މަޖިލީހަށް ހޮވޭ ޕީޕީއެމް/ޕީއެންސީ އަންހެން މެންބަރުންނަށް ޕާޓީން އެލަވެންސް ދެއްވާނެ ކަމަށް އިންތިޚާބީ ރައީސް ޑރ. މުޙައްމަދު މުއިއްޒު ވިދާޅުވުމުން އެމަނިކުފާނުގެ އިހުލާސްތެރިކަމާމެދު ސުވާލު އުފެދޭ ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު ރޮޒެއިނާ އާދަމް ވިދާޅުވެއްޖެއެވެ.
އަންނަ އަހަރު ބާއްވާ މަޖިލިސް އިންތިޚާބުގައި ވީހާވެސް ގިނަ އަންހެނުން ބައިވެރިވެ، ހޮވިގެންދިއުމަކީ އެދިވަޑައިގަންނަވާ ކަމެއް ކަމަށް އާދިއްތަ ދުވަހު ކުރެއްވި ޓްވީޓެއްގައި މުއިއްޒުވަނީ ވިދާޅުވެފައެވެ. އެގޮތުން، ޕީޕީއެމް/ޕީއެންސީން މަޖިލީހުގައި މަދުވެގެން 20 އިންސައްތަ ގޮނޑިއަށް އަންހެނުން ކުރިމަތިލުމަށާއި ހޮވުމަށް މަސައްކަތް ކުރުމަށް އެމަނިކުފާނު ގޮވާލެއްވިއެވެ.
ޕީޕީއެމް/ޕީއެންސީން މަޖިލީހަށް ހޮވޭ ކޮންމެ އަންހެން މެންބަރަކަށް މަޖިލީހުން ލިބޭ މުސާރައާއި އިނާޔާތުގެ އިތުރުން ޕާޓީން ހާއްސަ އެލަވެންސެއް ދޭގޮތަށް ހަމަޖައްސަން މަސައްކަތް ކުރައްވާނެ ކަމަށް ވެސް މުއިއްޒު ވިދާޅުވިއެވެ.
މުއިއްޒުގެ މިވާހަކަފުޅަށް ރައްދު ދެއްވައި ރޮޒެއިނާ ވިދާޅުވީ އެމަނިކުފާނު މަޖިލީހަށް އަންހެން މެންބަރުން ހޮއްވަވަން ހަގީގަތުގައި ވެސް ބޭނުންފުޅުވާނަމަ ޚަރަދު ކުރަންވީ ކެމްޕޭނަށް ކަމަށެވެ. އެހީތެރިކަން ބޭނުންވަނީ ހޮވުމުން ނޫން ކަމަށާއި ހޮވުމުން އެލަވެންސެއް ދިނުމަކީ ބޭކާރު ކަމެއް ކަމަށް އޭނާ ވިދާޅުވިއެވެ.
އެހެންވެ އެމަނިކުފާނު މިހާރު ވިދާޅުވާ އެއްޗެއްގެ ސަބަބުން އިހުލާސްތެރިކަމާމެދު ސުވާލު އުފެދޭ ކަމަށް ރޮޒެއިނާ ވިދާޅުވިއެވެ.
މީގެ އިތުރުން މުއިއްޒުގެ ކެބިނެޓަށް އެމަނިކުފާނު އައްޔަން ކުރައްވާނެ އަންހެނުންގެ އަދަދުން އެމަނިކުފާނުގެ ނިޔަތް ރަނގަޅުކަން ނުވަތަ ނޫންކަން އެނގޭނެ ކަމަށް ވެސް ރޮޒެއިނާ ވިދާޅުވިއެވެ.
