ޔާމީން ވެރިކަމަށް ގެންނެވުނު ނަމަވެސް، ފެނިގެންދިޔައީ ޕީޕީއެމްގެ އުސޫލުތަކާއި ހިލާފަށް ކަންކަން ކުރެވެމުންދާ ކަމަށް ރައީސް މައުމޫން ވިދާޅުވި އެވެ. މިއީ ވަރަށް ހިތްދަތި އިހުސާސްތަކެއް މިއަދު ކުރަންޖެހޭ ކަމެއް ކަމަށް މައުމޫން ވިދާޅުވި އެވެ.
" ޕީޕީއެމްގެ ރައީސްގެ ހައިސިއްޔަތުން، ޕީޕީއެމްގެ ޕްލެޓްފޯމްގައި ޕީޕީއެމް މެނިފެސްޓޯ ހިތްޕަވައިގެން ނުކުންނެވި ބޭފުޅަކަށް ވާތީ، މިއަދު ވަރަށް ދެރަވޭ. ރައްޔިތުންގެ ކިބައިން އެކަމަށް މާފަށްވެސް އެދެން." ރައީސް މައުމޫން ވިދާޅުވި އެވެ.
ރައީސް މައުމޫން ވިދާޅުވީ ރައީސް ޔާމީން ވެރިކަމަށް ގެންނެވީ ހެޔޮ ނިޔަތުގައި ކަަމަށާއި، އެހެން ނަމަވެސް ޕީޕީއެމްގެ ފަލްސަފާއާ ހިލާފަށް މަސައްކަތް ކުރުމަކީ ބަލައިގަނެވޭނެ ކަމެއް ނޫން ކަމަށެވެ. މިކަންކަމުގައި ރައްޔިތުންގެ ކުރިމަތިގައި ވިދާޅުވާނެ އެއްޗެއް ނެތް ކަމަށާއި ކަންކަން ކުރައްވަމުން ގެންދަވަނީ ހިތްޕުޅަށް އަރައިވަޑައިގެންނެވި ގޮތަކަށް ކަމަށެވެ. ރައީސް ޔާމީން މަސައްކަތް ކުރައްވަނީ ގާނޫނު އަސާސީއާ ހިލާފަށް ކަމަށާއި އެކަމުގެ ބަދުނާމު އެޅުނީ އެމަނިކުފާނުގެ އިސްތަށިފުޅުގައި ކަމަށް ގަބޫލް ކުރައްވާކަމުގައި ރައީސް މައުމޫން ވިދާޅުވި އެވެ.
ގައުމު އިސްލާހު ކުރުމަށް ފެށި މަސައްކަތަކީ ސަރުކާރު ވައްޓާލުމަށް ކުރާ މަސައްކަތެއް ނޫން ކަމަށާއި އެހެން ނަމަވެސް މިއީ ގައުމުގެ އިސްލާހަށް ކުރާ މަސައްކަތެއް ކަމަށް އެމަނިކުފާނު ވިދާޅުވި އެވެ. އަދި މިއީ ވަރަށް މީހަކު ވެރިކަމަށް ގެނައުމަށް ކުރާ މަސައްކަތެއް ނޫން ކަމަށާއި ވަކި މީހަކަށް ދެރައެއް ދޭން ކުރާ ކަމެއް ނޫން ކަމަށް ވެސް އެ މަނިކުފާނު ވިދާޅުވި އެވެ. ގުޅިފައިވާ ސިޔާސީ ޕާޓީތަކުން ކުރާ މަސައްކަތް ކާމިޔާބު ވެގެންދާނެ ކަމަށް ވެސް ރައީސް މައުމޫން ވިދާޅުވި އެވެ.
