މުއިއްޒު ހުވާކުރުމުގެ ޖަލްސާއަށް ވަޑައިގަންނަވާ ބޭފުޅުންގެ ޓްރެފިކް މޫވްމެންޓާ ގުޅޭ ގޮތުން މަޝްވަރާކޮށްފި

އިންތިޚާބީ ރައީސް ޑރ. މުހައްމަދު މުއިއްޒު ހުވާކުރެއްވުމުގެ ޖަލްސާއަށް ވަޑައިގަންނަވާ ބޭފުޅުންގެ ޓްރެފިކް މޫވްމެންޓާ ގުޅޭގޮތުން ކަމާބެހޭ އިދާރާތަކުން މަޝްވަރާކޮށްފި އެވެ.

ރައްޔިތުންގެ މަޖިލީހުގައި ހޯމަ ދުވަހު ބޭއްވި މި ބައްދަލުވުމުގައި އެމްއެންޑީއެފް އަދި ފުލުހުންނާއެކު އިންތިޚާބީ ރައީސްގެ ފަރާތްޕުޅުން ދެ ބޭފުޅަކު ވަނީ ބައިވެރިވެވަޑައިގަންނަވައިފަ އެވެ.

އިންތިޚާބީ ރައީސް، ޑރ. މުހައްމަދު މުއިއްޒު ރައީސް ކަމުގެ ހުވާ ކުރެއްވުން އޮތީ ނޮވެމްބަރު މަހުގެ 17 ވަނަ ދުވަހު ޖުމްހޫރީ މައިދާނުގައި އެވެ. އެ ދުވަހުގެ ޖަލްސާގައި 3500 އެއްހާ ފަރާތްތަކުން ބައިވެރިވާނެ ކަމަށް އިންތިޚާބީ ރައީސްގެ އޮފީހުން ބުނެ އެވެ.

މި ޖަލްސާގެ ތައްޔާރީތައް ސިފައިންގެ ވެލްފެއާ ކުންފުނި (ސިވެކް) އިން ފަށާފައިވާއިރު، މި މަސައްކަތް އެ ކުންފުންޏާ ހަވާލުކޮށްފައިވަނީ 22.9 މިލިއަން ރުފިޔާ އަށެވެ. އަދި މި ރަސްމިޔާތަށް ތައްޔާރުކުރުމަށް ޖުމްހޫރީ މައިދާން ވަށައި ފެންސު ޖަހައި ބަންދުކުރުމުގެ މަސައްކަތް ފަށާފައެވެ.